ბათუმის შოთა რუსთაველის სახელმწიფო უნივერსიტეტში სამეცნიერო კონფერენცია ისტორია და პოლიტიკური მეცნიერება გაიმართა. სესიის მიზანი იყო პოლიტიკური მეცნიერებების სწავლების და სწავლის პროცესში ისტორიის ადგილის და როლის, არსებული მდგომარეობის, გამოწვევების და პრობლემების წარმოჩენა და შეფასება. ბათუმელმა და თბილისელმა მომხსენებლებმა განიხილეს ისეთი საკითხები, როგორიცაა: პოლიტიკური განათლება, ისტორიის ინსტიტუციონალიზაცია პოლიტიკის მეცნიერებაში, ისტორიის გამოყენება პოლიტიკის მეცნიერებების ცალკეული კურსების სწავლების პროცესში, ისტორიის და პოლიტიკის ურთიერთმიმართების ცალკეული საკითხები.
დაუნის სინდრომის საერთაშორისო დღეს ბათუმის შოთა რუსთველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტმა რამდენიმე ღონისძიება მიუძღვნა. ფსიქოლოგიის სპეციალობის IV კურსის სტუდენტებმა უნივერსიტეტსა და ბათუმის #16 ბაღში საინფორმაციო-საგანმანათლებლო შეხვედრები ჩაატარეს. მომავალმა ფსიქოლოგებმა დაუნის სინდრომზე, მის გამომწვევ მიზეზებზე, მახასიათებელ თვისებებსა და დაუნის სინდრომის მქონე ბავშვებთან მომუშავე ფსიქოლოგის როლზე ისაუბრეს. ღონისძიების დასასრულს, მონაწილეებს საინფორმაციო ფლაერები დაურიგდათ.
ბავშვთა და ახალგაზრდების ძალადობისგან დაცვა - ამ თემაზე ბათუმის შოთა რუსთაველის სახელმწიფო უნივერსიტეტის, საქართველოს საზოგადოებრივი ჯანდაცვის ფონდისა და საზოგადოებრივი ორგანიზაციის „სთეფ ფორვარდი“ ორგანიზებით სამუშაო შეხვედრა გაიმართა.
