საქართველოს ეკონომიკისა და მდგრადი განვითარების სამინისტროს ენერგეტიკული პოლიტიკისა და საინვესტიციო პროექტების დეპარტამენტის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს ანაზღაურებადი სტაჟირების პროგრამა წარუდგინეს. საქართველოს ენერგეტიკულ საწარმოებში ანაზღაურებად სტაჟირებას მაღალი აკადემიური მოსწრების მქონე სტუდენტები სამინისტროსთან გაფორმებული თანამშრომლობის მემორანდუმის ფარგლებში გაივლიან. პროგრამით სარგებლობა არა მხოლოდ ენერგეტიკული მიმართულების, არამედ სხვადასხვა ფაკულტეტის სტუდენტებს შეუძლიათ.

ბსუ-ში ეკონომიკისა და ბიზნესის ფაკულტეტის ბიზნესის ადმინისტრირების კლასტერში წარმოდგენილი ახალი და მოქმედი სააკრედიტაციო პროგრამების წარდგენა გაიმართა. პრეზენტაციას ესწრებოდნენ აჭარის ა.რ. საკანონმდებლო და აღმასრულებელი ხელისუფლების, ქალაქ ბათუმის საკრებულოს წევრები, ცალკეულ საფინანსო-ეკონომიკური დეპარტამენტების, ქალაქ ბათუმის მერიის, ბიზნესის სექტორისა და არასამთავრობო ორგანიზაციის წარმომადგენლები, აჭარის ავტონომიური რესპუბლიკის სავაჭრო-სამრეწველო პალატის დირექტირი, ბიზნეს-ინკუბატორის ხელმძღვანელი, სხვადასხვა უმაღლესი საგანმანთლებლო დაწესებულების აკადემიური პერსონალი, ეკონომიკისა და ბიზნესის ფაკულტეტის საბაკალავრო, სამაგისტრო და სადოქტორო პროგრამების კურსდამთავრებულები.

ბათუმის შოთა რუსთაველის სახელმწიფო უნივერსიტეტის სტუდენტის, დავით გახოკიას საპროექტო გუნდთან ერთად შექმნილი სტარტაპ პროექტი “Foodly” GITA-ს 25000-ლარიანი გრანტის მფლობელი გახდა. Foodly-ი www.foodly.space რესტორნების რეზერვაციის მობილური აპლიკაციაა, რომელიც მომხმარებლებს შესაძლებლობას აძლევს, ერთ სივრცეში მარტივად აღმოაჩინონ და დაათვალიერონ სარესტორნო სივრცეები, დაჯავშნონ მაგიდა, შეუკვეთონ მენიუ და გადაიხადონ საფასური. ხოლო ბიზნესისთვის ეს არის შესაძლებლობა, მოიზიდონ დამატებითი მომხმარებლები ციფრულ სამყაროში გაზრდილი ხილვადობითა და მოქნილი რეზერვაციის პროცესის შეთავაზებით.

ეკონომიკისა და ბიზნესის ფაკულტეტის ორგანიზებით გაიმართა ყოველწლიური სტუდენტთა და მოსწავლეთა ერთობლივი კონფერენცია თემაზე: „ქართული ბიზნესი - გამოწვევები და პერსპექტივები”. კონფერენცია მისასალმებელი სიტყვით გახსნა და კონფერენციის მნიშვნელობაზე ისაუბრა ეკონომიკის და და ბიზნესის ფაკულტეტის დეკანმა, პროფესორმა ნათია წიკლაშვილმა. კონფერენციაში მეორე წელია აქტიურად მონაწილეობენ ფაკულტეტის პირველკურსელები (ხელმძღვანელი ასისტენტ პროფესორი ლეილა ცეცხლაძე) და ბათუმის წმ. ანდრია პირველწოდებულის სახეხელობის სკოლის X კლასის მოსწავლეები, რომლებიც სასწავლო გეგმის ფარგლებში სწავლობენ მეწარმეობას (ხელმძღვანელი ასოცირებული პროფესორი ირინა თავაძე).

კომპანია „ქართული ჰოლდინგის“ წარმომადგენლებმა ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებისათვის შეხვედრა გამართეს. შეხვედრაზე ახალგაზრდები გაეცნენ „ქართულ ჰოლდინგში“ შემავალ ორ ქართულ და ერთ საერთაშორისო კომპანიის (საერთაშორისო გადაზიდვები, სამშენებლო კომპანია, საშუამავლო კომპანია ჩინეთ-საქართველოს შორის) ვაკანსიებს ლოგისტიკის, გაყიდვების ან/და შესყიდვების მენეჯერის პოზიციებზე, სტუდენტზე ორიენტირებული ორთვიან ანაზღაურებადი სტაჟირების პროგრამას. სტაჟირების შემდეგ, ქართული ჰოლდინგი თანამშრომლებს სთავაზობს განვითარებასა და წარმატებაზე ორიენტირებულ გარემოში მუშაობას. შეხვედრაზე დაიგეგმა სამომავლო თანამშრომლობა.