ახალი ამბები

შოთა რუსთაველის სახელმწიფო უნივერსიტეტში პროექტ ,,ტვინინგის“ ექსპერტებმა ლუკ ლამბოლმა და ქრისტოფერ მოსიმ ჩაატარეს ტრენინგი თემაზე: ,,ევროპული კრედიტების ტრანსფერისა და დაგროვების სისტემა და დიპლომების დანართი“. ორდღიანი სემინარი განათლების აკრედიტაციის ეროვნული ცენტრისა და საქართველოს განათლებისა და მეცნიერების სამინისტროს ,,CEIBAL“ – ტვინინგის პროექტის ეგიდით გაიმართა. მასში საქართველოს სხვადასხვა უმაღლესი საგანამათლებლო დაწესებულებების წარმომადგენლები მონაწილეობდნენ.

შოთა რუსთაველის სახელმწიფო უნივერსიტეტის ქორეოგრაფიულმა ანსამბლმა ,,ტბეთმა“ 55 წლის იუბილე ილია ჭავჭავაძის სახელობის სახელმწიფო დრამატულ თეატრში აღნიშნა. მოცეკვავეებმა ანსამბლ ,,ტბეთის“ ხელმძღვანელის ზურაბ სვანაძის მიერ დადგმული ფოლკლორული ცეკვები - ,,ხევსურული სუიტა“, ,,ქალთა ხორუმი“, ,,მოხეური“, ,,ქალ-ვაჟთა“ და ,,მთიულური“ შეასრულეს. გაიმართა ცეკვა ,,აფხაზურის“ პრემიერა. უნივერსიტეტის კულტურულ-შემოქმედებითი ცხოვრების განვითარებაში შეტანილი წვლილისთვის ,,ტბეთი“ საპატიო სიგელით დაჯილდოვდა

,,ჩვენ, კაცთა, მოგვცა ქვეყანა, გვაქვს უთვალავი ფერითა“ - ამ დევიზით შოთა რუსთაველის სახელმწიფო უნივერსიტეტის ეზოში ,,ვეფხისტყაოსნის“ საჯარო კითხვა მოეწყო. მასში სტუდენტები, პროფესორ-მასწავლებლები, საჯარო სკოლის მასწავლებლები და მოსწავლეები მონაწილეობდნენ. ,,ვეფხისტყაოსნის“ კითხვის დღე ივანე ჯავახიშვილის სახელობის სახელმწიფო უნივერსიტეტის ორგანიზებით ყოველწლიურად იმართება. ტრადიციას საფუძველი მწერალმა დათო ტურაშვილმა და პარლამენტარმა ნუგზარ წიკლაურმა შვიდი წლის წინ ჩაუყარეს.

რსუ-ს სასწავლო და სამეცნიერო პროგრამების მართვის დეპარტამენტის ხელმძღვანელმა მადონა მიქელაძემ სტუდენტებს დამატებითი სპეციალობის 29 საგანმანათლებლო პროგრამა და დასაქმების სფეროები გააცნო. მეორე კურსელებს დამატებითი სპეციალობის ფარგლებშივე შეეძლებათ მასწავლებლის მომზადების პროგრამის გავლა, რის საფუძველზეც მათ საბაზო და საშუალო სკოლის მასწავლებლის კვალიფიკაცია მიენიჭებათ.

შოთა რუსთაველის სახელმწიფო უნივერსიტეტმა ზოგადსაგანმანათლებლო დაწესებულებებთან თანამშრომლობა ხულოსა და შუახევის რაიონების საჯარო და საბაზო სკოლების დირექტორებთან შეხვედრით დაიწყო. მხარეები ერთობლივი სასწავლო - სამეცნიერო და კულტურული ღონისძიებების ჩატარებასა და ურთიერთთანამშრომლობის პირობებზე შეთანხმდნენ. უნივერსიტეტი უახლოეს მომავალში აჭარის საბაზო და საჯარო სკოლებთან მემორანდუმს გააფორმებს.