შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ,,სოფლის მეურნეობა და ეკოლოგიური წონასწორობა აღმოსავლეთ ევროპასთან (LOGO)“ კავშირის თავმჯდომარემ დოქტორ ჰართვიგ მენენმა ხელი მოაწერეს ურთიერთთანამშრომლობის ხელშეკრულებას. შეთანხმებისამებრ, რსუ-ს აგრარული ტექნოლოგიებისა და ეკოლოგიის ფაკულტეტის სტუდენტები გერმანიაში გაივლიან ექვსთვიან სასწავლო-საწარმოო პრაქტიკას ეკოლოგიურ მიწათმოქმედების მიმართულებით.
ცნობილ არქეოლოგს, ისტორიის მეცნიერებათა დოქტორს, შოთა რუსთაველის სახელმწიფო უნივერსიტეტის ემერიტუსს, პროფესორ ამირან კახიძეს 75 წელი შეუსრულდა. შოთა რუსთაველის დარბაზში გამართულ საიუბილეო სხდომაზე უნივერსიტეტის პროფესორ-მასწავლებლებმა, კოლეგებმა და მეგობრებმა ღვაწლმოსილი პროფესორის სამეცნიერო მიღწევებსა და საზოგადოებრივ საქმიანობაზე ისაუბრეს. ამირან კახიძის სახელს უკავშირდება სამხრეთ–დასავლეთ საქართველოში არქეოლოგიის სკოლის შექმნა და მკლევართა რამდენიმე თაობის აღზარდა. უნივერსიტეტელებმა იუბილარს ღირსშესანიშნავი თარიღი მიულოცეს და სამახსოვრო საჩუქრები გადასცეს.
პროექტის ,,ლიტვური კულტურის დღეები“ ფარგლებში შოთა რუსთაველის სახელმწიფო უნივერსიტეტს ლიტვის დელეგაცია ეწვია. საქართველოში ლიტვის საელჩოს დესპანი ლაურინკუს ტალატ-კელაშა და საზოგადოებრივი მაუწყებლის დირექტორი აუდრიუს მატონისი სტუდენტებს ორი ქვეყნის ურთიერთთანამშრომლობაზე ესაუბრენ. ვილნიუსის უნივერსიტეტის პროფესორმა ადოფრედას ბურბლაუსკასმა საჯარო ლექცია წაიკითხა თემაზე: ,,საქართველო-ლიტვის ურთიერთობები და პერსპექტივები“. ლექციას უნივერსიტეტის რექტორი, პროფესორი ალიოშა ბაკურიძე, აჭარის მთავრობის თავმჯდომარის მოადგილე ლევან ანთაძე და პროფესორ-მასწავლებლები ესწრებოდნენ.
აჭარის მთავრობის თავმჯდომარე ლევან ვარშალომიძე შოთა რუსთაველის სახელმწიფო უნივერსიტეტის რექტორთან, პროფესორ ალიოშა ბაკურიძესთან და აჭარის განათლების, კულტურისა და სპორტის მინისტრთან გია აბულაძესთან ერთად უმაღლესი სასწავლებლის პირველკურსელებს შეხვდა. რეგიონის პირველმა პირმა სტუდენტებს მთავრობის განათლების სისტემასთან დაკავშირებული სტრატეგიული პროექტები გააცნო, უნივერსიტეტის განვითარების სამომავლო გეგმებზე ისაუბრა და აქტუალურ შეკითხვებს უპასუხა. ახალგაზრდები განსაკუთრებით უცხო ენის შესწავლით, გაცვლითი პროგრამებით, დასაქმებითა და სტუდენტური პროექტებით დაინტერესდნენ.
