ბსუ იურიდიული და სოციალურ მეცნიერებათა ფაკულტეტის იურიდიულ კლინიკაში, პრაქტიკული უნარ-ჩვევების დაუფლების მიზნით ჩატარდა სტუდენტთა შესარჩევი კონკურსი. კონკურსში მონაწილეობის მისაღებად რეგისტრაცია და გასაუბრება გაიარა 21-მა კონკურსანტმა. გასაუბრების შედეგად, საკონკურსო კომისიის (ნარგიზ ცეცხლაძე-კომისიის თავმჯდომარე, ლინდა შალამბერიძე-კომისიის წევრი, იოსებ შოთაძე-კომისიის წევრი) გადაწყვეტილებით იურიდიულ კლინიკაში ჩაირიცხა 18 სტუდენტი მათშორის სამი სტუდენტი რეზერვში.

26-29 სექტემბერს, იურიდიული და სოციალურ მეცნიერებათა ფაკულტეტის პროფესორი ქეთევან ბერიძე, ასოცირებული პროფესორი რუსუდან კეჭაყმაძე და ასისტენტ პროფესორი დავით ქათამაძე იმყოფებოდნენ ქალაქ თელავში ბსუ-ს მიზნობრივი სამეცნიერო-კვლევითი პროექტის "სტუდენტთა ადაპტაციის ფსიქოლოგიური ასპექტები: ადაპტაციის სირთულეები და მისი გავლენა სწავლის შედეგებზე" ფარგლებში. ვიზიტისას შეხვედრა გაიმართა თელავის იაკობ გოგებაშვილის სახელობის უნივერსიტეტის რექტორთან და განათლების ფაკულტეტის დეკანთან, სადაც შედგა პროექტის გაცნობა და თანამშრომლობის სამომავლო გეგმების განხილვა.

ბათუმის შოთა რუსთაველის სახელმწიფო უნივერსიტეტის იურიდიულ და სოციალურ მეცნიერებათა ფაკულტეტს, ფულბრაიტის მკვლევარი ლილი ო’ტული 9-თვიანი კვლევითი ვიზიტით ეწვევა. ლილი კვლევას განახორციელებს ჟან მონეს კათედრის (EUCONST) ხელმძღვანელის, პროფესორ მალხაზ ნაკაშიძის მოწვევით და მასპინძლობით. აშშ-ის საზოგადოებრივი ჯანდაცვის წამყვანი საჯარო სკოლის - ჩრდილოეთ კაროლინას უნივერსიტეტის დამთავრების შემდეგ, ლილი მომდევნო წელი ცხოვრობდა და მუშაობდა რიგაში, ლატვიაში. მისი ამჟამინდელი პროექტის განმავლობაში, ის შეისწავლის მიგრანტების მასობრივ შემოსვლას ბათუმში უკრაინაში რუსეთის სრულმასშტაბიანი შეჭრის შემდეგ და ამ ჯგუფის გავლენას ქართულ საზოგადოებაზე ევროპული მომავლისთვის ბრძოლის კონტექსტში. კვლევის მიზნით, ლილი გეგმავს დაუკავშირდეს როგორც ადგილობრივ, ისე მიგრანტთა საზოგადოებას, რომელიც მხარს უჭერს მონაწილეობით პრაქტიკას და მეთოდებს.

ასისტენტ პროფესორი გიგა ფარტენაძე პროფესიული გამოცდილების და საუკეთესო საერთაშორისო პრაქტიკის გაზიარების მიზნით, კონგრესის საერთაშორისო ლიდერობის ოფისის „ღია სამყაროს პროგრამის“ ფარგლებში, რომელიც დაფინანსებულია ამერიკის კონგრესის მიერ და ადმინისტრირებას უწევს „კონგრესის საერთაშორისო ლიდერობის ოფისის ცენტრი”, 2024 წლის აგვისტოს თვეში ოფიციალური ვიზიტით იმყოფებოდა აშშ-ში, კერძოდ, ვაშინგტონსა და ჩიკაგოში.

იურიდიული და სოციალურ მეცნიერებათა ფაკულტეტის დეკანი, ადმინისტრაციის წარმომადგენლებთან და პროფესორ-მასწავლებლებთან ერთად, პირველკურსელებს შეხვდნენ, ახალგაზრდებს სტუდენტობა მიულოცეს და წარმატებები უსურვეს. სტუდენტები შეხვედრაზე უმაღლესი საგანმანათლებლო დაწესებულების საუნივერსიტეტო ცხოვრებას, ძირითად მარეგულირებელ აქტებს, საგანმანათლებლო პროგრამების განხორციელებისა და სტუდენტთა აკადემიური შეფასების წესებს, სტიპენდიებს, გაცვლით პროგრამებს, ელექტრონულ სერვისებსა და კულტურულ-საგანმანათლებლო პროექტებს გაეცნენ. შეხვედრა კითხვა-პასუხის რეჟიმში გაგრძელდა და სტუდენტებმა მათთვის საინტერესო კითხვებზე ამომწურავი პასუხები მიიღეს.