ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და უნივერსიტეტის ადმინისტრაციის ხელმძღვანელი ალექსანდრე მითაიშვილი ბსუ-ს გოგონათა ფოლკლორულ ანსამბლ „თირინის“ წევრებსა და ხელმძღვანელს თეიმურაზ დოლიძეს შეხვდნენ. გოგონათა ანსამბლმა რამდენიმე დღის წინ მონაწილეობა მიიღო ბულგარეთის ცეკვისა და სიმღერის საერთაშორისო ფესტივალში - „ოქროს დღეები“. ბსუ-ს რექტორმა მერაბ ხალვაშმა და ადმინისტრაციის ხელმძღვანელმა ალექსანდრე მითაიშვილმა ანსამბლის წევრებს ფესტივალში წარმატებულად მონაწილეობა მიულოცეს და მადლობა გადაუხადეს უნივერსიტეტისა და ქართული ხელოვნების პოპულარიზაციისათვის.

ბათუმის შოთა რუსთაველის სახელმწიფო უნივერსიტეტის გოგონათა ფოლკლორული ანსამბლი „თირინი’’ ბულგარეთის ცეკვისა და სიმღერის საერთაშორისო ფესტივალში „ოქროს დღეები“ ღებულობს მონაწილეობას. ბულგარეთის ქალაქ ვარნაში გამართულ ფესტივალში ათი ქვეყნის შემოქმედებითი ჯგუფები არის წარმოდგენილი. ღონისძიება მიზნად ისახავს ხალხური მუსიკალური და ქორეოგრაფიული ხელოვნების გაცნობასა და პოპულარიზაციას.

ბათუმის შოთა რუსთაველის სახელმწიფო უნივერსიტეტის სტუდენტებისათვის ტრენერმა მარიამ ბერიძემ მასტერკლასი - „როგორ მოვემზადოთ გასაუბრებისათვის“- ჩაატარა. ტრენერმა ახალგაზრდებს ის გამოწვევები, პრობლემები და მათი მოგვარების გზები გააცნო, რომელთაც სამსახურის მაძიებლები აწყდებიან. მარიამ ბერიძე საერთაშორისო ორგანიზაცია GROWIN–ის სერტიფიცირებული ტრენერია.

ბათუმის შოთა რუსთველის სახელმწიფო უნივერსიტეტში ვიქტორინის „ბსუ-ს ინტელექტუალი - 2019“ ფინალური ტური გაიმართა. ვიქტორინაში უნივერსიტეტის სხვადასხვა ფაკულტეტის სტუდენტებისაგან დაკომპლექტებული 30 გუნდი მონაწილეობდა. ბსუ-ს 2019 წლის გაზაფხულის სეზონის ინტელექტუალური ვიქტორინის ფინალურ შეხვედრაში პირველობისთვის 10 ფინალისტი გუნდი იბრძოდა. პირველი ადგილი გუნდმა „ატარაქსიამ“ დაიკავა, მეორე ადგილი „ინკვიზიციამ“, ხოლო მესამე საპრიზო ადგილზე „ბონზუ პიპინ პოდლი ოპსო კოპოლისი“ გავიდა. ვიქტორინის დასასრულს 10 ფინალისტ გუნდს, ჟიურის წევრებს და პირველობის მხარდამჭერ მაია ბარამიძეს სიგელები გადაეცათ. შეჯიბრი უნივერსიტეტის სტუდენტთა კარიერული განვითარების, კულტურისა და სპორტის დეპარტამენტის ორგანიზებით და პროფესორ გიორგი მასალკინის ხელმძღვანელობით გაიმართა.

ბათუმის შოთა რუსთაველის სახელმწიფო უნივერსიტეტში საუნივერსიტეტო სპორტული ტურნირი ჩატარდა. შეჯიბრში სხვადასხვა უმაღლესი საგანმანათლებლო დაწესებულების სტუდენტებთან ერთად აბიტურიენტები მონაწილეობდნენ. პირველობა მკლავჭიდში, წოლჭიმსა და ბაგირის გადაწევაში გაიმართა და მიზნად ისახავდა ჯანსაღი ცხოვრების წესის ხელშეწყობას. მკლავჭიდში I ადგილი 75 კგ წონით კატეგორიაში აბიტურიენტმა რამინ მარკოიძემ მოიპოვა, მძიმე წონით კატეგორიაში I ადგილი ბსუ-ს ეკონომიკისა და ბიზნესის ფაკულტეტის სტუდენტს გიორგი საფარიძეს ერგო. ბაგირის გადაწევაში ბათუმის შოთა რუსთაველის სახელმწიფო უნივერსიტეტის შვიდი სტუდენტისგან დაკომპლექტებულმა გუნდმა გაიმარჯვა. წოლჭიმში I ადგილი დაიკავა (140 კგ. ) და უნივერსიტეტის რეკორდი დაამყარა ბსუ-ს ტექნოლოგიური ფაკულტეტის სტუდენტმა მანუჩარ მარკოიძემ.