ბსუ-ს ეკონომიკისა და ბიზნესის ფაკულტეტის პროფესორ-მასწავლებლებმა მონაწილეობა მიიღეს 3 -7 ივლისს, ბულგარეთში, ქალაქ ბურგასში გამართულ მე-7 საერთაშორისო სამეცნიერო კონფერენციაში „უკრაინა, ბულგარეთი, ევროკავშირი: მეცნიერების, ტექნოლოგიების და ინოვაციების განვითარების თანამედროვე ტენდენციები“. ასოცირებულმა პროფესორმა რამინ ცინარიძემ მოხსენება წარადგინა თემაზე: „ქვეყნის საინვესტიციო შესაძლებლობანი და რეგიონალური საინვესტიციო მიმზიდველობა“, მოწვეულმა უფროსმა მასწავლებელმა ლაშა ბერიძემ - „საფინანსო ორგანიზაციების როლი პირდაპირი უცხოური ინვესტიციების სტიმულირებაში“, დოქტორანტმა გიორგი რიჟვაძემ - „საქართველოს საინვესტიციო კლიმატის ანალიზი“, დოქტორანტმა ალეკო მელაძემ კი - „ქვეყნის საინვესტიციო გარემო და მისი გაუმჯობესების ინოვაციური სტრატეგიები“.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ასოცირებულმა პროფესორმა ბესიკ ბოლქვაძემ საჯარო ლექცია ჩაატარა თემაზე: „საინვესტიციო პოლიტიკა საქართველოში (პრაქტიკის პრიზმით დანახული რეალობა)’’. საჯარო ლექციაზე მომხსენებელმა განიხილა საქართველოს საინვესტიციო გარემო და ტრენდები, მსმენელებს გაუზიარა სახელმწიფოსა და ინვესტორთა ურთიერთობის შესახებ საკუთარი გამოცდილება და უპასუხა აუდიტორიის მიერ დასმულ შეკითხვებს. საჯარო ლექციას ესწრებოდნენ ეკონიმიკისა და ბიზნესის ფაკულტეტის პროფესორ-მასწავლებლები და სტუდენტები, რომლებიც ძირითადად სახელმწიფოს მიერ გატარებული საინვესტიციო პოლიტიკის პრაქტიკული იმპლემენტაციის საკითხებით დაინტერესდნენ.

ვროცლავის ეკონომიკისა და ბიზნესის უნივერსიტეტი ბსუ-ს ეკონომიისა და ბიზნესის ფაკულტეტის სტუდენტებს სთავაზობს საზაფხულო სკოლაში მონაწილეობას. საზაფხულო სკოლა 28 ივნისიდან 7 ივლისამდე გაიმართება ვროცლავში, პოლონეთში. საზაფხულო სკოლა მოიცავს 86 საკონტაქტო საათს ყოველდღიური შეხვედრების ფორმით, ლექციებს ვორქშოპებს, ბიზნეს სიმულაციურ თამაშებს და სხვა. სტუდენტებს შესაძლებლობა აქვთ მოიპოვონ 6 კრედიტი. პროგრამის ფარგლებში დაგეგმილია კულტურული და სოციალური აქტივობები.

8 ივნისს, 13:00 საათზე, ბათუმის შოთა რუსთველის სახელმწიფო უნივერსიტეტში, 423-ე აუდიტორიაში ბსუ-ს ეკონომიკისა და ბიზნესის ფაკულტეტის ასოცირებული პროფესორი ბესიკ ბოლქვაძე ჩაატარებს საჯარო ლექციას თემაზე: „საინვესტიციო პოლიტიკა საქართველოში (პრაქტიკის პრიზმით დანახული რეალობა)’’. ლექციაში განხილული იქნება: სახელმწიფოს საინვესტიციო პოლიტიკის ტრენდები; საინვესტიციო სტატისტიკის, საინვესტიციო მარკეტინგისა და საინვესტიციო ციკლის მართვის თავისებურებები; სახელმწიფოსა და ინვესტორს შორის ურთიერთობის ცალკეული ასპექტები; სახელმწიფო-კერძო პარტნიორობის საინვესტიციო მოდელები; ინვესტორთა „პორტრეტი’’ და სხვა აქტუალური საკითხები. საჯარო ლექციაზე დასწრება თავისუფალია.

აჭარის უმაღლესი საბჭოს თავმჯდომარის მოადგილე ტიტე აროშიძე ბსუ-ს ეკონომიკისა და ბიზნესის ფაკულტეტის სტუდენტებს შეხვდა. „დეპუტატის საათის“ ფორმატში გამართულ შეხვედრაზე ტიტე აროშიძემ ისაუბრა ქვეყნისა და რეგიონის მასშტაბით ბიუჯეტის ფორმირების, საბიუჯეტო მოწყობისა და პროცედურების საკითხებზე, ასევე ყურადღება გაამახვილა აჭარის საკანონმდებლო ორგანოში ამ მიმართულებით მიმდინარე პროცესებზე, საკანონმდებლო საქმიანობაში მოქალაქეთა ჩართულობის ხელშემწყობ სერვისებსა და სიახლეებზე. ტიტე აროშიძემ ახალგაზრდებს წარუდგინა ვებპლატფორმა chaerte.sca.ge. ახალი ონლაინპლატფორმა მოქალაქეებს შესაძლებლობას აძლევს, სახლიდან გაუსვლელად ჩანიშნონ შეხვედრები უმაღლესი საბჭოს წევრებთან, გამოთქვან საკუთარი მოსაზრებები ამა თუ იმ კანონის პროექტზე, შეიტანონ პეტიცია და დაესწრონ სხდომას.