საბუნებისმეტყველო მეცნიერებათა და ჯანდაცვის ფაკულტეტის სტუდენტებმა ორნითოლოგებთან და ეკოლოგებთან ერთად, გადამფრენ ფრინველთა დაკვირვების პროცესში მიიღეს მონაწილეობა. საერთაშორისო არასამთავრო ორგანიზაციის “Batumi Raptor Count”-ის ორგანიზებით ყოველწლიურად ხდება „ბათუმის სამიგრაციო ძაბრის“ ტერიტორიაზე ფრინველების აღწერა და კვლევა. ფრინველთა გადაფრენის საველე სამუშაოებში ბიოლოგიის მე-2 კურსისა და ეკოლოგიის მე-3 კურსის სტუდენტები ბათუმის შოთა რუსთაველის სახელმწიფო უნივერსიტეტის ასისტენტ-პროფესორების ლალი ჟღენტისა და ინგა დიასამიძის ხელმძღვანელობით ჩაერთნენ.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის დოქტორანტმა თეა ქოიავამ, მეცნიერ-ხელმძღვანელმა პროფესორმა ლეილა ახვლედიანმა შოთა რუსთაველის ეროვნული სამეცნიერო ფონდის „2013-2014 წლების დოქტორანტურის საგანმანათლებლო პროგრამების“გრანტის ფარგლებში მონაწილეობა მიიღეს საერთაშორისო სამეცნიერო კონფერენციაში ,,Clinical Microbiology and Microbial Genomics 2014”. ესპანეთში ქალაქ ვალენსიაში გამართულ ერთკვირიან სამეცნიერო სესიაზე დოქტორანტმა მოხსენება წარადგინა თემაზე:„Antibiotics Sensitivity of Microorganism Causing Nosocomial Infections“.

საბუნებისმეტყველო მეცნიერებათა და ჯანდაცვის ფაკულტეტის სხვადასხვა სპეციალობის სტუდენტებმა აქციაში - ,,დავასუფთავოთ მსოფლიო“ მიიღეს მონაწილეობა და მდინარე ჭოროხის დელტის მიდამოების ზღვის სანაპირო დაასუფთავეს. ღონისძიება ბათუმის შოთა რუსთაველის სახელმწიფო უნივერსიტეტის ბიოლოგიის დეპარტამენტის, აჭარის გარემოს დაცვისა და ბუნებრივი რესურსების სამმართველოს, არასამთავრობო ორგანიზაცია ,,საქართველოს მწვანეთა მოძრაობა/დედამიწის მეგობარი“ ორგანიზებით გაიმართა და მიზნად ისახავდა საზოგადოების ცნობიერების ამაღლებას. საერთაშორისო ინიციატივას საფუძველი ჩაეყარა 1992 წელს, გაეროს გარემოს დაცვითი პროგრამის ინიციატივით და მასში 121 ქვეყანაა ჩართული. საქართველო აქციას 2010 წელს შეუერთდა და ქვეყანაში ყოველწლიურად იმართება მყარი საყოფაცხოვრებო ნარჩენებისგან გარემოს დასუფთავების აქციები.

ბათუმის შოთა რუსთაველის სახელმწიფო უნივერსიტეტს პოლონეთის კატოვიცას უნივერსიტეტთან გაფორმებული მემორანდუმის ეგიდით, სილესიას სამედიცინო ფაკულტეტის დეკანი, პროფესორი იან ზეიდა ეწვია. რექტორთან გამართულ შეხვედრაზე ექსპერტ–ეპიდემიოლოგმა სამომავლო თანამშრომლობის მიმართულებებსა და ერთობლივ სასწავლო-სამეცნიერო პროექტებზე ისაუბრა. ევროპაში რესპირატორული დაავადებათა გავრცელების მკვლევარმა ვიზიტის ფარგლებში სტუდენტებისათვის საჯარო ლექცია ჩაატარა ასთმის დიაგნოსტირების საკითხებზე. მომხსენებელმა ისაუბრა დაავადების სირთულეებსა და რესპირატორული დაავადებების გამომწვევ გარემოებებზე. პროფესორ ზეიდას ხელშეწყობით ბათუმის დედათა და ბავშვთა ალერგოლოგიური ცენტრი სილესიის უნივერსიტეტის ეპიდემიოლოგიურ დეპარტამენტთან ერთად, ახორციელებს რესპირაციულ დაავადებათა შესწავლის პროექტს, რომელიც ითვალისწინებს აჭარის I-VIII კლასის 6000 მოსწავლის რესპირატორული დაავადებისა და ასთმის დიაგნოსტიკას. პროგრამის მიზანია რეგიონში ასთმის დიაგნოსტირების გაუმჯობესება და მისი გაკონტროლება.

ბათუმის რეფერალური საავადმყოფოს ბაზაზე ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისათვის USAID-ის პროგრამა „შენარჩუნების“ მხარდაჭერით ტრენინგი ჩატარდა თემაზე: „დიპლომამდელი სამედიცინო განათლების რეფორმა“. თბილისის სახელმწიფო სამედიცინო უნივერსიტეტის პროფესორმა თინათინ ჩიქოვანმა, ასისტენტ პროფესორმა თამარ ანელავამ და თინათინ გაგუამ საბუნებისმეტყველო მეცნიერებათა და ჯანდაცვის ფაკულტეტის ჯანდაცვის მიმართულების აკადემიურ პერსონალს სამედიცინო განათლების მნიშვნელოვანი საკითხები გააცნეს. სამედიცინო განათლების რეფორმის ინიციატივის ფარგლებში, უნივერსიტეტთან არსებულ სამედიცინო განათლებისა და მედიკოსთა პროფესიული განვითარების ცენტრს უსასყიდლოდ გადმოეცა სამეანო და გინეკოლოგიური სიმულატორების სრული პაკეტი.