17-20 ივლისს ბათუმის შოთა რუსთაველის სახელმწიფო უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის ერთობლივი კავკასიის მეექვსე საერთაშორისო სიმპოზიუმი „პოლიმერები და მოწინავე მასალები“ გაიმართება. საერთაშორისო სიმპოზიუმში მონაწილოებას მიიღებენ მეცნიერები საქართველოს, გერმანიის, საფრანგეთის, პოლონეთის, ბელგიის ყაზახეთის, ბელორუსიის, უკრაინის, სომხეთის, აზერბაიჯანის ირანის და სხვა ქვეყნების სამეცნიერო ცენტრებიდან. სიმპოზიუმის მიზანია პოლიმერებისა და მათ საფუძველზე მიღებული კომპოზიციური მასალების, კომპოზიტების სფეროში არსებული თანამედროვე სამეცნიერო-ტექნიკური ნამუშევრების შედეგების განხილვა და ახალი, პრაქტიკაში ფართოდ გამოყენებადი პოლიმერული მასალების წარმოჩენა.

სამეგრელო-ზემო სვანეთის რეგიონის საინვესტიციო ბიზნეს ფორუმში მონაწილეობა მიიღო ბსუ-ს აგრარული და მემბრანული ტექნოლოგიების ინსტიტუტის აგრარული და კვების პროდუქტების განყოფილების უფროსმა მეცნიერ-თანამშრომელმა ასლან დევაძემ. ფორუმის ფარგლებში საქართველოს სოფლის მეურნეობის მინისტრის მოადგილესთან გიორგი ხანიშვილთან და საქართველოს სოფლის მეურნეობის პროექტების მართვის სააგენტოს დირექტორთან პაატა შეყილაძესთან გამართულ შეხვედრაზე მკვლევარმა ინსტიტუტის სამეცნიერო კვლევების შედეგებზე, მათი მეწარმეობის განვითარებაში გამოყენების პოტენციალზე ისაუბრა.

ბსუ-ს აგრარული და მემბრანულ ტექნოლოგიების სასოფლო სამეურნეო ნედლეულის წარმოებისა და გადამუშავების ტექნოლოგიების განყოფილება ანალიტიკური და გამზომი თანამედროვე ხელსაწყო დანადგარების გამოყენებით მუშაობს აგროსფეროს მეწარმეების მიერ წარმოდგენილი ნიადაგის ნიმუშების ნაყოფიერების დადგენაზე, რეკომენდაციების მომზადებაზე, გაცემასა და სასწავლო საკონსულტაციო მომსახურეობის გაწევაზე. პროგრამა ხელს უწყობს განყოფილების კვლევის შედეგების კომერციალიზაციის გაფართოებას, ხელშემწყობი გარემოს შექმნას, განათლების მეცნიერებისა და ბიზნესის ინტეგრაციას.

აგრარული და მემბრანული ტექნოლოგიების ინსტიტუტის სასოფლო-სამეურნეო ნედლეულის წარმოებისა და გადამუშავების ტექნოლოგიების განყოფილების უფროსმა მეცნიერ-თანამშრომელმა ასლან დევაძემ მონაწილეობა მიიღო 25-26 თებერვალს, ქუთაისში მეწარმეობის განვითარების ხელშემწყობი ფონდის მიერ ორგანიზებულ შეხვედრაში. მკვლევარმა ღონისძიების მონაწილეებს გააცნო ინსტიტუტის მიერ შემუშავებული ტექნოლოგიების გამოყენებითი პოტენციალი, ბიზნესპროექტების მონაცემთა ბაზა, საინვესტიციო რესურსები, საწარმოო და მომსახურების ინფრასტრუქტურის ჩამოყალიბების პრიორიტეტები. შეხვედრაზე დაიგეგმა მეცნიერული კვლევის შედეგების დანერგვა აგროსფეროს სხვადასხვა დარგში.