შვედური ინსტიტუტის (SI) კურსდამთავრებულთა ასოციაციამ საქართველოში ბათუმის შოთა რუსთველის სახელმწიფო უნივერსიტეტის სტუდენტებისათვის შვედეთის მთავრობის სტიპენდიების წარდგინება გამართა. ასოციაციის წარმომადგენლებმა ახალგაზრდებს SI ვიზბის რეგიონის სტიპენდია (Visby Scholarship) და შვედეთის მთავრობის მიერ დაფინანსებული სხვა სასწავლო, გაცვლითი და სტაჟირების პროგრამები გააცნეს. სტიპენდიები ითვალისწინებს სწავლებას ყველა სპეციალობის ბაკალავრიატის სტუდენტებისათვის, მაგისტრანტებისათვის, დოქტორანტებისა და უნივერსიტეტის აკადემიური პერსონალისთვის. SI-ს კურსდამთავრებულთა ასოციაცია საქართველოში 2015 წლის ნოემბერში დაფუძნდა და დღემდე, მისი მხარდაჭერით 150-ზე მეტმა ახალგაზრდამ მიიღო განათლება შვედეთის წამყვან უნივერსიტეტებში.

ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სტუდენტებს ბათუმის რაიონული პროკურატურის პროკურორები შეხვდნენ. საინფორმაციო ხასიათის შეხვედრაზე მონაწილეებმა განიხილეს ისეთი პრობლემატური საკითხები, როგორიცაა: ადევნება და კოორდინატორის ინსტიტუტის როლი, კოორდინატორის ფუნქციები და მოვალეობები, ოჯახში ძალადობა და მისი ელემენტები. შეხვედრაზე პროკურორებმა ასევე ისაუბრეს იმ პრობლემებზე, რომელებიც დაზარალებული სისხლის სამართლის სამართალწარმოების დროს ექმნებათ.

დემოკრატიული ჩართულობის ცენტრების პროექტის „ადამიანის უფლებების საკითხებზე ინფორმაციის გაცვლის პროცესის გაუმჯობესება ცენტრსა და რეგიონებს შორის“ ფარგლებში ბათუმის შოთა რუსთაველის სახელმწიფო უნივერსიტეტში სემინარი ჩატარდა ადამიანის უფლებათა დაცვის საკითხებზე. სტუდენტებს უფლებების დაცვის სამდივნოს უფროსი ნატალია ჯალიაშვილი და ამავე სამდივნოს მრჩეველი თორნიკე დვალი სოციალური და სამოქალაქო-პოლიტიკური უფლებების ურთიერთდამოკიდებულებასა და მათი განუყოფლობის საკითხებზე ესაუბრენ. ყურადღება გაამახვილეს ასევე საქართველოს ევროინტეგრაციის პროცესის კონტექსტში სახელმწიფოს მზარდ სოციალურ პასუხისმგებლობაზე და სოციალური უფლებების რეალიზების მნიშვნელობაზე სამოქალაქო-პოლიტიკური უფლებების გათვალისწინებით.

„მნიშვნელოვანი რეფორმები ნარკოპოლიტიკისა და მართლმსაჯულების სფეროში“-ამ თემაზე ბათუმის შოთა რუსთაველის სახელმწიფო უნივერსიტეტში ადამიანის უფლებების სწავლებისა და მონიტორინგის ცენტრის (EMC) ორგანიზებით შეხვედრა გაიმართა.

იურიდიული ფაკულტეტის სტუდენტების ორგანიზებით ბათუმის შოთა რუსთაველის სახელმწიფო უნივერსიტეტში პოეზიის საღამო „პოეზიის კოდექსი“ გაიმართა. ღონისძიებაზე ახალგაზრდებმა და მწერლებმა ქართული პოეზია განიხილეს და ქართული ლექსის თემატიკაზე ისაუბრეს. პოეზიის საღამოზე იურიდიული ფაკულტეტის სტუდენტების შემოქმედებასთან ერთად, წარმოდგენილი იყო თანამედროვე ავტორების პოეზია.