საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის პროფესორებმა, ელჩებმა ლევან ბოძაშვილმა და თეიმურაზ შარაშენიძემ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხეს თემაზე: „საქართველოს საგარეო პოლიტიკა და პრიორიტეტები“. მომხსენებლებმა ისაუბრეს ქვეყნის სამეზობლო პოლიტიკაზე, სამხედრო უსაფრთხოებაზე, საერთაშორისო ურთიერთობებსა და ჩრდილოატლანტიკურ სივრცეში საქართველოს ინტეგრაციის პროცესზე. ლექციის დასასრულს, დიპლომატებმა ლევან ბოძაშვილმა და თეიმურაზ შარაშენიძემ სტუდენტების შეკითხვებს უპასუხეს.

ბათუმის შოთა რუსთაველის სახელმწიფო უნივერსიტეტში სამეცნიერო კონფერენცია ჩატარდა თემაზე: „დემოკრატიული არჩევნები: საქართველოს დემოკრატიული რესპუბლიკის გამოცდილება და დღევანდელობა“. სამეცნიერო სესია მიეძღვნა 1918 წლის 22 ნოემბერს საქართველოს პარლამენტის და საქართველოს რესპუბლიკის მთავრობის მიერ მიღებული დებულების „დამფუძნებელი კრების არჩევნების“ 100 წლის იუბილეს. კონფერენციაზე წარმოდგენილი მოხსენებების თემატიკა მოიცავდა ისეთ მნიშვნელოვან საკითხებს, როგორიცაა: 1918-1921 წლებში საარჩევნო უფლების განსაზღვრა, დამფუძნებელი კრების არჩევნების ჩატარების ხელმძღვანელი დაწესებულებები, საარჩევნო სიების ფორმირების წესი, არჩევნების მონაწილე კანდიდატთა სიის ფორმირების წესი, საარჩევნო ბარათების გაცემისა და დათვლის წესი, არჩევნების შედეგების გამორკვევის წესი, არჩევნების თავისუფლებისა და სისწორის დაცვა, დამფუძნებელი კრების არჩევნების დაფინანსება.

18 ნოემბერს, თბილისში, ნიუ ვიჟენის უნივერსიტეტში ჩატარდა პროფესიული ეთიკის ეროვნული შეჯიბრი, რომელშიც მონაწილეობა მიიღეს ბათუმის შოთა რუსთაველის სახელობის უნივერსიტეტის სამართალმცოდნეობის საბაკალავრო საგანმანათლებლო პროგრამის IV კურსის სტუდენტებმა ლიანა ნიჟარაძემ, მაგდა აბულაძემ, თინიკო ჯაფარიძემ და ელუნა ჯინჭარაძემ. შეჯიბრის მონაწილეებს გადაეცათ სერტიფიკატები კლიენტის ინტერესების საუკეთესოდ წარმოჩენისათვის. ჯგუფს კოორდინირებას უწევდა სამართლის დეპარტამენტის ასოცირებული პროფესორი ომარ ფარტენაძე.

17-18-19 ნოემბერს, ბათუმის შოთა რუსთაველის სახელმწიფო უნივერსიტეტში ივანე ჯავახიშვილის სახელობის თბილისის სახელმწიფო უნივერსიტეტის პროფესორმა თამარ გაგოშიძემ ლექციები წაიკითხა თემაზე: „კომპიუტერული ტექნოლოგიები, განვითარება და შემეცნება“. მომხსენებელმა ისაუბრა ისეთ მნიშვნელოვან საკითხებზე, როგორიცაა: კომპიუტერული ტექნოლოგიების გავლენა ბავშვის განვითარებაზე სხვადასხვა პერიოდში - ჩვილობაში, ადრეულ ასაკში, წინა სასკოლო ასაკში, შუა ბავშვობასა და გარდატეხის ასაკში; კომპიუტერული ტექნოლოგიების გამოყენების დადებითი და უარყოფით მხარეები.

პირველად საქართველოში, ბათუმის შოთა რუსთაველის სახელმწიფო უნივერსიტეტში დაიწყო სხეულზე ორიენტირებული ფსიქოთერაპიის საერთაშორისო კურსი „სხეულზე ორიენტირებული ფსიქოთერაპია შშმ პირებთან და მათ ოჯახის წევრებთან ერთად“. 6-11 ნოემბერს ჩატარდა ოთხდღიანი სემინარი, რომელშიც მონაწილეობა მიიღეს ბსუ-ს სოციალურ მეცნიერებათა დეპარტამენტის პროფესორ-მასწავლებლებმა, ბსუ-ს ფსიქოლოგიის კლინიკის თერაპევტებმა, ფსიქოლოგიის სპეციალობის და კლინიკური ფსიქოლოგიის სპეციალობის სტუდენტებმა და პრაქტიკოსმა ფსიქოლოგებმა. დაგეგმილია სემინარის ხუთ ეტაპად ჩატარება.