ახალი ამბები

ბათუმის შოთა რუსთაველის სახელმწიფო უნივერსიტეტში 29 მაისიდან 2 ივნისამდე ერაზმუს+-ის აკადემიური და ადმინისტრაციული პერსონალის გაცვლითი პროგრამის ეგიდით საერთაშორისო კვირეული ჩატარდა. ბულგარეთის ქალაქ რუსეს ანგელ კაჩევსკის უნივერსიტეტის და პოლონეთის ბიალისტოკის ტექნოლოგიური უნივერსიტეტების წარმომადგენლები ბსუ-ს საგანმანათლებლო პროგრამებს, საუნივერსიტეტო ცხოვრებასა და ქართულ კულტურას გაეცნენ.დელეგაციის წევრებმა: დესისლავა ათანასოვამ, პლამენკა ქრსიტოვამ, ქრისტინა ემილიანოვამ, მილენა დიმიტროვა პოპოვამ, ცვეტლანა ათანასოვა შენკოვამ, ქრისტინა ემილიანოვამ და ადმინისტრაციული პერსონალმა ევა პეტროვა პარვანოვამ, კრისტინა მიროსვსკამ საჯარო ლექციები წაიკითხეს განათლების, ჰუმანიტარულ მეცნიერებათა და სოციალურ და პოლიტიკურ მეცნიერებათა ფაკულტეტების სტუდენტებისათვის და წარმოადგინეს საკუთარი უნივერსიტეტები.

ბათუმის შოთა რუსთაველის სახელმწიფო უნივერსიტეტის სტუდენტთა საუნივერსიტეტო სამეცნიერო კონფერენცია გაიხსნა. სესია 5 ივნისს დასრულდება და მასში ბათუმის შოთა რუსთაველის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, აკაკი წერეთლის სახელმწიფო უნივერსიტეტის ბაკალავრიატის, მაგისტრატურისა და დოქტორანტურის საგანმანათლებლო პროგრამების 221 სტუდენტი მონაწილეობს. კონფერენციის მუშაობა 33 სექციაში წარიმართება. საუკეთესო ნაშრომებს კომპეტენტური ჟიური გამოავლენს, რომლებიც სტუდენტთა სამეცნიერო ნაშრომთა კრებულში დაიბეჭდება.

მალხაზ სიორიძის 60 წლის იუბილესადმი მიძღვნილი საერთაშორისო სამეცნიერო კონფერენცია გაიმართა ბათუმის შოთა რუსთაველის სახელმწიფო უნივერსიტეტში. ქართველმა, უკრაინელმა, პოლონელმა მკვლევრებმა სამეცნიერო ნაშრომი წარმოადგინეს ისტორიის აქტუალურ საკითხებზე და ბოლო პერიოდში წარმოებული კვლევის შედეგები შეაჯამეს. ასევე იმსჯელეს ისეთ თემებზე, როგორიცაა: 1921 წლის ყარსის ხელშეკრულება, ეროვნული საბჭოს მოღვაწეობა უმაღლესი საკანონმდებლო ხელისუფლების ორგანიზაციებისათვის (1918 წ. მაისი - 1919 წ. იანვარი), კონფესიური და ტერიტორიული პრობლემები ამიერკავკასიაში, ფლორიან ზელინსკი - XIX საუკუნეში კავკასიაში გადასახლებული პოლონელი შეთქმულნი, ევროკავშირის შექმნის სათავეებთან ქართველებიც იდგნენ და სხვ.

ბათუმის შოთა რუსთაველის სახელმწიფო უნივერსიტეტში შოთა რუსთაველის „ვეფხისტყაოსნის“ 850 წლის იუბილესადმი მიძღვნილი ღონისძიებები გაიმართა. პროფესორებმა რამაზ ხალვაშმა და შორენა მახაჭაძემ საჯარო ლექცია - „შოთა რუსთაველის „ვეფხისტყაოსანი“ - საქართველოს ერთ-ერთი მთავარი საიდენტიფიკაციო კოდი“ წაიკითხეს, ხოლო ასოცირებულმა პროფესორმა ციური ქათამაძემ მოხსენება - „შოთა რუსთაველი იერუსალიმის ჯვრის მონასტერში“ წარმოადგინა. 6 მაისის პარკში „ვეფხისტყაოსნი“ სტუდენტყებმა და პროფესორ-მასწავლებლემბა საჯაროდ წაიკითხეს ქართულ, ინგლისურ, გერმანულ, ფრანგულ, რუსულ, უკრაინულ, პოლონურ, თურქულ, არაბულ ენებზე. გამოიფინა სტუდენტთა მიერ „ვეფხისტყაოსნის“ თემაზე შესრულებული ნახატები, უნივერსიტეტის ბიბლიოთეკაში დაცული „ვეფხისტყაოსნის“ გამოცემები, ბათუმის შოთა რუსთაველის სახელმწიფო უნივერსიტეტის ატრიბუტიკა რუსთაველის ლოგოთი, სტუდენტთა და პროფესორ-მასწავლებელთა ხელით შესრულებული კალიგრაფიული ნიმუშები (სტროფები „ვეფხისტყაოსნიდან“) და მოეწყო აქცია -„დავამზადოთ და ვატაროთ კოკარდები“.

საქართველოს დამოუკიდებლობის აღდგენის დღე ბათუმის შოთა რუსთაველის სახელმწიფო უნივერსიტეტში ორდღიანი ღონისძიებების ციკლით საზეიმოდ აღინიშნა. 25 მაისს ბსუ-ს პირველი კორპუსის ფოიეში 26 მაისისადმი მიძღვნილი ვიდეორგოლის ჩვენება შედგა და ამ ისტორიული მოვლენების ამსახველი ფოტომასალის გამოფენა გაიხსნა. ინტელექტუალური თამაშის „ბრძოლა საქართველოს სახელმწიფოებრივი დამოუკიდებლობის აღდგენისათვის - 1918 წლის 26 მაისი და მისი ალტერნატიული ისტორია“ დასრულების შემდეგ, უნივერსიტეტის ეზოში შეკრება ჩატარდა. სტუდენტებისა და პროფესორ-მასწავლებლების მონაწილეობით საქართველოს დამოუკიდებლობის აქტის მიღების იმიტაცია გაიმართა, საქართველოს ჰიმნი აჟღერდა, დროშა აღიმართა და ინტელექტუალური თამაშის გამარჯვებულები დაჯილდოვდნენ. 26 მაისს ბსუ-ში საქართველოს დამოუკიდებლობის დღისადმი მიძღვნილი პროფესორ-მასწავლებელთა დისკუსია შედგა ქვეყნის დამოუკიდებლობის მოპოვების ისტორიულ-სამართლებრივ ასპექტებზე.