ბათუმის შოთა რუსთაველის სახელმწიფო უნივერსიტეტში აგროიდეების პრე-აქსელერაციის პროგრამა AgroDeck-ის საინფორმაციო შეხვედრა გაიმართა. პროგრამის წარმომადგენლებმა შეხვედრაზე ტექნოლოგიური ფაკულტეტის სტუდენტებსა და აკადემიურ პერსონალს პროექტის მიზანი, სააპლიკაციო პროცესი და მისი ეტაპები გააცნეს. AgroDeck-ი მიზნად ისახავს, აღმოაჩინოს და წაახალისოს აგრომიმართულებით არსებული პრაქტიკული და შედეგზე ორიენტირებული იდეები, დაეხმაროს მათ რეალურ პროდუქტად და ფუნქციურ ბიზნესად გადაქცევაში. პროგრამის მონაწილეები რამდენიმე თვის განმავლობაში მიიღებენ თეორიულ ცოდნასა და პრაქტიკულ გამოცდილებას, იმისათვის, რომ თავიანთი იდეა გარდაქმნან სტარტაპად და წარადგინონ პოტენციური ინვესტორების წინაშე.

3-17 მარტს „ერახმუს+“-ის პროგრამის საგრანტო პროექტის „საგანმანათლებლო, სამეცნიერო, მართვისა და ინდუსტრიული კომპონენტების ერთობლიობა კლიმატის მართვისა და კლიმატის ცვლილების პრევენციისთვის” (CLIMAN) ფარგლებში, ტურიბას უნივერსიტეტმა (ლატვია) უმასპინძლა სტუდენტთა სპეციალურ სასწავლო პროგრამას. ბათუმის შოთა რუსთაველის სახელმწიფო უნივერსიტეტიდან სასწავლო ტურში მონაწილეობას ღებულობდნენ აგრარული ტექნოლოგიებისა და მასწავლებლის მომზადების საგანმანათლებლო პროგრამების სტუდენტები: სალომე დუმბაძე, ლუკა ნინიძე, გიორგი მოსიძე, ჯულიეტა ჯიჯავაძე.

ბათუმის შოთა რუსთაველის სახელმწიფო უნივერსიტეტის ტექნოლოგიურმა ფაკულტეტმა მესამე მისიის ფარგლებში, ბათუმის მე-8 საჯარო სკოლის დამამთავრებელი კლასის მოსწავლეებს უმასპინძლა. ინოვაციების ცენტრში ჩატარდა ლექცია თემაზე: „კატასტროფების რისკის მართვა თანამედროვე საინჟინრო გადაწყვეტილებების მიღებისას“. მეთორმეტე კლასის მოსწავლეებმა დაათვალიერეს ფაბლაბ ლაბორატორია, სადაც საშუალება ჰქონდათ, გაცნობოდნენ სტრუქტურული მოდელის აგებას, გაანგარიშებას და მაკეტირებას. შეხვედრის მონაწილეები ასევე ეწვივნენ ელექრტონიკის, ტელეკომუნიკაციისა და ინტერნეტინჟინერიის ლაბორატორიას.

12-14 თებერვალს ბათუმის შოთა რუსთაველის სახელმწიფო უნივერსიტეტის აგროსკოლის/აგრარული ექსტენციის ცენტრს ამერიკის შეერთებული შტატების ვირჯინიის უნივერსიტეტის პროფესორი, ექსტენციის სპეციალისტი რეზა რაფი ეწვია. ვიზიტის ფარგლებში ქობულეთის, ხელვაჩაურის და ქედის მუნიციპალიტეტებში განხორციელდა სამდღიანი საველე სწავლება მოცვის კულტურის სხვლა-ფორმირების საკითხებზე. საველე ტრენინგებს ესწრებოდნენ აგრარული მიმართულების დამამთავრებელი კურსის სტუდენტები, ფერმერები და სამინისტროს ადგილობრივი ექსტენციის სამსახურის წარმომადგენლები. ღონისძიება ჩატარდა USAID პროექტ ფერმერის პროგრამის მხარდაჭერით, რომელსაც ახორციელებს ACDI/VOCA.