ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტებმა ძუძუს კიბოს შესახებ ცნობიერების ამაღლების კამპანიაში მიიღეს მონაწილეობა. ახალგაზრდებმა ღონისძიების ფარგლებში ფლეშმობი შეასრულეს, ევექსის, საოჯახო მედიცინის ცენტრის, N1 პოლიკლინიკის ბენეფიციარებს საინფორმაციო ბროშურები გადასცეს და ბავშვებს ვარდისფერი ბუშტები დაურიგეს. ღონისძიება სახელმწიფო პროგრამის „დაავადებათა ადრეული გამოვლენა და სკრინინგის“ ეგიდით დაავადებათა კონტროლისა და საზოგადოებრივი ჯანმრთელობის ეროვნული ცენტრისა და აჭარის საზოგადოებრივი ჯანდაცვის ცენტრის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტებმა და პროფესორ-მასწავლებლებმა ცხოველთა დაცვის საერთაშორისო დღე აღნიშნეს. USAID-ის ფინანსური მხარდაჭერით და კავკასიის გარემოსდაცვითი არასამთავრობო ქსელის (CENN) ორგანიზებით და სტუდენტების მონაწილეობით ჭოროხის დელტის, მიგრირებადი ფრინველებისათვის მნიშვნელოვანი ტერიტორიის დასუფთავების აქცია ჩატარდა. ცხოველთა დაცვის საერთაშორისო დღე აშშ-ში 1931 წლის 4 ოქტომბერს ბუნების დამცველმა საერთაშორისო კონგრესზე დააწესეს.

მეცნიერებისა და ინოვაციების საერთაშორისო ფესტივალის ფარგლებში, ბათუმის შოთა რუსთაველის სახელმწიფო უნივერსიტეტში ახალგაზრდა მეცნიერთა და სტუდენტთა სამეცნიერო კონფერენცია „თანამედროვე ბიომედიცინის აქტუალური საკითხები” ჩატარდა. 50-მდე სტუდენტმა და ახალგაზრდა მკვლევარმა სამეცნიერო სესიაზე მოხსენებები წარადგინა ბიომედიცინის აქტუალურ საკითხებზე. ღონისძიება ბათუმის შოთა რუსთაველის სახელმწიფო უნივერსიტეტისა და ივანე ბერიტაშვილის ექსპერიმენტული ბიომედიცინის ცენტრის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის პროფესორ-მასწავლებლები და სტუდენტები „შერატონში“ გამართულ ანესთეზიოლოგიისა და ინტენსიური თერაპიის საერთაშორისო კონფერენციაში „ჯეოანესთეზია-2019” მონაწილეობენ. საერთაშორისო კონფერენცია მეოთხედ ტარდება და მის მუშაობაში სხვადასხვა ქვეყნის ანესთეზიოლოგ-რეანიმატოლოგები, გადაუდებელი მედიცინის სპეციალისტები და ტოქსიკოლოგები არიან ჩართული. მსოფლიოს წამყვანი მედიკოსები სამი დღის განმავლობაში დარგში არსებულ პრობლემებსა და საერთაშორისო მიღწევებზე იმსჯელებენ.

საბუნებისმეტყველო მეცნიერებათა და ჯანდაცვის ფაკულტეტის სტუდენტებისა და პროფესორ-მასწავლებლებისათვის პროექტის „V4 და აღმოსავლეთ პარტნიორობის თანამშრომლობა ბიომრავალფეროვნების კონსერვაციაში ადამიანის კეთილდღეობისათვის“ ფარგლებში კავკასიის ბიომრავალფეროვნების ვორკშოპი ჩატარდა. ექვსი ქვეყნის ბიომრავალფეროვნების ექსპერტებმა ღონისძიებაზე ბიომრავალფეროვნების კონსერვაციის სტრატეგიები განიხილეს. ვორკშოპის მონაწილეებმა იმსჯელეს კავკასიის ბიომრავალფეროვნებაზე, სახეობათა იდენტიფიცირებაზე, ბიომრავალფეროვნების მნიშვნელობაზე, პრობლემებზე და მომავალი თანამშრომლობის შესაძლებლობებზე.