ახალი ამბები

დასრულდა საბჭოთა ოკუპაციის 90 წლისადმი მიძღვნილი ესეების კონკურსი. საბჭოთა ოკუპაციის თემაზე უმაღლესი სასწავლებლების სტუდენტებმა და საჯარო სკოლების მე-10, მე-11, მე-12 კლასის მოსწავლეებმა ესეები წარმოადგინეს და ისტორიული მოვლენები ახლებურად შეაფასეს. ას კონკურსანტს შორის გამარჯვებულნი მწერალთა კავშირისა და სხვადასხვა უმაღლესი საგანმანათლებლო დაწესებულების წარმომადგენლებისაგან დაკომპლექტებულმა ჟიურიმ გამოავლინა. საუკეთესო ესსეს ავტორად მელანო ზოსიძე დასახელდა, მეორე ადგილი ქეთევან ჩავლეიშვილმა დაიკავა, ხოლო მესამე - მარიამ კაკალაძემ. გამარჯვებულებს ფულადი პრემიები და სამახსოვრო საჩუქრები გადასცეს

რსუ-ს აკადემიური საბჭოს 2010 წლის 15 ოქტომბრის №112 დადგენილებით და წარმომადგენლობითი საბჭოს 2010 წლის 20 ოქტომბრის №01 გადაწყვეტილებით რსუ-ს სოციალურ მეცნიერებათა, ბიზნესისა და სამართალმცოდნეობის ფაკულტეტს გამოეყო ტურიზმის პროგრამული მიმართულება (ტურიზმის საბაკალავრო და ტურიზმის მენეჯმენტის სამაგისტრო საგანმანათლებლო პროგრამები) და მის ბაზაზე ჩამოყალიბდა ტურიზმის ფაკულტეტი. ფაკულტეტის მიზანია ტურისტული მომსახურების საერთაშორისო სტანდარტების დამკვიდრების ხელშეწყობა და ტურიზმის დარგისათვის მაღალკვალიფიციური, კონკურენტუნარიანი და შესაბამისი კომპეტენციების მქონე სპეციალისტების მომზადება.

შოთა რუსთაველის სახელმწიფო უნივერსიტეტში საბჭოთა ოკუპაციის 90 წლისადმი მიძღვნილი კვირეული ესეების კონკურსით დაიწყო. შინაგან საქმეთა სამინისტროს საინფორმაციო-ანალიტიკური დეპარტამენტის საარქივო სამმართველოს ორგანიზებით უშიშროების არქივში არსებული საბჭოთა ოკუპაციისა და ტერორის ამსახველი გრიფით საიდუმლო ფოტობანერების გამოფენა მოეწყო სახელწოდებით ,,წითელი ისტორია და აჭარა’’, გაიმართა ამავე უწყების მიერ გამოცემული ჟურნალ ,,საარქივო მოამბის’’ სპეციალური ნომრის პრეზენტაცია, თბილისის ივანე ჯავახიშვილის სახელობის სახელმწიფო უნივერსიტეტის ერთ-ერთი დამაარსებლის, შალვა ნუცუბიძის დაპატიმრების ისტორიის ამსახველი დოკუმენტური ფილმის „დატყვევებული გონი(ერი)“ ჩვენება და სტუდენტთა სამეცნიერო კონფერენცია.

დავით აღმაშენებლის ხსენების დღეს მიეძღვნა ინტელექტუალური თამაში "რა? სად? როდის?", რომელშიც სტუდენტებთან ერთად აჭარის საჯარო სკოლის მოსწავლეები მონაწილეობდნენ. მოასპარეზე ოც გუნდს შორის პირველი ადგილი ურეხის საჯარო სკოლის გუნდმა "ბახტრიონმა" დაიკავა, მეორე კი - სკოლა ,,ევრო 2000“-ის გუნდმა ,,ედელვაისმა“. ღონისძიების ფარგლებში შედგა მანუჩარ ლორიას დოკუმენტური ფილმის ,,დავით აღმაშენებლის“ ჩვენება. ინტელექტუალური თამაში რსუ-ს სტუდენტთა მომსახურებისა და მხარდაჭერის სამსახურის, სტუდენტური თვიმმართველობის, სტუდენტთა სამცნიერო ცენტრის, აჭარის სპორტისა და ახალგაზრდობის საქმეთა დეპარტამენტისა და ბათუმის მერიის ახალგაზრდულ საქმეთა განყოფილების ხელშეწყობით გაიმართა. ორგანიზატორებმა გამარჯვებულ გუნდებს სიგელები და სამახსოვრო საჩუქრები გადასცეს.

23-27 იანვარს შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე, საინჟინრო-ტექნოლოგიური ფაკულტეტის დეკანი გაიოზ ფარცხალაძე, ევროპეისტიკის დეპარტამენტის ასისტენტ პროფესორი ნელი ახვლედიანი, აჭარის ჯანმრთელობისა და სოციალური დაცვის მინისტრის მოადგილე ჯამბულ სურმანიძე, აჭარის უმაღლესი საბჭოს ჯანმრთელობის დაცვისა და სოციალურ საკითხთა კომისიის თავმჯდომარე მიხეილ მჟავანაძე და უმაღლესი საბჭოს საკონსულტაციო საბჭოს თავმჯდომარე მერაბ ქიძინიძე საქმიანი ვიზიტით გერმანიის ფედერაციულ რესპუბლიკაში იმყოფებოდნენ. დელეგაციის წევრები ქვეყნის ოფიციალურ პირებსა და უმაღლესი სასწავლებლის ხელმძღვანელებს შეხვდნენ. ვიზიტი მიზნად ისახავდა ორ ქვეყანას შორის ურთიერთთანამშრომლობის გაღრმავებასა და ერთობლივი პროექტების განხორციელებას