ახალი ამბები

შოთა რუსთაველის სახელმწიფო უნივერსიტეტი საქართველოს განათლებისა და მეცნიერებათა სამინისტროს და ნორვეგიის განათლებისა და კვლევის სამინისტროს ხელშეწყობით ატარებს ორკვირიან, ინკლუზიური განათლების საზაფხულო სკოლას. სწავლების მიზანია ინკლუზიური განათლების საკითხებში მასწავლებელთა მომზადების დონის ამაღლება და ინკლუზიური განათლების ძირითადი მიმართულებების განვითარება. საზაფხულო სკოლაში კვალიფიკაციას აიმაღლებენ საქართველოს სხვადასხვა რეგიონის საჯარო და კერძო სკოლაში მოქმედი პედაგოგები და მაძიებლები. მსმენელები ინკლუზიური განათლების სალექციო კურსს გაივლიან და მონაწილეობას მიიღებენ პრაქტიკულ მეცადინეობებში. საზაფხულო სკოლის მონაწილეთა შედეგების შეფასების საფუძველზე გაიცემა სერტიკიფიკატები.

შოთა რუსთაველის სახელმწიფო უნივერსიტეტმა საერთაშორისო სამეცნიერო კონფერენციას - "სახელმწიფო ენის სწავლების საკითხები: პრობლემები და გამოწვევები" - უმასპინძლა. სახელმწიფო ენის სწავლების სიახლეებზე, მეთოდებსა და მიღწევებზე 80-მდე ქართველი, ამერიკელი, გერმანელი, ლატვიელი, ფინელი, ესტონელი, თურქი და შვეიცარიელი პროფესორ-მასწავლებელი და მკვლევარი ორი დღის განმავლობაში მსჯელობდა. კონფერენციის მონაწილეებმა ასევე განიხილეს ის პროექტები, რომლებიც ეთნიკური უმცირესობებისთვის ქართული ენის სწავლების კუთხით შემუშავდა. კონფერენცია ივანე ჯავახიშვილის სახელობის თბილისის სახელმწიფო უნივერსიტეტის ორგანიზებით გაიმართა.

საინფორმაციო უზრუნველყოფის საერთაშორისო კომპანია DPA–ს სამეთვალყურეო საბჭოს თავმდჯომარემ იურის ვილდერსიმ და Microsoft–ის წარმომადგენელმა, DPA საქართველოს გაყიდვების დირექტორმა გიორგი კვარაცხელიამ შოთა რუსთაველის სახელმწიფო უნივერსიტეტის სტუდენტებისა და პროფესორ-მასწავლებლებისათვის საჯარო ლექცია წაიკითხეს. ექსპერტებმა მსმენელებს ინტელექტუალური საკუთრება და ინტერნეტი, პროგრამული უზრუნველყოფის ლიცენზირების მოთხოვნები, იდეალური საინფორმაციო ტექნოლოგიები (ISO სტანდარტებზე დაყრდნობით შემუშავებული ხედვა), საინფორმაციო ტექნოლოგიების პროექტების მართვის უახლესი სტანდარტები და ინოვაციური მიდგომები გააცნეს. DPA–ს წარმომადგენლებმა აქტუალურ შეკითხვებს უპასუხეს და სამომავლო თანამშრომლობის პერსპექტივებზე ისაუბრეს.

ტბელ აბუსერიძის სახელობის აუდიტორიაში I რესპუბლიკური სამეცნიერო-პრაქტიკული კონფერენცია გაიმართა თემაზე: „საქართველოში აგრარული პოლიტიკისა და სამართლებრივი რეგულირების პრობლემები თანამედროვე ეტაპზე“. საქართველოს სხვადასხვა უმაღლესი სასწავლებლის 60-მდე მკვლევარმა და პროფესორ-მასწავლებელმა მოხსენებები წარმოადგინა ისეთ მნიშვნელოვან საკითხებზე, როგორიცაა: უძრავი ქონების - მიწის მფლობელის უფლებების დაცვა, საქართველოს მიწის რესურსების ადმინისტრირების, მდგრადი განვითარების პრობლემები და მათი გადაწყვეტის გზები, მიწის ნაკვეთზე საკუთრების უფლება და სამართლებრივ-ეკონომიკური ასპექტები. კონფერენციაზე მიღებული რეკომენდაციები შესაბამის დაწესებულებებს გადაეგზავნება.

,,განათლების ადმინისტრირების ბათუმის საზაფხულო სკოლისა” და განათლების ადმინისტრირების სამაგისტრო პროგრამის განსახორციელებლად შოთა რუსთაველის სახელმწიფო უნივერსიტეტში ოთხდღიანი სამუშაო ვიზიტით იმყოფებიან პროექტის საორგანიზაციო კომიტეტის წევრები. რსუ-ს რექტორი, პროფესორი ალიოშა ბაკურიძე, განათლების პროექტის მენჯერი ნინო ჩუბინიძე, ილიას სახელმწიფო უნივერსიტეტის განათლების ადმინისტრირების სამაგისტრო საგანმანათლებლო პროგრამის კოორდინატორი სიმონ ჯანაშია და ლოს-ანჯელესის კალიფორნიის უნივერსიტეტის განათლებისა და ინფორმაციის მართვის სკოლის პროფესორი, განათლების მართვისა და სასწავლო პროცესის მართვის ექსპერტი ბაზ ვილმსი რსუ-ს აკადემიურ პერსონალს და საზაფხულო სკოლაში მონაწილეობის მსურველებს შეხვდნენ.