ახალი ამბები

ბათუმის შოთა რუსთაველის სახელმწიფო უნივერსიტეტის 2017 წლის მიზნობრივი სამეცნიერო-კვლევითი პროექტის შესარჩევ კონკურსში გამარჯვება სამმა სამეცნიერო პროექტმა მოიპოვა. უმაღლესი საგანმანათლებლო დაწესებულების დაფინანსებით სოციალური მეცნიერებების მიმართულებით პროფესორ მურმან გორგოშაძის ხელმძღვანელობით პროექტი „აჭარის ავტონომიურ რესპუბლიკაში საჯარო ინფორმირებისთვის სახელმწიფო ენის გამოყენების პრაქტიკის კვლევა” განხორციელდება, ჰუმანიტარული მეცნიერებების მიმართულებით ისტორიის დოქტორ ნუგზარ ზოსიძის ხელმძღვანელობით პროექტი „ბათუმი 1917-1920 წლებში (პ. მასლოვის მოგონებების მიხედვით)“, ხოლო ინტერდისციპლინური კვლევების მიმართულებით ასოცირებულ პროფესორ მაია ვანიძის ხელმძღვანელობით - „აჭარაში ინტროდუცირებული და ზოგიერთი ენდემური მცენარეების ნაყოფის გადამუშავების დროს ბიოაქტიური ნაერთების ცვლილებები“.

საქართველოს კულტურისა და ძეგლთა დაცვის სამინისტროს პროექტი „გადაწერე ვეფხისტყაოსანი“ ბათუმის შოთა რუსთაველის სახელმწიფო უნივერსიტეტში გაიმართა. 21-ე საუკუნის ხელნაწერი „ვეფხისტყაოსნის“ შექმნაში მონაწილეობა ბსუ-ს რექტორმა მერაბ ხალვაშმა, რექტორის მოადგილეებმა, სტუდენტებმა, პროფესორ-მასწავლებლებმა და ადმინისტრაციის თანამშრომლებმა მიიღეს. პოემის ერთი სტროფის გადაწერა ნებისმიერ მსურველს შეეძლო.

ტალანტების მოზიდვისა და განვითარების პროგრამა - InPort-ის წარდგინება გაიმართა ბათუმის შოთა რუსთაველის სახელმწიფო უნივერსიტეტში. დამამთავრებელი კურსის სტუდენტებს შესაძლებლობა ეძლევათ ანაზღაურებადი ხუთთვიანი სტაჟირება გაიარონ ფოთის საზღვაო ნავსადგურში. პროექტის მიზანია ფუნქციური ცოდნის, სწორი მიდგომების, სიახლეების ათვისების უნარისა და პოტენციალის მქონე ტალანტების მოზიდვა და განვითარება. ინტენსიური და მრავალმხრივი განვითარების პროგრამა მოიცავს პრაქტიკულ დავალებებს, დისკუსიებს, გუნდურ სამუშაოებს და სამუშაო ადგილზე სწავლებას ფოთის საზღვაო ნავსადგურში.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტები 22-23 მაისს, სასტუმრო „ეიფორიაში’’ გამართულ საერთაშორისო ბიზნეს ფორუმში (IBF Batumi ) ღებულობენ მონაწილეობას. ფორუმზე 6 მსოფლიო კლასის სპიკერი: იერლუიჯა კოლინა, დანანჯაია ჰეტიარაჩი, შონ ფიცპატრიკი, კევინ გასკელი, მარშალ გილდსმიტი და ჯონ კინგი 14 ქვეყნის წარმომადგენლებს თავიანთ გამოცდილებას გაუზიარებენ. შეხვედრის ფარგლებში დაგეგმილია ვორქშოპები და მასტერკლასები.

ბათუმის შოთა რუსთაველის სახელმწიფო უნივერსიტეტის რექტორის მოადგილე, პროფესორი ნათია წიკლაშვილი ერასმუს+ის ფარგლებში, 15-19 მაისს, პოლონეთში, ვროცლავის უმაღლეს საფინანსო სკოლაში იმყოფებოდა საერთაშორისო პერსონალის კვირეულში მონაწილეობის მისაღებად. ამერიკელ, ხორვატ, რუმინელ, თურქ, მექსიკელ და პოლონელ კოლეგებთან გამართულ შეხვედრებზე ერთობლივი პროექტების განხორციელება დაიგეგმა. პროფესორმა ნათია წიკლაშვილმა ასევე ლექციების ციკლი ჩაატარა თემაზე: „საქართველოს შრომის ბაზარი: პრობლემები და გამოწვევები“.