ქალაქ ბათუმის მერიის, საკრებულოსა და არასამთავრობო ორგანიზაცია „პროგრესის“ მიერ ორგანიზებულ სტაჟირების პროგრამაში მონაწილეობა მიიღო იურიდიული ფაკულტეტის I და II კურსების სტუდენტებისაგან დაკომპლექტებულმა გუნდმა. სალომე კარალიძემ, მარიამ ორაგველიძემ, ნიკა ცეცხლაძემ, გურანდა ჭანიძემ, დიანა მამუჭაძემ გუნდის ხელმძღვანელებთან - ლევან კინწურაშვილთან და პაატა შარაძესთან ერთად ორთვიანი აქტიური მუშაობის შემდეგ მოამზადა და საკრებულოს წარუდგინა პროექტი „მომავლის განათება“. დეპუტატების ხმათა უმრავლესობით პროექტმა გაიმარჯვა და საკრებულოს თავმჯდომარემ ირაკლი ჭეიშვილმა კონკურსის მონაწილეები დიპლომებით დააჯილდოვა. ბათუმის შოთა რუსთაველის სახელწმიფო უნივერსიტეტი სტუდენტებს ულოცავს წარმატებას და უსურვებთ წარმატებებს.

ბათუმის შოთა რუსთაველის უნივერსიტეტის პირველი კურსის სტუდენტმა დავით ბერიძემ წარმატებულად იასპარეზა თბილისის თასის ღია პირველობაში ძალისმიერ სამჭიდში და 82.5 კილოგრამიან წონით კატეგორიაში ოქროს მედალი მოიპოვა. შეჯიბრი ძალისმიერი სპორტის საერთაშორისო გაერთიანების საქართველოს პაუერლიფრტინგის ეროვნული ფედერაციისა და საქართველოს ძალისმიერი ორჭიდის ფედერაციის საერთო პროექტის ფარგლებში ჩატარდა და მასში 40-მდე სპორტსმენი მონაწილეობდა. დავით ბერიძემ პირველი ადგილი მოიპოვა ასევე მიმდინარე წლის ზაფხულში, ბათუმში გამართულ შავი ზღვის ქვეყნების ღია თასის პირველობაზე, სადაც პირველობისათვის 15-მდე ქვეყნის 200-მდე ძალოსანი იბრძოდა. ახალგაზრდა სპორტსმენი 2015 წლის 19-20 დეკემბერს, ქალაქ სტამბულში ბოსფორის თასისა და 2016 წლის 18-19 იანვარს ქალაქ დუბაიში მსოფლიო თასისათვის იბრძოლებს. უნივერსიტეტი ულოცავს დავით ბერიძეს გამარჯვებას და უსურვებს წარმატებებს.

საქართველოს ახალგაზრდა იურისტთა ასოციაციისა და ცენტრალურ საარჩევნო კომისიის წარმომადგენლები „ახალი თაობის ხედვის“ პროექტის ფარგლებში ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებს შეხვდნენ. ღონისძიების მიზანი იყო საზოგადოებრივ-პოლიტიკურ ცხოვრებასა და საარჩევნო პროცესებში ახალგაზრდების ჩართულობის გააქტიურება და საარჩევნო თემატიკის პოპულარიზაცია. შეხვედრა კითხვა-პასუხის რეჟიმში წარიმართა და ორგანიზაციების წარმომადგენლებმა სტუდენტების აქტუალურ შეკითხვებს უპასუხეს.

ნოტარიუსთა საკვალიფიკაციო გამოცდის წარდგინება გაიმართა ბათუმის შოთა რუსთაველის სახელმწიფო უნივერსიტეტში. იურიდიული ფაკულტეტის მაგისტრანტებს საქართველოს ნოტარიუსთა პალატის გამგეობის წევრმა ხათუნა კალანდარიშვილმა გამოცდის ჩატარების პირობები და არსებული სიახლეები გააცნო. საბუთების მიღება 8 ნოემბრამდე გაგრძელდება და მომავალმა ნოტარიუსებმა გამოცდა ორ ეტაპად, ტესტირების ფორმით, ზოგად უნარ-ჩვევებსა და პროფესიულ ნაწილში უნდა ჩააბარონ.

ბათუმის საქალაქო სასამართლოს თავმჯდომარემ დავით მამისეიშვილმა იურიდიული ფაკულტეტის სტუდენტებისთვის საჯარო ლექცია წაიკითხა თემაზე: „ნაფიც მსაჯულთა ინსტიტუტი“. მომხსენებელმა მომავალ სამართალმცოდნეებს ნაფიც მსაჯულთა ინსტიტუტის მნიშვნელობაზე ესაუბრა, გამოცდილება გაუზიარა და გატარებულ რეფორმებთან ერთად, არსებული სიახლეები გააცნო. ღონისძიების ფარგლებში იუსტიციის უმაღლესი სკოლის დირექტორმა ლაშა მაღრაძემ სტუდენტებსა და პროფესორ-მასწავლებლებს უმაღლესი საგანმანათლებლო დაწესებულების 80 წლის იუბილე მიულოცა და უნივერსიტეტის რექტორის მოვალეობის შემსრულებელს მერაბ ხალვაშს სამახსოვრო საჩუქარი გადასცა.