ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის ინიციატივით, თანასწორობის კვირეულის ფარგლებში „ბავშვთა მიმართ ძალადობის პრევენციის მსოფლიო დღეს“ გაიმართა ონლაინ დისკუსია თემაზე: „უსაფრთხო სკოლა-არაძალადობრივი გარემო მოზარდებისთვის“. დისკუსია მიეძღვნა: უსაფრთხო სკოლის პოლიტიკას საქართველოში; ბულინგის, სკოლაში ძალადობის პრევენციისა და ძალადობის შემთხვევების მართვის მიმართულებას; მანდატურების, უსაფრთხოების საკითხებზე პასუხისმგებელი პირების როლის და ფუნქციების განხილვას სკოლებში; ასევე აღნიშნული ფუნქციების შესრულების გზაზე მიღწეული პროგრესის, არსებული ბარიერებისა და გამოწვევების დაძლევის შესაძლო გზებს.

ზუსტ მეცნიერებათა და განათლების ფაკულტეტის ახალი სამაგისტრო საგანმანათლებლო პროგრამის „პროფესიული განათლება და ადამიანური რესურსების განვითარება“ წარდგენა გაიმართა ბათუმის შოთა რუსთაველის სახელმწიფო უნივერსიტეტში. პროგრამის ხელმძღვანელმა, პროფესიული პროგრამების მართვის და უწყვეტი განათლების ცენტრის დირექტორმა მადონა მიქელაძემ პრეზენტაციაზე პროგრამის მიზნები, ამოცანები და განხორციელების პირობები წარმოადგინა. შეხვედრას საქართველოს განათლებისა და მეცნიერების მინისტრის მოადგილე თამარ ქიტიაშვილი, პროგრამის „კერძოს სექტორის განვითარება და პროფესიული განათლება სამხრეთ კავკასიაში“ ხელმძღვანელის მოადგილე (გერმანიის საერთაშორისო თანამშრომლობის საზოგადოება (GIZ)) სელმა ულრიხსი, პროფესიული უნარების სააგენტოს სტრატეგიული კომუნიკაციების სამსახურის ლიდერი ნიკოლოზ მესხიშვილი, სამაგისტრო პროგრამის სტუდენტები, პროფესორ-მასწავლებლები და დამსაქმებლები ესწრებოდნენ.

15-16 ნოემბერს, თელავის იაკობ გოგებაშვილის სახელმწიფო უნივერსიტეტში ევროკავშირის „Erasmus+“-ის პროექტის DITECH მესამე ეროვნული შეხვედრა გაიმართა. შეხვედრაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის დეკანმა ლელა თურმანიძემ, ბსუ-ს პროფესიული პროგრამების მართვის და უწყვეტი განათლების ცენტრის დირექტორმა მადონა მიქელაძემ და ბსუ-ს ასისტენტ პროფესორმა ნინო სამნიძემ.

ევროკავშირის კვლევისა და ინოვაციის პროგრამის „ჰორიზონტი 2020“ ფარგლებში 2020 წელს დაფინანსებული პროექტის „ციფრული ინოვაციების დანერგვა სკოლებში რეგიონული ინოვაციური ჰაბებისა და მენტორინგის მოდელის საშუალებით“ ფარგლებში ბსუ-დან პროექტში ჩართულმა პერსონალმა სამუშაო შეხვედრა გამართა. შეხვედრაზე მონაწილეებმა გაანალიზეს პროექტის მიმდინარეობა და დასახეს სამომავლო გეგმები. პროექტი ხელს შეუწყობს სკოლებს შორის ურთიერთთანამშრომლობის გაძლიერებას ციფრული ინოვაციების დანერგვის კუთხით. მენტორინგის მოდელი გულისხმობს სკოლების უწყვეტ მეთოდოლოგიურ მხარდაჭერას შეფასების უახლესი მიდგომებისა და სწავლის ანალიტიკური სტრატეგიების გამოყენებით.

„Erasmus+“-ის საგრანტო პროექტში „საგანმანათლებლო, სამეცნიერო, მართვის და ინდუსტრიული კომპეტენციების ერთობლიობა კლიმატის მართვისა და კლიმატის ცვლილებების პრევენციისათვის“ ჩართულმა პროფესორ-მასწავლებლებმა მონაწილეობა მიიღეს მრგვალი მაგიდაში „საგანმანათლებლო, სამეცნიერო, მართვის და ინდუსტრიული კომპეტენციების ერთობლიობა კლიმატის მართვისა და კლიმატის ცვლილებების პრევენციისათვის“ და საერთაშორისო კონფერენციაში „უმაღლესი განათლების ეკოლოგიური ორიენტაცია - მეთოდოლოგია და პრაქტიკა - 2021“. ღონისძიებებზე საკუთარი შეხედულებები წარმოადგინეს პროექტის კოორდინატორმა ბსუ-ში, ზუსტ მეცნიერებათა და განათლების ფაკულტეტის დეკანმა ლელა თურმანიძემ, ეკონომიკისა და ბიზნესის ფაკულტეტის ასისტენტ პროფესორმა თამარ ღოღობერიძემ, ტექნოლოგიური ფაკულტეტის ასოცირებულმა პროფესორმა დარეჯან ჯაშმა და ასისტენტ პროფესორი ნუნუ ნაკაშიძემ.