„ერაზმუს+“-ის ინსტიტუციური განვითარების პროექტის „განსაკუთრებული საჭიროებების მქონე პაციენტთა სტომატოლოგიური მომსახურების გაძლიერება და ექიმ-სტომატოლოგთა უწყვეტი განათლების ხელშეწყობა საქართველოში (HEAL) ERASMUS-EDU-2023-CBHE-STAND-1-101129331 კონსორციუმის წარმომადგენელთა პირველი შეხვედრა გაიმართა ევროპის უნივერსიტეტში, 23-25 იანვარს. სამუშაო შეხვედრას ესწრებოდნენ ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტომატოლოგიის დეპარტამენტის პროფესორი მზია ბაქრაძე, ასისტენტ-პროფესორები: ფრიდონ ჯაფარიძე და მარიამ გოგოტიშვილი, მოწვეული პედაგოგები: სოფო დავითაძე და თამთა ჩიქობავა.

ბსუ-ს მესამე მისიის ღონისძიების ფარგლებში, საბუნებისმეტყველო მეცნიერებათა და ჯანდაცვის ფაკულტეტის ორგანიზებით, ბათუმის სკოლამდელი აღზრდის დაწესებულებაში ჩატარდა მასტერკლასი „პირის ღრუს ინდივიდუალური ჰიგიენის მეთოდებისა და საშუალებების გამოყენების შესახებ“. ბსუ დენტის ბავშვთა სტომატოლოგმა ნათია ქადეიშვილმა ბაღის აღსაზრდელებს ვორქშოპისა და მულაჟების დახმარებით აუხსნა პირის ღრუს მოვლის წესები და ჯანსაღი კვების მნიშვნელობა პირის ღრუს ჯანმრთელობის შესანარჩუნებლად. აქტივობის დასრულების შემდეგ, ყველა მონაწილეს გადაეცა სერტიფიკატი და საჩუქარი.

ბსუ-ში კლიმატის ცვლილების კანონის „თეთრი წიგნის“ პრეზენტაცია და საჯარო განხილვა გაიმართა. ღონისძიება გახსნეს და მონაწილეებს სიტყვით მიმართეს საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ, გარემოს დაცვისა და სოფლის მეურნეობის მინისტრის პირველმა მოადგილემ ნინო თანდილაშვილმა, აჭარის ა.რ. სოფლის მეურნეობის მინისტრმა ზაზა შავაძემ, ბსუ-ს რექტორის მოადგილემ ანზორ ბერიძემ და ვესტმინსტერის დემოკრატიის ფონდის წარმომადგენლობის ხელმძღვანელმა ლაშა ნაკაშიძემ. შემაჯამებელ შეხვედრას ბსუ-ს სტუდენტები, დარგის მიმართულების პროფესორ-მასწავლებლები და საზოგადოების წარმომადგენლები ესწრებოდნენ.

საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრმა ბსუ-ს საბუნებისმეტყველო მეცნიერებათა და ჯანდაცვის ფაკულტეტის ეკოლოგიის სპეციალობის მაგისტრანტებს, მარიამ შაინიძესა და თამთა აბულაძეს 1500-ლარიანი მწვანე სტიპენდიები გადასცა და სიგელებით დაჯილდოვა.ცენტრი 2022 წლიდან ახორციელებს მწვანე და აგრო სტიპენდიების პროგრამებს, რომლებიც მიზნად ისახავს გარემოსდაცვითი და აგრარული მიმართულებით დეფიციტური პროფესიების (მათ შორის - გარემოსდაცვითი მეცნიერებების, ეკოლოგიის) პოპულარიზაციას და მაღალი აკადემიური მოსწრების მაგისტრატურის, საბაკალავრო და პროფესიული საფეხურის სტუდენტების წახალისებას.

14-15 დეკემბერს პროგრამის „კლიმატის ცვლილებით გამოწვეული კატასტროფების რისკის შემცირება საქართველოში“ ფარგლებში, გამართულ შემაჯამებელ სათემო ფორუმში მონაწილეობა მიიღეს საბუნებისმეტყველო მეცნიერებათა და ჯანდაცვის ფაკულტეტის დეკანმა, პროფესორმა რუსუდან ხუხუნაიშვილმა და ეკოლოგიის პროგრამის ხელმძღვანელმა, ასოცირებულმა პროფესორმა ინგა დიასამიძემ. ფორუმზე მონაწილეებმა განიხილეს პროგრამის ფარგლებში გეოლოგიური, ჰიდრომეტეოროლოგიური და აგრომეტეოროლოგიური სადამკვირვებლო ქსელის გაფართოების მიზნით განხორციელებული ღონისძიებები, დასრულებული და მიმდინარე ნაპირსამაგრი სამუშაოები, საფრთხის რუკები, თემის მართვის გეგმების მომზადების პროცესი, პროექტის ფარგლებში შემუშავებული თემის მართვის გეგმები, პროგრამის ფარგლებში მიმდინარე და დასრულებული ნაპირდაცვითი ღონისძიებები და „კლიმატის ელჩების" ახალგაზრდული ინიციატივები.