ბათუმის შოთა რუსთაველის სახელმწიფო უნივერსიტეტში გაიმართა შეხვედრა საქართველოს ახალგაზრდობის წარმომადგენელთან გაეროში გიორგი ტუმასიანთან.

იურიდიული ფაკულტეტის სტუდენტებს საჯარო ლექცია წაუკითხეს საქართველოს მთავარი პროკურატურის ადამიანის უფლებათა დაცვის სამმართველოს უფროსმა ქალბატონმა სალომე შენგელიამ და ნაფიც მსაჯულთა სასამართლოს განსახილველ საქმეებზე სახელმწიფო ბრალდების ეფექტიანი მხარდაჭერის უზრუნველყოფის სამმართველოს უფროსმა ქალბატონმა ნინო აღლემაშვილმა. მომავალი სამართალდამცველები ლექციაზე ტრეფიკინგსა და ნაფიც მსაჯულთა ინსტიტუტის აქტუალურ საკითხებს გაეცნენ და პრაქტიკაში არსებულ პრობლემებზე იმსჯელეს.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტური თვითმართველობის ორგანიზებით ტურნირი „რა? სად? როდის?“ ჩატარდა. ინტელექტუალურ თამაშში მონაწილეობას სამართალმცოდნეობის საგანმანათლებლო პროგრამის სტუდენტებისაგან დაკომპლექტებული 10 გუნდი იღებდა. დასმული შეკითხვები იურისპრუდენციას მოიცავდა, რამაც სტუდენტებს შესაძლებლობა მისცა, განესაზღვრათ აკადემიური ხარისხი მომავალი პროფესიის მიმართულებით. ტურნირში გამარჯვებულ გუნდებს საჩუქრად იურიდიული ლიტერატურა და სერტიფიკატები გადაეცათ.

თავისუფალ ჟურნალისტთა სახლისა და ევროპის იურისტ სტუდენტთა ასოციაციის ბათუმის (ELSA BATUMI) ორგანიზებით გაიმართა დისკუსია თემაზე: ადამიანის უფლებათა საერთაშორისო დაცვის გარანტიები, ხელმისაწვდომობა და ეფექტურობა.
დისკუსია მიეძღვნა ელსას დღეს, რომელიც ემსახურება ადამიანის უფლებებისა და თავისუფლებების შესახებ ცნობიერების ამაღლებას. დისკუსიას უძღვებოდა ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის მოწვეული მასწავლებელი ნიკოლოზ მეგრელიშვილი. ღონისძიებას სხვადასხვა უმაღლესი საგანმანათლებლო დაწესებულების სტუდენტები ესწრებოდნენ.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სამართალმცოდნეობის საბაკალავრო საგანმანათლებლო პროგრამის მეოთხე სასწავლო წლის სტუდენტებმა: ილონა დიასამიძემ, თამუნა ხიმშიაშვილმა, ნინო გობაძემ და ნიკა სვანიძემ უნივერსიტეტის სახელით მონაწილეობა მიიღეს TSU National Center for ADR-ის მიერ ორგანიზებულ იმიტირებულ ხუთდღიან სასამართლო პროცესში. სტუდენტებს საშუალება მიეცათ, გაეღრმავებინათ ცოდნა მედიაციაში და დაუფლებოდნენ მოლაპარაკების ხელოვნებას. პროექტის დასასრულს, სტუდენტებს სერტიფიკატები და სამახსოვრო საჩუქრები გადაეცათ.