ახალი ამბები

განათლებისა და მეცნიერებათა ფაკულტეტის ორგანიზებით რსუ-ს პროფესორ-მასწავლებლები, სტუდენტები, მწერლები და საზოგადოების წარმომადგენლები ბათუმის ღვთისმშობლის შობის ტაძრის ეზოში პოეტ ზურაბ გორგილაძის საფლავთან შეიკრიბნენ. პოეტის ხსოვნის უკვდავსაყოფად სტუდენტებმა შემოქმედის გარდაცვალების დღეს პოეზიის საათი მიუძღვნეს. ახალგაზრდებმა პოეტის ცხოვრებასა და შემოქმედებაზე ისაუბრეს, ლექსები წაიკითხეს და საფლავი ყვავილებით შეამკეს. პოეზიის საათი ტრადიციულ სახეს მიიღებს და ყოველ წელს გაიმართება.

ქალაქ ბათუმის მერიის ახალგაზრდობის საქმეთა განყოფილების წარმომადგენლებმა უნივერსიტეტის სააქტო დარბაზში სტუდენტთა დასაქმების მიზნობრივი პროგრამის პრეზენტაცია გამართეს. პროგრამაში მონაწილეობას ბათუმის უმაღლესი საგანმანათლებლო დაწესებულებების 608 სტუდენტი მიიღებს. მონაწილეები თითოეული სასწავლებლისთვის დადგენილი კვოტის ფარგლებში შეფასების 100-ქულიანი სისტემით შეირჩევიან. შოთა რუსთაველის სახელმწიფო უნივერსიტეტიდან 394 სტუდენტი დასაქმდება. პროგრამა ორ ეტაპად მაისსა და აგვისტოში განხორციელდება. ახალგაზრდები ერთი თვის განმავლობაში შაბათ-კვირას იმუშავებენ და 200 ლარიან ანაზღაურებას მიიღენ. რეგისტრაცია 1 მაისამდე ქალაქ ბათუმის მერიაში (ლერმონტოვის ქ.№ 90,18) იწარმოებს.

რსუ-ს აკადემიური საბჭოს გადაწყვეტილებით, განათლებისა და მეცნიერებათა ფაკულტეტის №227-ე აუდიტორიას ცნობილი მათემატიკოსისა და ღვაწლმოსილი მეცნიერის ალექსანდრე ბერაძის სახელი მიენიჭა. კლასიკური გეომეტრიის თვალსაჩინო წარმომადგენლის სახელობის აუდიტორიის გახსნაზე უნივერსიტეტის რექტორმა, პროფესორმა ალიოშა ბაკურიძემ, პროფესორ-მასწავლებლებმა, კოლეგებმა, მოსწავლეებმა, სტუდენტებმა და ოჯახის წევრებმა აღიარებული მეცნიერის ცხოვრება და მოღვაწეობა გაიხსენეს და მის სამეცნიერო მიღწევებზე ისაუბრეს

შოთა რუსთაველის სახელმწიფო უნივერსიტეტის ადმინისტრაციის ხელმძღვანლის წარდგინებითა და წარმომადგენლობითი საბჭოს 2011 წლის 18 თებერვლის №7 გადაწყვეტილებით განხორციელდა სპეციალური სასწავლო სოციალური პროგრამა “სტუდენტთა შეღავათები სწავლის საფასურში”. პროგრამაში მონაწილეობა შეეძლო წარჩინებულ, სოციალურად დაუცველ, ობოლ, მრავალშვილიანი ოჯახის წევრ, დევნილ, საქართველოს ტერიტორიული მთლიანობისათვის ბრძოლაში დაღუპულთა შვილებსა და შეზღუდული შესაძლებლობების მქონე სტუდენტებს. 70 კონკურსანტიდან 2010-2011 სასწავლო წლის მეორე სემესტრის სწავლის საფასურში შეღავათი 37 სტუდენტმა მიიღო (26 სტუდენტმა 100%-იანი, 1 სტუდენტმა 70%-იანი და 10 სტუდენტმა 50%-იანი)

შოთა რუსთაველის ეროვნული სამეცნიერო ფონდის წარმომადგენლებმა შოთა რუსთაველის სახელმწიფო უნივერსიტეტის პროფესორ-მასწავლებლებსა და მკვლევრებს ახალი სახელმწიფო სამეცნიერო საგრანტო კონკურსების პირობები გააცნეს. ფონდის გენერალურმა დირექტორმა სულხან სისაურმა და სამეცნიერო დეპარტამენტის ხელმძღვანელმა ირაკლი ნოსელიძემ ყურადღება იმ სიახლეებზე გაამახვილეს, რაც ბოლო პერიოდში განხორციელდა. გამოყენებითი კვლევების კონკურსის პირობების მიხედვით თითქმის გაორმაგდა სახელმწიფო დაფინანსება, შეიცვალა პროექტის ხანგრძლივობა, გამარტივდა კონკურსში წარსადგენი პროექტის დიზაინი და მონაწილეობისთვის აუცილებელი პროცედურები. დოკუმენტაციის მიღება თითქმის ელექტრონულად მოხდება.