სამხრეთ-დასავლეთ საქართველოს ოსმალთაგან განთავისუფლების ბრძოლის წინამძღოლის სელიმ ხიმშიაშვილის ტრაგიკული აღსასრულიდან 200 წლისადმი მიძღვნილი საერთაშორისო სამეცნიერო კონფერენცია გაიხსნა ბათუმის შოთა რუსთაველის სახელმწიფო უნივერსიტეტში. სესიის მონაწილეებს უნივერსიტეტის რექტორის მოვალეობის შემსრულებელი, ასოცირებული პროფესორი მერაბ ხალვაში, საქართველოს მეცნიერებათა ეროვნული აკადემიის ვიცე-პრეზიდენტი, აკადემიკოსი როინ მეტრეველი, აკადემიკოსი გურამ ლორთქიფანიძე, ნიკო ბერძენიშვილის ინსტიტუტის დირექტორი როინ მალაყმაძე, სტამბოლის ქართველთა კულტურის ცენტრის თავმჯდომარე სეზენ-გონენჩ ოქჩანი, სტამბოლის ქართველთა სათვისტომოს წარმომადგენელი მუსტაფა იაქუთი (გურამ ხიმშიაშვილი) და ქუთაისის აკაკი წერეთლის სახელმწიფო უნივერსიტეტის პროფესორი ავთანდილ ნიკოლაიშვილი მიესალმნენ. კონფერენციაზე ქართველმა და თურქმა მკვლევრებმა მოხსენებები წარმოადგინეს სელიმ ხიმშიაშვილი ცხოვრებასა და მოღვაწეობაზე.

ფაშიზმზე გამარჯვების 70 წლისადმი მიძღვნილი სამეცნიერო სესია გაიმართა ბათუმის შოთა რუსთაველის სახელმწიფო უნივერსიტეტში. ნიკო ბერძენიშვილის ინსტიტუტის მკვლევარებმა, ისტორიის, არქეოლოგიისა და ეთნოლოგიის დეპარტამენტის პროფესორ-მასწავლებლებმა და აჭარის ხარიტონ ახვლედიანის სახელობის მუზეუმის მეცნიერ-თანამშრომლებმა მოხსენებები წარმოადგინეს მეორე მსოფლიო ომის საკითხებზე. კონფერენციის მონაწილეებმა ისეთი მნიშვნელოვანი საკითხები განიხილეს, როგორიცაა „აჭარა მეორე მსოფლიო ომის წლებში“, „მეორე მსოფლიო ომი და თურქეთის მიერ მიტაცებული ქართული ტერიტორიების დაბრუნების საკითხი“, „ჰიტლერის გეგმები მსოფლიოს პოლიტიკური რუკის შეცვლაში“, „ბათუმის შოთა რუსთაველის სახელმწიფო პედაგოგიური ინსტიტუტის წარგზავნილები მეორე მსოფლიო ომში“ და „მეორე მსოფლიო ომში მონაწილე ქალები აჭარიდან“. სამეცნიერო სესია ბათუმის შოთა რუსთაველის სახელმწიფო უნივერსიტეტისა და აჭარის ხარიტონ ახვლედიანის სახელობის მუზეუმის ორგანიზებით ჩატარდა.

შოთა რუსთაველის ეროვნული სამეცნიერო ფონდის “სტამბოლის ქართული სავანის ეპისტოლური და მემუარული მემკვიდრეობის” სამეცნიერო გრანტის ფარგლებში ნიკო ბერძენიშვილის ინსტიტუტის თანამშრომლები (როინ მალაყმაძე, შუშანა ფუტკარაძე, შორენა ფუტკარაძე) მივლინებით თურქეთში იმყოფებოდნენ. მკვლევარები ქალაქ სტამბოლში 16 დღის განმავლობაში სტამბოლის ქართველ კათოლიკეთა ეკლესია–მონასტერთან არსებულ ბიბლიოთეკასა და არქივში მუშაობდნენ. ჩატარდა არსებული ლიტერატურის აღწერა-კატალოგიზაცია და დიგიტალიზაცია, აღიწერა 4 000-მდე ერთეული. აღმოჩნდა ბევრი ქართული მეცნიერებისათვის უცნობი უცხოენოვანი წიგნი საქართველოს შესახებ. არქივში ასევე გამოვლინდა მიხეილ თამარაშვილის, მიქელ თარხნიშვილის, ხასან ხინიკაძის, ვიქტორ ნოზაძის წერილები და საქართველოს დამოუკიდებელი რესპუბლიკის მიერ დიპლომატიური მისიის ხელმძღვანელისათვის, ს. გოგოლაშვილისათვის სტამბოლში გაგზავნილი საქმიანი ქაღალდები.

აჭარის ტრადიციული კულტურის დღის ფარგლებში საქართველოს ფოლკლორის სახელმწიფო ცენტრში სამეცნიერო კონფერენცია გაიმართა თემაზე: „მთიანი აჭარის ეთნოგრაფიულ-ფოლკლორული მემკვიდრეობა“. ნიკო ბერძენიშვილის ინსტიტუტის მკვლევარებმა კოლეგებს სესიაზე ბოლო პერიოდში წარმოებული კვლევის შედეგები გააცნეს და ეთნოგრაფიული მემკვიდრეობის ნიმუშები წარუდგინეს. სამეცნიერო სესიის ფარგლებში ჩატარდა წიგნის „აჭარული საუნჯის“ წარდგინება, გაიხსნა გივი ნახუცრიშვილის ფოტო-გამოფენა „მთიანი აჭარის ეთნოგრაფიული მემკვიდრეობა“ და შედგა დოკუმენტური ფილმის „ხიხანის არწივების“ ჩვენება. კონფერენიცია ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის, საქართველოს ფოლკლორის სახელმწიფო ცენტრის, თბილისის სახელმწიფო კონსერვატორიის ტრადიციული მრავალხმიანობის კვლევის საერთაშორისო ცენტრისა და ბათუმის ხელოვნების სასწავლო უნივერსიტეტის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის მხატვარ-არქიტექტორმა ჯემალ მიქელაძემ ქალაქ ბურსაში გამართულ ფერწერულ გამოფენაში მიიღო მონაწილეობა. გამოფენა თურქეთის რესპუბლიკის ბათუმის საკონსულოს ორგანიზებით გაიმართა და მასში ათი ქართველი მხატვრის ნამუშევარი იყო გამოფენილი. ერთკვირიანი გამოფენა 11 მარტს დასრულდა და ბურსის შემდეგ ბათუმში გადმოინაცვლა.