დღეს, ბათუმის შოთა რუსთაველის სახელმწიფო უნივერსიტეტში საქართველოს მთავარმა პროკურატურამ „ადგილობრივი საბჭოების“ ფარგლებში იურიდიული ფაკულტეტების სტუდენტებთან შეხვედრა გამართა. ღონისძიებაზე სისხლისსამართლებრივი პასუხისმგებლობის დაკისრების პრობლემებზე, ოჯახური ძალადობისა და თექვსმეტი წლის მიუღწეველ პირთან სქესობრივი კავშირის დამყარების პრობლემებზე ისაუბრეს. პროკურატურის წარმომადგენლებმა „ადგილობრივი საბჭოების“ შექმნის აუცილობლობაზე იმსჯელეს, რომელიც ხელს შეუწყობს მოსახლეობის ჩართულობას დანაშაულთან ბრძოლის პროცესში.

იურიდიული ფაკულტეტის დეკანი მიმდინარე წლის 18-22 აპრილს მივლინებით იმყოფებოდა ავსტრიის ქალაქ გრაცში, სადაც Erasmus +; Lifelong Learning Programme; Jean Monnet Activities "Policy debate with academic world" project : “Network for Developing the European Studies in Caucasus” (Hereinafter, DESCNet), Reference: 565086-EPP-1-2015-1-EE-EPPJMO-NETWORK; საგრანტო პროგრამის ფარგლებში გაიმართა ახალგაზრდა მკვლევარების სემინარი, რომელშიც ფაკულტეტის დეკანის გარდა ჩვენი უნივერსიტეტიდან მონაწილეობა მიიღეს იურიდიული ფაკულტეტის ასისტენტ პროფესორმა არმაზ კახიძემ და ეკონომიკისა და ბიზნესის ფაკულტეტის ასისტენტ პროფესორმა ნინო კონცელიძემ. ამ ღონისძიების ფარგლებში დეკანმა ადამ მახარაძემ შეხვედრა გამართა გრაცის კარლ-ფრანცის სახელობის იურიდიული ფაკულტეტის დეკანთან ჯოზეფ მარკოსთან, სადაც განხილული იქნა სამომავლო თანამშრომლობის პერსპექტივები.

2016 წლის 20 აპრილს, ბათუმის შოთა რუსთაველის სახელმწიფო უნივერსიტეტის იურიდიულ ფაკულტეტს ბიალისტოკის უნივერსიტეტის იურიდიული ფაკულტეტის ასოცირებული პროფესორები ანდრეჯ ჯაკიევიჩი და არტურ ოლეჩნო სტუმრობდნენ. ვიზიტის ფარგლებში შეხვედრა გაიმართა ფაკულტეტის ხელმძღვანელობასთან და სტუდენტებთან. შეხვედრაზე განიხილეს ფაკულტეტებს შორის სასწავლო და კვლევით სფეროებში თანამშრომლობის პერსპექტივები. პოლონელმა პროფესორებმა საჯარო ლექცია გამართეს პოლონეთის კონსტიტუციური სისტემის, საკონსტიტუციო ცვლილებების, საკონსტიტუციო სასამართლოს საქმიანობაში არსებული პრობლემების და პოლონეთში მიმდინარე პოლიტიკური პროცესების შესახებ. შეხვედრის დროს გაიმართა დისკუსია და სტუდენტებმა მათთვის საინტერესო კითხვებზე მიიღეს პასუხები.

21 აპრილს, იურიდიულ ფაკულტეტზე რეფერატულ ნაშრომთა კონკურსი გაიმართა. კუნკურსში მონაწილეობას ღებულობდა იურიდიული ფაკულტეტის სამართალმცოდნეობის სპეციალობის 8 პირველკურსელი. გამოვლინდა პირველი, მეორე და მესამე ადგილის მფლობელბი. პირველი ადგილი ერგო ნინო ბასილაძეს თემისთვის „საკმარისია სქესის სამართლებრივი რეგულირებისას მხოლოდ გარეგნული ნიშნით ხელმძღვანელობა?!“ (მეცნ. ხელ-ი პროფ. მურმან გორგოშაძე), მეორე ადგილზე გავიდა მარიამ სიხარულიძე, თემით - „კოსოვოს საკითხი საერთაშორისო პოლიტიკაში XX-XXІ სს. მიჯნაზე“ (მეცნ. ხელ-ი ასოც. პროფ. ირაკლი გორგილაძე), მესამე ადგილი დაიკავა ქრისტინე გურგენიძის თემამ სათაურით „კონტრასიგნაციის ინსტიტუტი’’.

იურიდიული ფაკულტეტის დეკანი მიმდინარე წლის 13-15 აპრილს მივლინებით იმყოფებოდა ჰოლანდიის ქალაქ გრონინგენში, სადაც გაიმართა ევროპის იურიდიული ფაკულტეტების ასოციაციის კონფერენცია, რომლის წევრიც არის ჩვენი ფაკულტეტი 2015 წლიდან. კონფერენციაზე განხილული იქნა სამართლის სწავლებისა და მეცნიერული თვალსაზრისით არაერთი აქტუალური საკითხი. გაიმართა შეხვედრები ევროპისა და ამერიკის შეერთებული შტატების სხვადასხვა უნივერსიტეტის წარმომადგენლებთან. დაიგეგმა ურთიერთთანამშრომლობის მემორანდუმების გაფორმება. არაერთმა უნივერსიტეტმა გამოთქვა სურვილი სტუდენტთა გაცვლითი პროგრამების ამოქმედების შესახებ.