1 მაისს, ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ასისტენტ პროფესორმა თამარ ბერიძემ, მესამე მისიის ფარგლებში, ქედის მუნიციპალიტეტის სოფელ მერისის ფრიდონ თურმანიძის სახელობის საჯარო სკოლაში ჩაატარა საჯარო ლექცია თემაზე: „სოციალური მედია და ტურიზმი“. ღონისძიების მიზანს წარმოადგენდა ახალგაზრდებისთვის სოციალური მედიის მნიშვნელობის გაცნობა ტურიზმის განვითარების კონტექსტში. ლექცია ინტერაქციულ რეჟიმში წარიმართა, რაც მოსწავლეებისთვის საკითხების უკეთ გააზრებისა და აქტიური ჩართულობის შესაძლებლობას იძლეოდა.

ბსუ-ს ზუსტ მეცნიერებათა და განათლების ფაკულტეტის მათემატიკის დეპარტამენტის პროფესორ-მასწავლებლები მათემატიკის გაძლიერებული სწავლების ბათუმის №6 საჯარო სკოლის მე-11 კლასის მოსწავლეებს შეხვდნენ. მათემატიკის დეპარტამენტის ხელმძღვანელმა, პროფესორმა დალი მახარაძემ, პროფესორმა ლელა თურმანიძემ და პროფესორმა ონისე სურმანიძემ შეხვედრაზე ისაუბრეს მათემატიკის როლზე თანამედროვე ტექნოლოგიების განვითარების ეპოქაში, განსაკუთრებით კი, მის მნიშვნელობაზე მომიჯნავე დარგებისთვის.

26-27 აპრილის, ბათუმის შოთა რუსთაველის სახელმწიფო უნივერსიტეტში ჩატარდა უწყვეტი სამედიცინო განათლების აკრედიტებული ტრენინგი: „ადგილობრივი ანესთეზიით გამოწვეული გადაუდებელი მდგომარეობებისა და სხვა გართულებების მართვა სტომატოლოგიურ პრაქტიკაში“. ტრენინგს ესწრებოდნენ რეგიონის ექიმ-სტომატოლოგები და ბსუ-ს მე-5 კურსის სტუდენტები. მსმენელებს მიენიჭათ 12 უპგ ქულა. ტრენინგს უძღვებოდნენ: ფრიდონ ჯაფარიძე, გიორგი ნიკოლაიშვილი, მეგი ხაბაზი.

23 აპრილს მსოფლიოში წიგნის საერთაშორისო დღეს აღნიშნავენ. „იუნესკომ“ ეს თარიღი მიგელ დე სერვანტესის გარდაცვალების და უილიამ შექსპირის დაბადების და გარდაცვალების გამო აირჩია და წიგნის საერთაშორისო დღედ გამოაცხადა. წიგნის საერთაშორისო დღე ყოველწლიურად საქართველოშიც აღინიშნება. ამ დღესთან დაკავშირებით, ბათუმის შოთა რუსთაველის სახელმწიფო უნივერსიტეტის, საბუნებისმეტყველო მეცნიერებათა და ჯანდაცვის ფაკულტეტის გეოგრაფიის დეპარტამენტის წარმომადგენლები ეწვივნენ ქვედა ახალშენის საჯარო სკოლის ბიბლიოთეკას და საჩუქრად გადასცეს მოსწავლეთა ასაკობრივი თავისებურებების გათვალისწინებით შერჩეული მხატვრული ლიტერატურა.

ბათუმის შოთა რუსთაველის სახელმწიფო უნივერსიტეტმა N16 საჯარო სკოლის პირველი კლასის მოსწავლეებს უმასპინძლა. ბსუ-ს რექტორის მოადგილემ, თამარ სირაძემ პირველკლასელებს საუნივერსიტეტო ცხოვრება და სასწავლო პროცესი გააცნო. მოსწავლეებმა უნივერსიტეტის ბიბლიოთეკა, კაბინეტ-ლაბორატორიები დაათვალიერეს და როლური თამაშების ფორმატში სახალისო ცდებში მიიღეს მონაწილეობა. ღონისძიებისა დასასრულს მათ სიმბოლური საჩუქრები გადაეცათ.