ბათუმის შოთა რუსთაველის სახელმწიფო უნივერსიტეტში საქართველოს ინოვაციებისა და ტექნოლოგიების სააგენტოსთან გაფორმებული თანამშრომლობის მემორანდუმის ფარგლებში ინოვაციური ლაბორატორია გაიხსნა. ფაბლაბი ხელს შეუწყობს ინოვაციების, საინფორმაციო ტექნოლოგიების სფეროში ბიზნესისა და აკადემიური სექტორის დაახლოებას, გააღრმავებს სტუდენტების სამუშაო გამოცდილებას და აამაღლებს მათი დასაქმების შანსს. ინოვაციური ლაბორატორიის გახსნის ცერემონიას უნივერსიტეტის რექტორის მოვალეობის შემსრულებელი მერაბ ხალვაში, აჭარის ა.რ. მთავრობის თავმჯდომარე არჩილ ხაბაძე, საქართველოს ეკონომიკის მინისტრი დიმიტრი ქუმსაშვილი, აჭარის ა.რ. ეკონომიკისა და ფინანსთა მინისტრი დავით ბალაძე, აჭარის ა.რ. უმაღლესი საბჭოს თავმჯდომარე ავთანდილ ბერიძე, ქალაქ ბათუმის მერი გიორგი ერმაკოვი, პროფესორ-მასწავლებლები და სტუდენტები ესწრებოდნენ.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის აგროტექნოგიისა და აგროინჟინერიის დეპარტამენტის პროფესორი რეზო ჯაბნიძე საქართველოს სოფლის მეურნეობის მეცნიერებათა აკადემიის ნამდვილ წევრად აირჩიეს. ფაკულტეტის პროფესორ–მასწავლებლები და სტუდენტები ღვაწლმოსილს პროფესორს ულოცავენ პედაგოგიური და სამეცნიერო მოღვაწეობის უდიდეს აღიარებას, უსურვებენ ჯანმრთელობასა და წარმატებებს სამეცნიერო მოღვაწეობაში.

ტექნოლოგიური ფაკულტეტის პირველი კურსის სტუდენტებს თანამშრომლობის მემორანდუმის ფარგლებში, რეგიონში მოქმედი სატელეკომუნიკაციო კომპანიების წარმომადგენლები შეხვდნენ. დამსაქმებლებმა, სატელეკომუნიკაციო კომპანია “სილქნეტის“ სერვის-ცენტრის უფროსმა ნუგზარ ნაკაშიძემ, კომპანია “სილქნეტის“ ტელეკომუნიკაციის განვითარებისა და მომსახურების ცენტრის უფროსმა რევაზ კომახიძემ და სატელეკომუნიკაციო კომპანია „TV-ერა“-ს ტექნიკური სამსახურის უფროსმა ნუგზარ ჭედიამ ახალგაზრდებს გააცნეს დარგის მნიშვნელოვანი საკითხები გააცნეს. ისაუბრეს ტელეკომუნიკაციის მიმართულების როლსა და ფუნქციებზე გლობალური სატელეკომუნიკაციო სივრცისა და თანამედროვე ტექნოლოგიების განვითარებაში. შეხვედრის დასასრულს, მხარეები სამომავლო თანამშრომლობის პერსპექტივებზე შეთანხმდნენ.

ბათუმის შოთა რუსთაველს სახელმწიფო უნივერსიტეტის ტექნოლოგიის ფაკულტეტის პროფესორმა რეზო ჯაბნიძემ ბაქოში გამართულ ევრაზიის ქვეყნების ბიომრავალფეროვნებისადმი მიძღვნილ საერთაშორისო სამეცნიერო კონფერენციაში მიიღო მონაწილეობა. ექვსდღიანი სამეცნიერო სესიაზე მოხსენებები წარმოადგინა ცხრა ქვეყნის ორასამდე მკვლევარმა. მომხსენებლებმა განიხილეს ჰიდრობიოლოგიური კვლევების შედეგები.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და აჭარის ა.რ. სოფლის მეურნეობის მინისტრმა ზაურ ფუტკარაძემ ქობულეთის მუნიციპალიტეტის აგროსერვის ცენტრში თანამშრომლობის მემორანდუმს მოაწერეს ხელი. დოკუმენტი ითვალისწინებს ერთობლივი სასწავლო-საგანმანათლებლო პროექტების განხორციელებას. მხარეთა შეთანხმებით, ტექნოლოგიური ფაკულტეტის სტუდენტები სტაჟირებასთან ერთად სასწავლო პრაქტიკას გაივლიან სამინისტროში, აგროსერვის ცენტრსა და ლაბორატორიულ კვლევით ცენტრში. ახალგაზრდები შეისწავლიან სასოფლო-სამეურნეო კულტურების მოვლა-მოყვანის, გადამუშავების თანამედროვე ტექნოლოგიებისა და ლაბორატორიული კვლევების უახლეს მეთოდებს.