ბათუმის შოთა რუსთაველის სახელმწიფო უნივერსიტეტში ჩრდილოეთ ტეხასის უნივერსიტეტის პედაგოგიკის დოქტორის რ. ჯეფერსონ ჯორჯის ტრენინგი გაიმართა. სწავლება პედაგოგიკის საკითხებსა და სწავლების ფილოსოფიას შეეხებოდა და მასში ბსუ-ს 9 ფაკულტეტის 30-მდე წარმომადგენელი მონაწილეობდა.
მაგდებურგის უნივერსიტეტმა ბათუმის შოთა რუსთაველის სახელმწიფო უნივერსიტეტსა და საქართველოს ტექნიკურ უნივერსიტეტთან თანამშრომლობის მემორანდუმი გააფორმა. ხელშეკრულება სხვა მნიშვნელოვან ასპექტებთან ერთად, პროფესიული განათლების მასწავლებელთა მოსამზადებელი ორმხრივი პროგრამის შექმნას გულისხმობს. მემორანდუმის ფარგლებში, მომზადდება ერთობლივი პროფესიული განათლების მასწავლებლების მოსამზადებელი პედაგოგიკის კურსი, შესაძლებელი გახდება, აგრეთვე, მსურველთათვის პროფესიული განათლების ადმინისტრირებისა და მართვის ორმხრივი სამაგისტრო პროგრამის შეთავაზება, რომლის ფარგლებშიც სტუდენტები მაგისტრატურის ერთ ნაწილს გერმანიაში, ხოლო მეორე ნაწილს საქართველოში გაივლიან.
ბათუმის შოთა რუსთაველის სახელმწიფო უნივერსიტეტის რექტორის მოადგილე სამეცნიერო დარგში, პროფესორი ნათია წიკლაშვილი, განათლების ფაკულტეტის დეკანი, ასოცირებული პროფესორი მადონა მიქელაძე, ფიზიკა-მათემატიკისა და კომპიუტერულ მეცნიერებათა ფაკულტეტის დეკანი, ასოცირებული პროფესორი გულადი ფარტენაძე ოფიციალური ვიზიტით ტალინის სახელმწიფო უნივერსიტეტში იმყოფებოდნენ. ვიზიტი ორ უნივერსიტეტს შორის გაფორმებული თანამშრომლობის მემორანდუმის საფუძველზე დაიგეგმა.
ბათუმის შოთა რუსთაველის სახელმწიფო უნივერსიტეტის თანამშრომლობის კლუბის,“სკოლა-უნივერსიტეტი“ ფარგლებში IV სამეცნიერო კონფერენცია გაიმართა თემაზე: „სწავლებისა და აღზრდის აქტუალური პრობლემები“. სესიაში სტუდენტებთან ერთად, აჭარის საჯარო და კერძო სკოლების 400-მდე მოსწავლე მონაწილეობდა.
მომხსენებლებმა თემები პედაგოგიკის, განათლების, საბუნებისმეტყველო მეცნიერებების მიმართულებით წარმოადგინეს და ისეთი აქტუალური და მნიშვნელოვანი საკითხები განიხილეს როგორიცაა: თანამედროვე ტექნოლოგიების როლი სწავლა-სწავლების პროცესში, დისტანციური სწავლება, მოზარდთა გენეტიკური დაავადებები, ატმოსფეროს გლობალური გაჭუჭტიანება და ა.შ. კონფერენციის დასასრულს მონაწილეებს სერტიფიკატები გადაეცათ.
