3-17 მარტს „ერახმუს+“-ის პროგრამის საგრანტო პროექტის „საგანმანათლებლო, სამეცნიერო, მართვისა და ინდუსტრიული კომპონენტების ერთობლიობა კლიმატის მართვისა და კლიმატის ცვლილების პრევენციისთვის” (CLIMAN) ფარგლებში, ტურიბას უნივერსიტეტმა (ლატვია) უმასპინძლა სტუდენტთა სპეციალურ სასწავლო პროგრამას. ბათუმის შოთა რუსთაველის სახელმწიფო უნივერსიტეტიდან სასწავლო ტურში მონაწილეობას ღებულობდნენ აგრარული ტექნოლოგიებისა და მასწავლებლის მომზადების საგანმანათლებლო პროგრამების სტუდენტები: სალომე დუმბაძე, ლუკა ნინიძე, გიორგი მოსიძე, ჯულიეტა ჯიჯავაძე.

ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის დეკანი, პროფესორი ლელა თურმანიძე და პედაგოგიურ მეცნიერებათა დეპარტამენტის პროფესორი ნანა მაკარაძე პროგრამის „მომავალის მასწავლებლები“ ფარგლებში, ორკვირიანი სამუშაო ვიზიტით იმყოფებოდნენ ამერიკის შეერთებულ შტატებში. ბსუ-ს წარმომადგენლებმა ბოსტონის, ვერმონტისა და ნიუ-იორკის წამყვან უნივერსიტეტებში მონაწილეობა მიიღეს დისკუსიებში, შეხვდნენ პრაქტიკული სწავლების კოორდინატორებს, მენტორ-მასწავლებლებს, დააკვირდნენ საკლასო სწავლების პრაქტიკუმებს და დაესწრნენ სემინარებს.

გაეროს ბავშვთა ფონდის წარმომადგენელმა საქართველოში იესპერ მოლერმა, აჭარის განათლების, კულტურისა და სპორტის მინისტრმა მაია ხაჯიშვილმა და ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა ადრეული განათლებისა და ზრუნვის შესახებ მესამე საერთაშორისო კონფერენციის თარიღი გამოაცხადეს. კონფერენცია, რომელიც საქართველოს განათლების, მეცნიერებისა და სპორტის სამინისტროს, აჭარის განათლების, კულტურისა და სპორტის სამინისტროს, გაეროს ბავშვთა ფონდისა და ბათუმის შოთა რუსთაველის სახელმწიფო უნივერსიტეტის ორგანიზებით ტარდება, 26-27 სექტემბერს ბათუმში გაიმართება.

გაეროს ბავშვთა ფონდის (UNICEF) წარმომადგენელი საქართველოში იასპერ მოლერი ბათუმის შოთა რუსთაველის სახელმწიფო უნივერსიტეტს ფონდის თანამშრომლებთან ერთად ეწვია. შეხვედრაზე ბსუ-ს რექტორმა მერაბ ხალვაშმა და იასპერ მოლერმა ბსუ-ს ბავშვთა უფლებების ცოდნის ცენტრის მიღწევებსა და სამომავლო გეგმებზე ისაუბრეს. ვიზიტის ფარგლებში შედგა შეხვედრა ბსუ-ს ბავშვის უფლებათა ცოდნის ცენტრის წარმომადგენლებთან, სადაც დაიგეგმა საქართველოს უნივერსიტეტში მოქმედი ბავშვთა უფლებების ცოდნის ცენტრების ერთიანი ქსელის შექმნა.

ბსუ-ს ზუსტ მეცნიერებათა და განათლების ფაკულტეტის მათემატიკის დეპარტამენტის პროფესორ-მასწავლებლები ბათუმის გაძლიერებული მათემატიკის სწავლების №6 საჯარო სკოლის 10-12 კლასის მოსწავლეებსა და სკოლის მასწავლებლებს შეხვდნენ. მათემატიკის დეპარტამენტის ხელმძღვანელმა, პროფესორმა დალი მახარაძემ და დეპარტამენტის ლექტორებმა ომარ გივრაძემ, მზევინარ ბაკურიძემ შეხვედრაზე ისაუბრეს მათემატიკის როლზე თანამედროვე ტექნოლოგიების განვითარების ეპოქაში, განსაკუთრებით კი, მის მნიშვნელობაზე მომიჯნავე დარგებისთვის. შემეცნებითი ხასიათის ღონისძიება კითხვა-პასუხის რეჟიმში წარიმართა და ბსუ-ს პროფესორ-მასწავლებლებმა მოსწავლეების შეკითხვებს უპასუხეს. ვიზიტი მიზნად ისახავდა საჯარო სკოლასთან თანამშრომლობის გაღრმავებასა და მათემატიკის პოპულარიზაციას.