ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ქიმიის სპეციალობის სტუდენტები აქტიურად არიან ჩართული უცხოეთის გაცვლით პროგრამებში. ქიმიის სპეციალობის III კურსის სტუდენტი ეთერ მგელაძე ექვსი თვით გაემგზავრა პორტუგალიის ქალაქ ბრაგას უნივერსიტეტში. ქიმიის სპეციალობის IV კურსის სტუდენტები მაგდა მგელაძე და თეონა სურმანიძე გაცვლით პროგრამის Mevlana-ს ეგიდით რამდენიმეთვიან სასწავლო კურსს გაივლიან რიზეს უნივერსიტეტში (Recep Tayyip Erdogan University). ქიმიის მაგისტრატურის I კურსის სტუდენტმა ლია აბულაძემ გაიმარჯვა პროგრამაში „იუნესკო პოლონეთის ერთობლივი სტიპენდიები“ და ექვსი თვით მივლინებულია ქალაქ კრაკოვის უნივერსიტეტში.

საბუნებისმეტყველო მეცნიერებათა და ჯანდაცვის ფაკულტეტის ქიმის დეპარტამენტის ორგანიზებით მოლის დღე რამდენიმე ღონისძიებით აღინიშნა. ბათუმის შოთა რუსთაველის სახელმწიფო უნივერსიტეტს ბათუმის საჯარო და კერძო სკოლების მოსწავლეები და მასწავლებლები ესტუმრნენ. მოზარდებმა ქიმიის დეპარტამენტი დაათვალიერეს, მატერიალურ ტექნიკურ ბაზას გაეცნენ და პროფესორ-მასწავლებლებს შეხვდნენ. მოსწავლეებმა ასევე მონაწილეობა მიიღეს ვორქშოფში, დააკვირდნენ სასწავლო პროცესში წარმართულ ქიმიურ ექსპერიმენტს და ნახეს როგორც პროგრამული, ასევე სახალისო ცდები. ღონისძიების დასასრულს, მონაწილეებმა სურვილი გამოთქვეს შეხვედრების გაგრძელებისა და ერთობლივი პროექტების განხორციელებისა.

ბათუმის შოთა რუსთაველის სახელმწიფო უნივერსიტეტის ბაზაზე სამედიცინო კორპორაცია „ევექსის“ ორგანიზებითა და უმაღლესი საგანმანათლებლო დაწესებულების მხარდაჭერით სასწავლო ცენტრი გაიხსნა. სამედიცინო განათლებისა და მედიკოსთა პროფესიული განვითარების ცენტრი სწავლების თანამედროვე მეთოდებით, თეორიული ლექცია–სემინარებისა და პრაქტიკული მეცადინეობის გზით უზრუნველყოფს სტუდენტებისა და სამედიცინო პერსონალის პრაქტიკულ უნარ-ჩვევებზე დაფუძნებულ სწავლებას, უწყვეტ სამედიცინო განათლებასა და კვალიფიკაციის ამაღლებას. საერთაშორისო პროფესიულ ასოციაციებსა და ორგანიზაციებთან თანამშრომლობის ფარგლებში, სასწავლო ცენტრში ტრენინგებს ჩაატარებენ გამოცდილი ქართველი და უცხოელი ექსპერტები. სწავლება დაეხმარება აჭარის სამედიცინო პერსონალს მსოფლიო მედიცინის უახლესი მიღწევების გაცნობაში.

შავი ზღვის დაცვის დღე ბათუმის შოთა რუსთაველის სახელმწიფო უნივერსიტეტში ვორქშოფით - „ჩვენი შავი ზღვა“ აღინიშნა. საბუნებისმეტყველო მეცნიერებათა და ჯანდაცვის ფაკულტეტის ორგანიზებით გამართულ სემინარზე სტუდენტებმა მოხსენებები წარმოადგინეს შავი ზღვის დაცვის აქტუალურ საკითხებზე. ვორქშოფის მონაწილეებმა იმსჯელეს ისეთ მნიშვნელოვან თემებზე, როგორიცაა: „შავი ზღვის ეკოლოგიური პრობლემები“, „შავი ზღვა - პრობლემები, მიზეზები, შედეგები“, „ნავთობი და შავი ზღვა“, „წყალარინების მდგომარეობა აჭარაში“, „მდინარე დუნაის გავლენა შავი ზღვის დაბინძურებაზე“ და „ურბანიზაციის პროცესების გავლენა აჭარაში ეკოტურიზმის განვითარებაზე“. ღონისძიება ბათუმის დელფინარიუმსა და აკვარიუმში გაგრძელდა. ბათუმის შავი ზღვის ფლორისა და ფაუნის სამეცნიერო-კვლევითი ცენტრის წარმომადგენლებმა: ტარიელ წეროძემ, ქეთევან გერაძემ და მზია ბურჭულაძემ სტუდენტებს ზღვის ძუძუმწოვრებისა და თევზების მრავალგვარობა გააცნეს. ასევე ისაუბრეს ზღვის ცხოველთა ბიოლოგიაზე, ქცევის თავისებურებებზე, ეკოლოგიური სტატუსსა და მათი დაცვის აუცილებლობაზე.

ბათუმის შოთა რუსთაველის სახელმწიფო უნივერსიტეტში დაავადებათა კონტროლისა დასაზოგადოებრივი ჯანმრთელობის ეროვნული ცენტრის გენერალური დირექტორის მოადგილემ, პაატა იმნაძემ საჯარო ლექცია წაიკითხა თემაზე: „ჰემორაგიული ცხელებებით მიმდინარე დაავადებები“. საბუნებისმეტყველო მეცნიერებათა და ჯანდაცვის ფაკულტეტის სტუდენტები და პროფესორ-მასწავლებლები ინფექციის გადაცემის გზებს, მკურნალობის, პრევენციის და კონტროლის საკითხებს, პერსონალური დამცავ საშუალებებასა და ხელსაწყოების (PPE) სწორად გამოყენების წესებს გაეცნენ. ლექციაზე ყურადღება იყო გამახვილებული ებოლას ვირუსზე, ყირიმ კონგოს ჰემორაგიული ცხელებასა და სხვა აქტუალურ საკითხებზე.