ფილოსოფიის დეპარტამენტისაგან ბიბლიოთეკას გადაეცა საჩუქრად პროფესორ ლალი ანთიძის რედაქტორობით, კრებული „ფილოსოფიის საკითხები“. კრებულში შესულია 2013 წლის 20 მაისს ფილოსოფიის დეპარტამენტის მიერ ჩატარებული სამეცნიერო კონფერენციის მასალები, რომელიც ეძღვნებოდა აკადემიკოს კოტე ბაქრაძის დაბადებიდან 115-ე წლისთავს.

პროფესორ ლადო ბალაძის მიერ ბიბლიოთეკას საჩუქრად გადმოეცა დ. ნატროშვილის ავტორობით შედგენილი წიგნი: „მათემატიკა ეკონომისტებისათვის“. „მათემატიკა ეკონომისტებისათვის“ განკუთვნილია სახელმძღვანელოდ უმაღლესი სასწავლებლის ეკონომიკური და საბანკო-საფინანსო პროფილის ბაკალავრის საფეხურის სტუდენტებისათვის. წიგნში ძირითადი აქცენტი გადატანილია მათემატიკური მასალის ეკონომიკურ ინტერპრეტაციაზე და ეკონომიკის მათემატიკური მოდელების გაანალიზებაზე.

1. მერაბ ვანიშვილი, ბადრი გეჩბაია „სოციალური სფეროს ეკონომიკა და მართვა“. 2015 - წიგნში თანმიმდევრულადაა განხილული სოციალური სფეროს ეკონომიკა და მართვა ისეთი მნიშვნელოვანი თემების მიხედვით, როგორიცაა: სოციალური სფეროს ეკონომიკა და მართვის შესწავლის საგანი და კვლევის მეთოდოლოგია; სოციალური სფეროს ეკონომიკა და მართვა როგორც საზოგადოებრივი თეორია და პრაქტიკა; სოციალური დაზღვევა; შრომის ანაზღაურება; მოსახლეობის ცხოვრების დონე; სოციალური პარტნიორობა და სხვ.
2. ბადრი გეჩბაია, ანზორ დევაძე „ადამიანური რესურსების მენეჯმენტი“ 2015. -
სახელმძღვანელო მომზადებულია ადამიანური რესურსების მენეჯმენტის სფეროში არსებული სამეცნიერო ლიტერატურის გამოყენების საფუძველზე. მასში განხილულია ადამიანური რესურსების მართვის პოლიტიკა და სტრატეგია; კომპეტენტური მიდგომა ადამიანური რესურსების მენეჯმენტისადმი და სხვ.

ავტორმა, პოეტმა შალვა ლონდარიძემ ბიბლიოთეკას გადმოსცა ლექსების კრებული „სულის თარგმანები“

ცნობილი ლიტერატურათმცოდნისა და კრიტიკოსის თეიმურაზ დოიაშვილის წიგნში შესულია ნაწილი მის მიერ ბოლო ათწლეულში გამოქვეყნებული გამოკვლევების, წერილების, ესეებისა და გამოხმაურებებისა, სადაც მოცემულია ქართველი კლასიკოსების, აგრეთვე, თანამედროვე ავტორთა ტექსტების ანალიზი და შეფასება.