აკადემიკოს ნიკო ბერძენიშვილის 120 წლისადმი მიძღვნილი სამეცნიერო სესია ჩატარდა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების ნიკო ბერძენიშვილის ინსტიტუტის მკვლევრებმა, ჰუმანიტარულ მეცნიერებათა ფაკულტეტის ისტორიის არქეოლოგიისა და ეთნოლოგიის დეპარტამენტის პროფესორ-მასწავლებლებმა და ბათუმის არქეოლოგიური მუზეუმის მეცნიერ-თანამშრომლებმა კონფერენციაზე მოხსენებები წარმოადგინეს ცნობილი ქართველი მეცნიერის ცხოვრებასა და სამეცნიერო მოღვაწეობაზე. მომხსენებლებმა ისაუბრეს აკადემიკოსის მის მიერ წარმოებული არქეოლოგიური გათხრების შედეგებზე, ჯავახეთის ექსპედიციის დღიურებზე, ისტორიული გეოგრაფიის, ადრეფეოდალური ხანის დასავლეთ საქართველოს ეკლესიისა და რუსეთ-საქართველოს ურთიერთობების პოლიტიკურ საკითხებზე.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის თანამშრომლებმა მონაწილეობა მიიღეს ქედის მუნიციპალიტეტის კულტურის სახლში გამართულ ინსცენირებულ ფოლკლორულ საღამოში „აჭარული ქორწილი“. ღონისძიების მონაწილეებმა ხეობის ტრადიციები და წეს-ჩვეულებები გააცოცხლეს. სამეცნიერო-კვლევითი დაწესებულების მკვლევრებმა კულტურის სახლის ბიბლიოთეკას საჩუქრად გადასცეს წიგნები „აჭარული საუნჯე “ და „გამონათლევი“.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის მკვლევრებმა სტამბოლის ქართულ სავანეში, სტამბოლის ქართველ კათოლიკეთა ეკლესიის ფონდთან შექმნილ ბიბლიოთეკასა და არქივში სამეცნიერო ექსპედიცია აწარმოეს. ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მეცნიერ-თანამშრომლები: შუშანა ფუტკარაძე (განყოფილების ხელმძღვანელი), ნარგიზ ახვლედიანი, ციალა ნარაკიძე და დოქტორანტი შორენა ფუტკარაძე სავანეში ერთი თვის განმავლობაში მუშაობდნენ. ექსპედიციის წევრებმა შეისწავლეს და აღწერეს სავანეში დაცული ბიბლიოთეკა (5135 წიგნი), აღმოჩნდა ინგლისურ, ფრანგულ, იტალიურ, ლათინურ ენებზე შექმნილი ლიტერატურა საქართველოს შესახებ, რომელთა დიდი ნაწილი უცნობია ქართველი მკითხველისათვის.

დევიდ ბრაუნდის წიგნი „საქართველო ანტიკურ ხანაში (კოლხეთისა და ამიერკავკასიის იბერიის ისტორია ძვ.წ. 550 - ახ.წ. 562 წლები)“ გამოიცა. ნაშრომი წარმოადგენს საქართველოს ფარგლებს გარეთ გამოცემულ (1994 წ.) პირველ სრულ ისტორიას ანტიკური ხანის საქართველოს შესახებ. იგი მომზადებულია ათწლეულების მანძილზე საქართველოში ჩატარებული მასშტაბური არქეოლოგიური სამუშაოების შედეგების საფუძველზე. წიგნი ემსახურება ძველი საქართველოს ისტორიის წარმოჩენას მსოფლიო სამეცნიერო საზოგადოების წინაშე და წარმოადგენს დასავლეთის მეცნიერებისათვის ნაკლებად შესწავლილი რეგიონის ისტორიას.

წმიდა მღვდელმთავარ ალექსანდრეს დაბადებიდან 190 წლისადმი მიძღვნილი საიუბილეო სამეცნიერო სესია გაიმართა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების მკვლევარებმა და პროფესორ-მასწავლებლებმა კონფერენციაზე მოხსენებები წარმოადგინეს წმინდანის ცხოვრებაზე, მოღვაწეობასა და ღვაწლზე.