თურქეთის რესპუბლიკის რეჯეფ ტაიფ ერდოღანის სახელობის რიზეს უნივერსიტეტის საბუნებისმეტყველო და საზოგადოებრივ მეცნიერებათა ფაკულტეტის ქართული ენისა და ლიტერატურის განყოფილებაში რუსთაველის სახელობის კაბინეტი გაიხსნა. ღონისძიებაში მონაწილეობა მიიღო ნიკო ბერძენიშვილის ინსტიტუტის დირექტორმა როინ მალაყმაძემ და კაბინეტს ინსტიტუტის უახლესი გამოცემები უსახსოვრა. ვიზიტის ფარგლებში სამომავლო სამეცნიერო და აკადემიური თანამშრომლობის თაობაზე შეხვედრები გაიმართა უნივერსიტეტის რექტორის მოადგილესთან და ფაკულტეტის დეკანთან. უნივერსიტეტის ჰუმანიტარულ მეცნიერებათა ფაკულტეტის ქართული ენისა და ლიტერატურის სასწავლო პროგრამას, რომელიც 2016 წლიდან ფუნქციონირებს ქალაქ ტრაპიზონში საქართველოს გენერალური საკონსულოს მხარდაჭერითა და ჩართულობით, 2023 წლის 24 თებერვალს, FEDEK-ის ხუთწლიანი აკრედიტაცია მიენიჭა.

ნიკო ბერძენიშვილის ინსტიტუტისა და აჭარის მწერალთა სახლის ორგანიზებით, ცნობილი მთარგმნელისა და საზოგადო მოღვაწის იბრაიმ გორაძისადმი მიძღვნილი შეხვედრა გაიმართა. შეხვედრის მიზანი აკადემიური წრეებისა და ფართო საზოგადოებისათვის იბრაიმ გორაძის საქმიანობისა და მოღვაწეობის გაცნობა იყო. ნიკო ბერძენიშვილის ინსტიტუტის ეგიდით მზადდება შესაბამისი მონოგრაფიაც, რომელიც უახლოეს მომავალში გამოიცემა. ღონისძიება მეცნიერების საერთაშორისო დღის ფარგლებში გაიმართა.

მეცნიერების საერთაშორისო დღესთან დაკავშირებით, ნიკო ბერძენიშვილის ინსტიტუტის მკვლევრებმა შეხვედრა გამართეს სამცხე-ჯავახეთის სახელმწიფო უნივერსიტეტში, რომლის ფარგლებშიც აკადემიურ პერსონალს და სტუდენტებს ინსტიტუტის სამეცნიერო საქმიანობის, უახლესი გამოცემებისა და სამომავლო გეგმების შესახებ ესაუბრნენ. ასევე გაიმართა წიგნის - „წერილები სტამბოლის ქართული სავანიდან” მეორე ტომის პრეზენტაცია. ვიზიტის ფარგლებში, მკვლევრებმა ზაზაძეების საგვარეულო სოფელი უდე, იქ მცხოვრები ადგილობრივები მოინახულეს და მოიძიეს საისტორიო ხასიათის ინფორმაცია და ფოტო-მასალა, რომელიც შეტანილი იქნება წიგნის „წერილები სტამბოლის ქართული სავანიდან” მესამე ტომში.

ბსუ-ს ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარმა მეცნიერ თანამშრომელმა ნარგიზ ახვლედიანმა და ზუსტ მეცნიერებათა და განათლების ფაკულტეტის ასისტენტ პროფესორმა დიანა ახვლედიანმა მონაწილეობა მიიღეს ვენაში გამართულ საერთაშორისო სამეცნიერო კონფერენციაში. მკვლევრებმა სესიაზე გერმანულ და ინგლისურ ენებზე წარადგინეს ზეპირი სტენდური მოხსენება თემაზე: „დასავლეთ-საქართველოს ერთი ზანური ჰიდრონიმის ლინგვო-ისტორიული კვლევისათვის" (სტატიის თანაავტორები: ნიკო ბერძენიშვილის ინსტიტუტის ისტორიისა და არქეოლოგიის განყოფილების უფროსი მეცნიეთანამშრომელი ოლეგ ჯიბაშვილი და თბილისის ივანე ჯავახიშვილის სახელობის სახელმწიფო უნივერსიტეტის ფსიქოლოგიისა და განათლების პროგრამის ბაკალავრი და შრომისა და ორგანიზაციის სამაგისტრო პროგრამის სტუდენტი ნინაკა კაშია). კონფერენციაზე დაისახა შემდგომი თანამშრომლობის პერსპექტივები.

27-28 ოქტომბერს, ბსუ-ს ნიკო ბერძენიშვილის ინსტიტუტის დირექტორმა, ისტორიის დოქტორმა როინ მალაყმაძემ და ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უფროსმა, ფილოლოგიის დოქტორმა ელზა ფუტკარაძემ მონაწილეობა მიიღეს დუზჯეს უნივერსიტეტის საერთაშორისო სიმპოზიუმში. სიმპოზიუმი ეძღვნებოდა დუზჯეს უნივერსიტეტის კავკასიოლოგიის განყოფილების ქართული ენისა და ლიტერატურის მიმართულების ათი წლისა და დუზჯეს ქართული კულტურის ასოციაციის 25 წლის იუბილეს. სიმპოზიუმზე მონაწილეებმა წარადგინეს მოხსენება თემაზე: „სამშობლოს სიყვარული გამიჭირდა“ (იბრაიმ გორაძის ცხოვრება-მოღვაწეობის ეპიზოდები).