ახალი ამბები

სოციალურ მეცნიერებათა და ისტორიის, არქეოლოგიისა და ეთნოლოგიის დეპარტემენტების ორგანიზებით წიგნის - ,,ბრძოლა ბათუმისთვის, 1921 წლის 18-20 მარტი“ წარდგინება გაიმართა. მონოგრაფია რსუ-სა და სხვადასხვა უმაღლესი სასწავლებლის 11 მკვლევრის ნაშრომს აერთიანებს და ეძღვნება 1921 წლის თებერვალ-მარტის ომის ბოლო პერიოდს - ბრძოლას ბათუმისთვის. ნაშრომში განხილულია საკითხის ქართული და თურქული ისტორიოგრაფია, ბათუმსა და მის ოლქში არსებული ვითარება, ქალაქის გარშემო მიმდინარე დიპლომატიური ბრძოლა და საომარი მოქმედებები. ნაშრომში ნაჩვენებია ასევე ომში დაღუპულთა საძმო საფლავის შემდგომი ბედი და 1921 წლის თებერვალ-მარტის მოვლენების ასახვა ქართულ მხატვრულ ლიტერატურაში.

დიდი ბრიტანეთის სურსათისა და გარემოს კვლევის სააგენტოს (FERA) წამყვანმა სპეციალისტმა მოლეკულურ ბიოლოგიაში რიჩარდ თუეითსმა საჯარო ლექცია წაიკითხა თემაზე: ,,დიდი ბრიტანეთის სურსათისა და გარემოს კვლევის სააგენტოსა და შოთა რუსთაველის სახელმწიფო უნივერსიტეტის ფიტოპათოლოგიის ინსტიტუტს შორის სამეცნიერო თანმაშრომლობა“. ექსპერტმა საერთაშორისო სამეცნიერო - ტექნიკური ცენტრის (ISTC) საპარტნიორო პროექტის (№G 1775p) ,,საქართველოს სოფლის მეურნეობის განვითარების ხელშეწყობა: სამი მნიშვნელოვანი სასოფლო-სამეურნეო კულტურის დაავადებისადმი გამძლეობის შესწავლა მოსავლიანობის მართვის გზების გაუმჯობესების მიზნით საქართველოსა და სამხრეთ კავკასიის სხვა ქვეყნებში“ შედეგები შეაჯამა. პროექტი დიდი ბრიტანეთის თავდაცვის სამინისტროსა და გლობალური პარტნიორობის პროგრამის მხარდაჭერით ხორციელდება.

შოთა რუსთაველის დარბაზში აგრარული ტექნოლოგიებისა და ეკოლოგიის, საინჟინრო-ტექნოლოგიური ფაკულტეტებისა და ბიოლოგიის დეპარტამენტის საგანმანათლებლო პროგრამების პრეზენტაცია გაიმართა. დეკანებმა და პროფესორ-მასწავლებლებმა წარდგინებაზე მოწვეულ დამსაქმებელებს პროგრამების სტრუქტურა, დარგობრივი და ზოგადი კომპეტენციები, მიზნები, დასაქმების სფეროები და შედეგები გააცნეს. შეხვედრას აჭარის სოფლის მეურნეობის სამინისტროს, სატყეო სააგენტოს, ბუნების დაცვის სამმართველოს, სამშენებლო კომპანიების, სამედიცინო დაწესებულებების, არასამთავრობო ორგანიზაციებისა და ლაბორატორიების წარმომადგენლები ესწრებოდნენ. დამსაქმებლებმა რჩევები საგანმანათლებლო პროგრამებთან მიმართებაში სპეციალური კითხვარის საშუალებით წარმოადგინეს, რაც მომავალში უშუალოდ სასწავლო პროცესზე აისახება.

ღია კარის დღეების ფარგლებში შოთა რუსთაველის სახელმწიფო უნივერსიტეტის წარდგინება გაიმართა ბათუმის, ხელვაჩაურის, ქობულეთის, ქედის, შუახევის, ხულოს, ოზურგეთის, ჩოხატაურის, ლანჩხუთის, ფოთის, აბაშის, სენაკის, ხობისა და ზუგდიდის საჯარო სკოლების მეთორმეტე კლასელებისათვის. უმაღლესი სასწავლებლის პროფესორ-მასწავლებლებმა მომავალ სტუდენტებს უნივერსიტეტის საგანმანათლებლო პროგრამები, სერვისები, სტუდენტური ცხოვრება, სამეცნიერო-კვლევითი საქმიანობა, სოციალური პროგრამები და რსუ-ს პარტნიორი უცხოეთის წამყვანი უნივერსიტეტების გაცვლითი პროგრამები გააცნეს. პროფესორ-მასწავლებლებმა აბიტურიენტებს საინფორმაციო ბუკლეტები დაურიგეს და აქტუალურ კითხვებს უპასუხეს.

შოთა რუსთაველის სახელმწიფო უნივერსიტეტი ქალბატონებს 8 მარტს - ქალთა საერთაშორისო დღეს ულოცავს. ბედნიერებას, სიკეთეს, მშვიდობასა და წარმატებებს უსურვებს პედაგოგიურ, სამეცნიერო და შემოქმედებით საქმიანობაში.