საზაფხულო სკოლა "კვლევები სოციალურ მეცნიერებებში" ტარდება ბათუმის შოთა რუსთაველის სახელმწიფო უნივერსიტეტში. ერთკვირიანი სწავლების მიზანია, ხელი შეუწყოს სოციალურ მეცნიერებებში მოღვაწე პროფესორ–მასწავლებლებსა და მკვლევარებს პროფესიული უნარების სრულყოფაში, რაც აუცილებელია კვლევითი და პედაგოგიური საქმიანობის გაუმჯობესებისთვის. სკოლა ემსახურება საქართველოში საერთაშორისო სტანდარტებთან ადაპტირებული ერთიანი სამეცნიერო სივრცის შექმნას, რომლის ცენტრიც აჭარის ავტონომიურ რესპუბლიკაში იქნება განთავსებული. საზაფხულო სკოლის მომზადებასა და განხორციელებაში ჩართული აკადემიური და სამეცნიერო თანამდებობის მქონე პირები იმუშავებენ ერთიანი გეგმის შედგენაზე.

დღეს, ბათუმის შოთა რუსთაველის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტზე პრაქტიკოსმა ფსიქოლოგმა, არტ-თერაპევტმა, ფსიქოსინთეზის სპეციალისტმა ირინა სოლოვიოვამ საჯარო ლექცია გამართა. ლექციაზე საუბარი შეეხო შინაგან ქალურ და მამაკაცურ იპოსტაზებსა და ყველა ადამიანში არსებულ ქალური და მამაკაცური საწყისების გამოვლინებებს.

ბათუმის შოთა რუსთაველის სახელმწიფო უნივერსიტეტში მრავალფუნქციური ფსიქოლოგიის კლინიკა ფუნქციონირებს. ბსუ-ს ფსიქოლოგები ფსიქო-სოციალურ დახმარებას უწევენ ძალადობის მსხვერპლ ან რისკის ქვეშ მყოფ ბავშვებს, ახალგაზრდებს, მათი ოჯახის წევრებს, შშმ და გსსმ პირებს. კლინიკის ბაზაზე გახსნილია სპეციალურად აღჭურვილი ზრდასრულთა ინდივიდუალური და ჯგუფური თერაპიის ოთახები. ასევე მოქმედებს საქართველოს საზოგადოებრივი ჯანდაცვის ფონდის ევროკომისიის მიერ დაფინანსებული პროექტის ფარგლებში შექმნილი „ბავშვთა და ახალგაზრდების ადვოკატირების ცენტრი“. ფსიქოლოგიის კლინიკაში მუშაობა მიმდინარეობს შემდეგი პროგრამებით: ABA თერაპია, ადრეული განვითარების ინდივიდუალური და ჯგუფური პროგრამა, მშობელთა გაძლიერების პროგრამა, ენისა და მეტყველების თერაპია. ცენტრს უკვე ჰყავს 20-მდე ბენეფიციარი.

ქართველ მკვლევართა ერთობლივი სამეცნიერო კონფერენცია - 1917 წლის თებერვლის რევოლუცია და გეოპოლიტიკური ტრანსფორმაციები კავკასიაში - ბათუმის შოთა რუსთაველის სახელმწიფო უნივერსიტეტში სოციალურ და პოლიტიკურ მეცნიერებათა ფაკულტეტის ორგანიზებით, ტრადიციულად მეხუთე წელია იმართება. სამეცნიერო სესიაზე ბათუმელ კოლეგებთან ერთად თბილისის ივანე ჯავახიშვილის სახელმწიფო უნივერსიტეტის, პოლიტოლოგიის ინსტიტუტის მეცნიერ თანამშრომლებმა კიდევ ერთხელ შეაფასეს საერთაშორისო ვითარება კავკასიის რეგიონში XX საუკუნის I ნახევარში. კონფერენციის მონაწილეებმა ასევე იმსჯელეს იმ პერიოდის საქართველოს პრიორიტეტების, პერსპექტივებისა და აუცილებელი საფრთხეების გათვალისწინებით ქვეყნის პოლიტიკური ნაბიჯების მართებულობაზე. სამეცნიერო მოხსენებები ახალ საარქივო მასალებზე დაყრდნობით იყო წარმოდგენილი, რაც მის ისტორიოგრაფიულ ასევე პოლიტიკურ მნიშვნელობას ზრდის.

სტუდენტთა საუნივერსიტეტო სამეცნიერო კონფერენციაში სოციალურ და პოლიტიკურ მეცნიერებათა ფაკულტეტის 17 სტუდენტი მონაწილეობს. ორ სექციაში, პოლიტიკის მეცნიერებებისა და ფსიქოლოგიის სექციებში წარმოდგენილი მოხსენებების თემატიკა ძირითადად მოიცავს საერთაშორისო ურთიერთობების ისტორიისა და პოლიტიკის შესახებ აქტუალურ თემებს. აგრეთვე სტუდენტები მუშაობენ ფსიქოლოგიის ისეთ მნიშვნელოვან საკითხებზე, როგორიცაა: აუტიზმი და რეაბილიტაცია, სხეულის ენის პრაქტიკული შესწავლა, კულტურისა და ინტერკულტურალიზმის ფსიქოანალიტიკური განხილვა.