შიდსთან ბრძოლის საერთაშორისო დღეს მიეძღვნა ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის დეკანის, ასოცირებულ პროფესორის ქეთევან ბერიძის საჯარო ლექცია. მომხსენებელმა სტუდენტებს აივ ინფექციითა და შიდსით დაავადების გზებზე, რისკებზე, აქტუალურ პრობლემებსა და პრევენციის გზებზე ესაუბრა. მსოფლიო პანდემიამ 1981 წლიდან დღემდე 30 მილიონზე მეტი ადამიანის სიცოცხლე იმსხვერპლა და მსოფლიო ისტორიაში შევიდა ერთ-ერთი ყველაზე დამანგრეველი და დესტრუქციული ეპიდემიის სახელით.

შშმ პირთა საერთაშორისო დღე ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის სტუდენტებმა და პროფესორ-მასწავლებლებმა ბათუმის #6 საჯარო სკოლის შეზღუდული შესაძლებლობების მქონე მოსწავლეებთან ერთად აღნიშნეს. ზოგადსაგანმანათლებლო დაწესებულების აღსაზრდელები ბსუ-ში არსებული ცეკვის მოყვარულთა წრის გაკვეთილს დაესწრნენ, სწრაფი კვების ობიექტის მუშაობაში ჩაერთნენ, მოსწავლე-ახალგაზრდობის სასახლეში გობელენზე მუშაობის სპეციფიკას გაეცნენ და მხატვრულ კითხვაში მიიღეს მონაწილეობა. 2 დეკემბერს სტუდენტები ბათუმის #2 საჯარო სკოლას ეწვივნენ და შშმ მოსწავლეებს ბათუმის საჯარო ბიბლიოთეკასთან არსებული ამერიკული კუთხე წარუდგინეს. ღონისძიების დასასრულს პროექტის მონაწილეებს ფასიანი საჩუქრები გადაეცა, ხოლო ბსუ-ს სწრაფი კვების ობიექტმა მასპინძლობა გაუწია. პროგრამა მიზნად ისახავდა შეზღუდული შესაძლებლობების მქონე მოსწავლეების საზოგადოებაში ეფექტურად ჩართვას და მათთვის ტექნოლოგიების ხელმისაწვდომობის გაცნობიერებას.

ბათუმის შოთა რუსთაველის სახელმწიფო უნივერსიტეტის ზოგიერთი სტუდენტისთვის 2015-2016 სასწავლო წლის შემოდგომის სემესტრში საფაკულტეტო სახელობითი შოთა რუსთაველის, ხუსეინ ნაკაიძისა და ავთანდილ ბარათაშვილის სახელობის სტიპენდიების დანიშვნის შესახებ ბსუ-ს რექტორის 2015 წლის 06 ნოემბრის N01-09/706 ბრძანების საფუძველზე, სოციალურ და პოლიტიკურ მეცნიერებათა ფაკულტეტის სტუდენტებს: ქეთევან დევაძეს - ტბელ აბუსერისძის საფაკულტეტო, ხოლო ზეინაბ ბერიძეს - ხუსეინ ნაკაიძის საუნივერსიტეტო სახელობითი სტიპენდიები დაენიშნათ. ფაკულტეტი ულოცავს სტუდენტებს წარმატებებს.

ფსიქოლოგიის მეცნიერებათა დოქტორის, ივანე ჯავახიშვილის სახელობის თბილისის სახელმწიფო უნივერსიტეტის პროფესორ თამარ გაგოშიძის საჯარო ლექციების ციკლი დაიწყო ბათუმის შოთა რუსთაველის სახელმწიფო უნივერსიტეტში. ღონისძიება აჭარის ა.რ. განათლების, კულტურისა და სპორტის სამინისტროს „უმაღლესი განათლების ხელშეწყობის“ პროექტის ფარგლებში ტარდება და მიზნად ისახავს ნეიროფსიქოლოგიის, როგორც ახალგაზრდა და განვითარებადი ფსიქოლოგიის დარგის გაცნობას ფართო საზოგადოებისათვის. მომხსენებელი სამი დღის განმავლობაში ლექციებს წაიკითხავს შემდეგ თემებზე: „ნეიროფსიქოლოგია, როგორც ინტერდისციპლინური მეცნიერება და მისი როლი ადამიანის ქცევის გაგებაში“, „მეტყველებისა და კომუნიკაციის დარღვევები ბავშვებში“ და „დემენციების ნეიროფსიქოლოგია“.

სოციალურ და პოლიტიკურ მეცნიერებათა ფაკულტეტის ფსიქოლოგიის სპეციალობის სტუდენტებისათვის ამერიკელმა ფსიქოლოგმა, კლინიკური ფსიქოლოგიის სპეციალისტმა, ფსიქოლოგიის მეცნიერებათა დოქტორმა მარკ ჰოუვიმ წაიკითხა საჯარო ლექცია ფსიქოლოგიის აქტუალურ საკითხებზე. მომხსენებელმა ისაუბრა აშშ-ის საგანმანათლებლო სივრცეში ფსიქოლოგიის სასწავლო დისციპლინის აქტუალობასა და კროსკულტურული და სამხედრო ფსიქოლოგიის სწავლების პრაქტიკულ საკითხებზე. საჯარო ლექცია კითხვა პასუხის რეჟიმში წარიმართა და ცნობილმა ფსიქოლოგმა სტუდენტების შეკითხვებს უპასუხა.