ახალი ამბები

სტუდენტთა სამეცნიერო კონფერენციის მონაწილეებს რსუ-ს რექტორმა ალიოშა ბაკურიძემ, ადმინისტრაციის ხელმძღვანელმა დავით ლეკვეიშვილმა, სასწავლო და სამეცნიერო პროგრამების მართვის დეპარტამენტის ხელმძღვანელმა მადონა მიქელაძემ და სტუდენტური თვითმმართველობის თავმჯდომარემ ამირან გოგიავამ სერტიფიკატები გადასცეს. უნივერსიტეტის 75 წლისთავისადმი მიძღვნილი კონფერენცია ფაკულტეტების მიხედვით გადანაწილებულ 15 სექციაში ჩატარდა. წარმოდგენილი 186 მოხსენებიდან 45 საუკეთესო ნაშრომი სტუდენტთა და ახალგაზრდა მეცნიერთა შრომების კრებულში დაიბეჭდება.

აშშ საერთაშორისო განვითარების სააგენტოს (USAID) ,,განათლების მართვის პროექტის“ (EMP) ფარგლებში რსუ-ში ონლაინ კონფერენცია გაიმართა თემაზე ,,თანამონაწილეობითი კვლევა განათლების მართვაში“. კონფერენცია ერთდროულად მიმდინარეობდა შოთა რუსთაველის სახელმწიფო უნივერსიტეტში, ილიას სახელმწიფო უნივერსიტეტსა და ქუთაისის აკაკი წერეთლის სახელმწიფო უნივერსიტეტში. პროექტის მიზანია განათლების პოლიტიკის გაუმჯობესება, მართვის შესაძლებლობებისა და უნარების განვითარება და განათლების მართვისა და ადმინისტრირების სამაგისტრო პროგრამის დანერგვა

მესამე რეგიონულ აკადემიურ სამიტს ,,ECTS და დიპლომის დანართი” შოთა რუსთაველის სახელმწიფო უნივერსიტეტმა უმასპინძლა. ფრანგმა და გერმანელმა ექსპერტებმა საქართველოს უმაღლესი სასწავლებლების წარმომადგენლებს კრედიტების ტრანსფერისა და დაგროვების ევროპული სისტემისა და დიპლომის დანართის გამოყენების მეთოდები გააცნეს. ასევე განიხილეს საფრანგეთის, გერმანიისა და საქართველოს უმაღლეს სასწავლებლებში ახალი სისტემის დანერგვის კონკრეტული მაგალითები. აკადემიური სამიტი ევროკავშირის საჯარო სამსახურების დაძმობილების პროგრამის ფარგლებში ჩატარდა.

შოთა რუსთაველის სახელმწიფო უნივერსიტეტში პროექტ ,,ტვინინგის“ ექსპერტებმა ლუკ ლამბოლმა და ქრისტოფერ მოსიმ ჩაატარეს ტრენინგი თემაზე: ,,ევროპული კრედიტების ტრანსფერისა და დაგროვების სისტემა და დიპლომების დანართი“. ორდღიანი სემინარი განათლების აკრედიტაციის ეროვნული ცენტრისა და საქართველოს განათლებისა და მეცნიერების სამინისტროს ,,CEIBAL“ – ტვინინგის პროექტის ეგიდით გაიმართა. მასში საქართველოს სხვადასხვა უმაღლესი საგანამათლებლო დაწესებულებების წარმომადგენლები მონაწილეობდნენ.

შოთა რუსთაველის სახელმწიფო უნივერსიტეტის ქორეოგრაფიულმა ანსამბლმა ,,ტბეთმა“ 55 წლის იუბილე ილია ჭავჭავაძის სახელობის სახელმწიფო დრამატულ თეატრში აღნიშნა. მოცეკვავეებმა ანსამბლ ,,ტბეთის“ ხელმძღვანელის ზურაბ სვანაძის მიერ დადგმული ფოლკლორული ცეკვები - ,,ხევსურული სუიტა“, ,,ქალთა ხორუმი“, ,,მოხეური“, ,,ქალ-ვაჟთა“ და ,,მთიულური“ შეასრულეს. გაიმართა ცეკვა ,,აფხაზურის“ პრემიერა. უნივერსიტეტის კულტურულ-შემოქმედებითი ცხოვრების განვითარებაში შეტანილი წვლილისთვის ,,ტბეთი“ საპატიო სიგელით დაჯილდოვდა