ბათუმის შოთა რუსთაველის სახელმწიფო უნივერსიტეტში V საერთაშორისო სკოლა-სემინარი „ბიომედიცინის აქტუალური საკითხები’’გაიხსნა. 10 ქართველი და უცხოელი პროფესორი ოთხი დღის განმავლობაში ჩაატარებს ლექციებს, მასტერ-კლასებსა და ლაბორატორიულ მეცადინეობებს დარგის აქტუალურ საკითხებზე. საქართველოს უმაღლესი სასწავლებლების ბიოლოგიური და სამედიცინო პროფილის 60-მდე სტუდენტი, დოქტორანტი და რეზიდენტი გაეცნობა ცხოვრების ჯანსაღ წესს, ბიოსუფრთხოებას, ბიოეთიკური პრინციპებისა და ნორმების დაცვის მნიშვნელობას ბიოსამედიცინო საქმიანობაში, ადამიანთა პოპულაციების ბიოლოგიური ბანკების შექმნის მნიშვნელობას ფუნდამენტური კვლევებისა და პერსონალიზებული მედიცინის განვითარებისათვის და ეთნობოტანიკური კვლევების მნიშვნელობას ბიომედიცინაში.

ბიოლოგიის დეპარტამენტის გამორჩეულ პედაგოგს, პროფესორს, კეთილშობილ, დაუღალავ, ღირსეულ, სამართლიან და ყველასათვის საყვარელ პიროვნებას ქალბატონ ქეთევან დოლიძეს ვულოცავთ 65 წლის იუბილეს. ვუსურვებთ, კიდევ მრავალი წელი ემოღვაწეოს უნივერსიტეტის ასპარეზზე, ჩვეული შემართებით და ენერგიულობით აღეზარდოს ახალი თაობის პროფესიონალები. ეკეთებინოს თავისი საყვარელი საქმე იმ გარემოში, სადაც მის გვერდით გატარებულ ყოველ დღეს დიდი სიხარული და პოზიტივი მოაქვს გარშემომყოფებისთვის. გვეამაყება, რომ მისი თანამედროვენი ვართ.

ბათუმის შოთა რუსთაველის სახელმწიფო უნივერსიტეტში ორგანიზაცია PRIME-ის წამყვანმა სპეციალისმა როს სიმპსონისმა საჯარო ლექცია წაიკითხა თემაზე: „პალიატიური მზრუნველობა“. ცნობილმა ექიმმა განიხილა სიკვდილის წინა პერიოდის მართვა პალიატიური მედიცინაში. მომხსენებელმა სტუდენტებს, ოჯახის ექიმებსა და ონკოლოგებს ასევე გააცნო პაციენტის ფსიქო-სოციალური სფეროს მნიშვნელობა და დასავლური ტიპის პალიატიური მზრუნველობის აქტუალურ საკითხები. როს სიმპსონი სამედიცინო პრაქტიკას აწარმოებს როგორც ოჯახის ექიმი დიდი ბრიტანეთის ქალაქ სოუსამპტონიში (Southhampton), არის სოუსამპტონის სამედიცინო უნივერსიტეტისა და ორგანიზაცია PRIME-ის წამყვანი ლექტორი.