ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტები სტუდენტური თვითმმართველობის წევრებს ირჩევენ. კენჭისყრა ტექნოლოგიურ ფაკულტეტზე დაიწყო და ხუთი დღის განმავლობაში უმაღლესი საგანმანათლებლო დაწესებულების ბაკალავრიატის, მაგისტრატურისა და დოქტორანტურის 6500-მდე სტუდენტი 95-წევრიან სტუდენტთა წარმომადგენლობით ორგანოს 2 წლის ვადით აირჩევს. სტუდენტურ თვითმმართველობაში მოსახვედრად განათლების ფაკულტეტის 6 სტუდენტი იბრძოლებს, ეკონომიკისა და ბიზნესის ფაკულტეტის - 10, იურიდიული ფაკულტეტის - 5, საბუნებისმეტყველო მეცნიერებათა და ჯანდაცვის ფაკულტეტის - 17, სოციალურ და პოლიტიკურ მეცნიერებათა ფაკულტეტის - 12, ტექნოლოგიურ ფაკულტეტის - 13, ტურიზმის ფაკულტეტის - 4, ფიზიკა-მათემატიკისა და კომპიუტერულ მეცნიერებათა ფაკულტეტის - 10 და ჰუმანიტარულ მეცნიერებათა ფაკულტეტის - 24. სტუდენტური თვითმმართველობის არჩევნები ფარული კენჭისყრით იმართება.

დღეს, ბათუმის შოთა რუსთაველის სახელმწიფო უნივერსიტეტში, საქართველოს სტუდენტური ორგანიზაციების ასოციაციის ინიციატივითა და ბსუ-ს უნივერსიტეტის მხარდაჭერით სტუდენტთა დასაქმების ფორუმი გაიმართა. ფორუმში 30-მდე დამსაქმებელმა კომპანიამ მიიღო მონაწილეობა და 150-მდე ვაკანსია იყო წარმოდგენილი.

მიმდინარე სასწავლო წლიდან ბსუ-ს ჰუმანიტარულ მეცნიერებათა ფაკულტეტზე, არჩევითი სასწავლო კურსის სტატუსით, ჩინური ენის სწავლება დაიწყო. ბსუ-ს სტუდენტებს საშუალება აქვთ ენის შესწავლა სრულიად უფასოდ ნულოვანი დონიდან დაიწყონ.კურსის პირველი ეტაპი ბსუ-ს სტუდენტებმა უკვე გაიარეს საქართველოში გამოცემული ქართულენოვანი სახელმძღვანელოს "ჩინური ენის პრაქტკული კურსის" და აუდიო მასალის მეშვეობით.
სტუდენტები ენასთან ერთად, ჩინურ კულტურას, ტრადიციებსა და ისტორიას ეცნობან. კურსი როგორც სასაუბრო ნაწილის, ასევე იეროგლიფების შესწავლას ითვალისწინებს. ჯგუფს მოწვეული პედაგოგი ხელმძღვანელობს, რომელიც ჩინეთში ხუნანის უნივერსიტეტში სწავლობდა.

დღეს, ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტის სოციოლოგიის სამაგისტრო პროგრამის წარდგინება გაიმართა. პრეზენტაციის ფარგლებში, პროგრამის ხელმძღვანელებმა ბსუ-ს ასოცირებულმა პროფესორმა ლალი ანთიძემ და თბილისის ივანე ჯავახიშვილის სახელმწიფო უნივერსიტეტის პროფესორმა სოციოლოგმა - იაგო კაჭკაჭიშვილმა დაინტერესებულ საზოგადოებას პროგრამის მიზანი, არსი, მიღების წინაპირობა და დასაქმების სფერო გააცნეს.

სან დიეგოს სახელმწიფო უნივერსიტეტის დეკანმა საქართველოში, დოქტორმა კენ უოლშმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „სამოქალაქო ინჟინერია და მისი როლი ჩვენს ყოველდღიურ ცხოვრებაში“. მომხსენებელმა ახალგაზრდებს სამოქალაქო ინჟინერიის მნიშვნელობა და მასთან დაკავშირებული აქტუალური საკითხები გააცნო. დოქტორმა კენ უოლშმა ლექციაზე ყურადღება გაამახვილა ასევე მშენებლობისა და ინფრასტრუქტურული პროექტების მაღალი ხარისხისა და უსაფრთხოების მნიშვნელობაზე.