ახალი ამბები

აზერბაიჯანის რესპუბლიკის გენერალური საკონსულოს ინიციატივით შოთა რუსთაველის სახელმწიფო უნივერსიტეტში აზერბაიჯანის დღე აღინიშნა. აზერბაიჯანის საერთო ეროვნული ლიდერის ჰეიდარ ალიევის დაბადების 88 წლისა და აზერბაიჯანის რესპუბლიკის სახელმწიფო დამოუკიდებლობის 20 წლისადმი მიძღვნილ ღონისძიებას აჭარის ავტონომიური რესპუბლიკის თავმჯდომარე ლევან ვარშალომიძე, ქალაქ ბათუმის მერი რობერტ ჩხაიძე, აჭარის განათლებისა და კულტურის მინისტრი გია აბულაძე, აჭარის სოფლის მეურნეობის მინისტრი დონარი სურმანიძე, დიპლომატიური კორპუსის წარმომადგენლები, პროფესორ-მასწავლებლები და სტუდენტები ესწრებოდნენ. აზერბაიჯანის დღე უნივერსიტეტის რექტორმა, პროფესორმა ალიოშა ბაკურიძემ გახსნა. აზერბაიჯანის რესპუბლიკის გენერალურმა კონსულმა ბათუმში ჰუსეინ ნაჯაფოვმა მოხსენება წაიკითხა თემაზე: „აზერბაიჯანი: ისტორია და თანამედროვეობა“ და ორ ქვეყანას შორის არსებულ მეგობრულ ურთიერთობებზე გაამახვილა ყურადღება.

განათლების ხარისხის განვითარების ეროვნული ცენტრის დირექტორი დავით კერესელიძე შოთა რუსთაველის სახელმწიფო უნივერსიტეტში აჭარის უმაღლესი სასწავლებლებისა და ზოგადსაგანმანათლებლო დაწესებულებების წარმომადგენლებს შეხვდა. ცენტრის დირექტორმა დავით კერესელიძემ პროფესორ-მასწავლებლებს ავტორიზაციისა და თვითშეფასების ანგარიშის წარმოდგენასთან დაკავშირებული საკითხები გააცნო. ასევე განიხილა საგანმანათლებლო პროგრამებსა და სილაბუსებში სწავლის შედეგების ასახვის თავისებურებები და აქტუალურ შეკითხვებს უპასუხა.

სტუდენტურმა თვითმმართველობამ წმინდა გიორგის ხსენების დღე და 2004 წლის 6 მაისს განხორციელებული პოლიტიკური ცვლილებები რამდენიმე ღონისძიებით აღნიშნა. „სტუდენტური 6 მაისის“ ეგიდით ახალგაზრდებმა 6 მაისის პარკში კიპარისის ხეები დარგეს და უმაღლეს სასწავლებელში ფოტოგამოფენა მოაწყვეს, სადაც შვიდი წლის წინ განვითარებული მოვლენების ამსახველი ფოტოები იყო წარმოდგენილი. ფოტოგამოფენა სტუდენტებთან ერთად ურეხის ბავშვთა სახლის აღსაზრდელებმაც დაათვალიერეს. სტუდენტური თვითმმართველობის წარმომადგენლები პატარებს სადილითა და ტკბილეულით გაუმასპინძლდნენ.

საერთაშორისო განათლების ცენტრის ორგანიზებით შოთა რუსთაველის სახელმწიფო უნივერსიტეტის სააქტო დარბაზში ევროპული განათლების სისტემისა და საერთაშორისო ორგანიზაციების სწავლებისა და კვლევის განვითარებაზე ორიენტირებული გაცვლითი პროგრამების წარდგინება გაიმართა. უმაღლესი სასწავლებლის სტუდენტებსა და პროფესორ-მასწავლებლებს „ტემპუსის“ ეროვნული ოფისის კოორდინატორმა ლიკა ღლონტმა ევროკავშირის დონორი პროგრამები (ტემპუსი, ერასმუს მუნდუსი, ჟან მონე და მანი კიური) გააცნო, გერმანიის აკადემიური გაცვლის სამსახურის DAAD-ის პროგრამები ქუთაისის ოფისის წარმომადგენელმა დანიელ შეფიმ წარმოადგინა, ხოლო საერთშორისო განათლების ცენტრის პროექტებზე ბათუმის ოფისის ხელმძღვანელმა ნინო ინაიშვილმა ისაუბრა.

ბათუმში გამართულ საერთაშორისო ტურისტულ გამოფენაში ,,ექსპო ბათუმი - 2011” შოთა რუსთაველის სახელმწიფო უნივერსიტეტის ტურიზმის ფაკულტეტი და ტურისტული სააგენტო UNItour-ი მონაწილეობდა. რსუ-ს სასწავლო-საგანმანათლებლო პროგრამებთან ერთად ფაკულტეტმა დამთვალიერებლებს ტურისტული პროდუქტები გააცნო. ,,ექსპო ბათუმი - 2011”-ზე 12 ქვეყნის 150-მდე კომპანია იყო წარმოდგენილი. გამოფენაზე უკრაინის, ლატვიის, პოლონეთის, აზერბაიჯანის და თურქეთის საგანმანათლებლო დაწესებულებებისა და ტურისტული ორგანიზაციების წარმომადგენლებთან შეხვედრისას ტურიზმის ფაკულტეტსა და ტურისტულ სააგენტო UNItour-თან თანამშრომლობა დაიგეგმა.