ბათუმის შოთა რუსთაველის სახელმწიფო უნივერსიტეტში ბსუ-ს ეკონომიკისა და ბიზნესის ფაკულტეტის 2024 წლის კურსდამთავრებულთა გამოშვების საზეიმო ცერემონია გაიმართა. მანტიებში გამოწყობილ კურსდამთავრებულებს უნივერსიტეტის რექტორმა მერაბ ხალვაშმა, ფაკულტეტის დეკანმა ნათია წიკლაშვილმა, ადმინსტრაციის ხელმძღვანელმა მერაბ დიასამიძემ, აჭარის ა.რ. სოფლის მეურნეობის მინისტრმა ზაზა შავაძემ, აჭარის ა.რ. ფინანსთა და ეკონომიკის მინისტრის მოადგილემ უჩა სურმანიძემ, რექტორის მოადგილემ თამარ სირაძემ, ფაკულტეტის კურსდამთავრებულმა გია სურმანიძემ და ფაკულტეტის პროფესორ-მასწავლებლებმა სწავლის დასრულება მიულოცეს. ეკონომიკისა და ბიზნესის ფაკულტეტის საბაკალავრო და სამაგისტრო საგანმანათლებლო პროგრამები 220-მა სტუდენტმა დაამთავრა.

ბათუმის შოთა რუსთაველის სახელმწიფო უნივერსიტეტსა და ვროცლავის მერიტო უნივერსიტეტს შორის დადებული თანამშრომლობის ფარგლებში, ბსუ-ს ფინანსური მხარდაჭერით პოლონეთის მერიტო უნივერსიტეტის ბიზნესის კვირეულში მონაწილეობა მიიღო ბსუ-ს ეკონომიკისა და ბიზნესის ფაკულტეტის ბაკალავრიატის საგანმანათლებლო პროგრამის ოთხმა და სამაგისტრო საგანმანათლებლო პროგრამის ერთმა სტუდენტმა. კვირეულში მონაწილე 8 ქვეყნის 39 სტუდენტმა ჯგუფურ დისკუსიებსა და დებატებში ჩართვის შემდეგ, ფინალურ ეტაპზე მოამზადა დასკვნითი პროექტები. მონაწილეებს გადაეცათ საერთაშორისო სერტიფიკატები (3 კრედიტი).

საქართველოს ეკონომიკისა და მდგრადი განვითარების სამინისტროს ენერგეტიკული პოლიტიკისა და საინვესტიციო პროექტების დეპარტამენტის წარმომადგენლებმა ბათუმის შოთა რუსთაველის სახელმწიფო უნივერსიტეტის სტუდენტებს ანაზღაურებადი სტაჟირების პროგრამა წარუდგინეს. საქართველოს ენერგეტიკულ საწარმოებში ანაზღაურებად სტაჟირებას მაღალი აკადემიური მოსწრების მქონე სტუდენტები სამინისტროსთან გაფორმებული თანამშრომლობის მემორანდუმის ფარგლებში გაივლიან. პროგრამით სარგებლობა არა მხოლოდ ენერგეტიკული მიმართულების, არამედ სხვადასხვა ფაკულტეტის სტუდენტებს შეუძლიათ.

ბსუ-ს ეკონომიკისა და ბიზნესის ფაკულტეტის დეკანი, პროფესორი ნათია წიკლაშვილი 17-22 აპრილს მიწვეული იყო ლიეტუვაში, მიკოლას რომერის უნივერსიტეტში. შეხვედრები შედგა საზოგადოებრივი უსაფრთხოების აკადემიის დეკანთან პროფესორ სნიეგულე მატულნეს, დეკანის მოადგილე პროფესორ აურელია პურაიტესა და საერთაშორისო პროექტების მიმართულებით დეკანის თანაშემწე კატერინა პოლუპანოვასთან. ასევე შეხვედრა გაიმართა საჯარო მმართველობისა და ბიზნესის ფაკულტეტის დეკანის მოადგილესთან პროფსორ გიედრე ვალუნაიტე ოლეშკევიჩენესთან. შეხვედრაზე მხარეებმა განიხილეს გაცვლით პროგრამებში სტუდენტების უფრო აქტიურად ჩართვის, სტაჟირებისა და მკვლევრების ერთობლივი კვლევითი პროექტების მომზადების საკითხები. დაიგეგმა ერთობლივი პროგრამების მომზადებისთვის შემდგომი შეხვედრები.

ბსუ-ს ეკონომიკისა და ბიზნესის ფაკულტეტის პროფესორებმა 18-19 აპრილს მონაწილეობა მიიღეს ლიეტუვაში (ქ. ვილნიუსი, კაუნასი), მიკოლას რომერის უნივერსიტეტის საზოგადოებრივი უსაფრთხოების აკადემიის მიერ ორგანიზებულ ყოველწლიურ საერთაშორისო სამეცნიერო ფორუმის მუშაობაში. პროფესორმა ბადრი გეჩბაიამ (თანაავტორი ასისტენტ პროფესორი ქ.გოლეთიანი) მოხსენება წარადგინა თემაზე: „ადამიანური რესურსების როლი კომპანიის მდგრადი განვითარების მიზნების მისაღწევად“, ასისტენტ პროფესორმა გიორგი ქათამაძემ (თანაავტორი ასოცირებული პროფესორი ნატო ჯაბნიძე) მოხსენება წარადგინა თემაზე: მცირე და საშუალო ბიზნესის ბაზრის დივერსიფიკაციის თანამედროვე გამოწვევები.