„ქვათა ღაღადი“- ამ სახელწოდებით ბათუმის შოთა რუსთაველის სახელმწიფო უნივერსიტეტში ესეების კონკურსი გაიმართა. ქართული კულტურული მემკვიდრეობის დაცვის თანამედროვე პრობლემებისადმი მიძღვნილ კონკურსში 50-მდე სტუდენტი და ბათუმის საჯარო და კერძო სკოლების მოსწავლეები მონაწილეობდნენ. საუკეთესო 5 ესეს ავტორს კომპეტენტური ჟიური რამდენიმე დღეში გამოავლენს. გამარჯვებულები ფასიანი საჩუქრებითა და მცხეთაში ერთდღიანი ისტორიულ-შემეცნებითი ტურით დაჯილდოვდებიან. ღონისძიება სტუდენტთა სამეცნიერო ცენტრის ორგანიზებით ძეგლებისა და ისტორიული ადგილების საერთაშორისო დღის კვირეულის ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა 1989 წლის 9 აპრილს მთავრობის სასახლესთან საქართველოს დამოუკიდებლობისათვის დაღუპული გმირები გაიხსენეს. სტუდენტთა კონფერენციაზე ახალგაზრდებმა 26 წლის წინ განვითარებულ მოვლენებზე მოხსენებები წარმოადგინეს და ისტორიული დღის მნიშვნელობაზე იმსჯელეს. სესიის დასრულების შემდეგ უნივერსიტეტის ფოიეში ტრაგიკული მოვლენების ამსახველი ფოტოქრონიკის ჩვენება შედგა. სტუდენტებმა და პროფესორ-მასწავლებლებმა კიდევ ერთხელ პატივი მიაგეს 9 აპრილის ღამეს დაღუპულ მამულიშვილებს, მათი ხსოვნის უკვდავსაყოფად სანთლები დაანთეს, ზღვისპირა პარკში მემორიალი ტიტებითა და გვირგვინით შეამკეს.

მარტყოფის და მარაბდის ბრძოლების 390 წლისთავისადმი მიძღვნილი კონფერენცია „ქართველი ხალხის ეროვნულ-გამათავისუფლებელი მოძრაობის ისტორიიდან“ (XVII ს-ის პირველი მესამედი) გაიმართა ბათუმის შოთა რუსთაველის სახელმწიფო უნივერსიტეტში. ისტორიის სპეციალობის II და III კურსის სტუდენტებმა სესიაზე მოხსენებები წარმოადგინეს ისეთ საკითხებზე, როგორიცაა: პოლიტიკური ვითარება ამიერკავკასიაში XVI ს. ბოლოსა და XVII ს. დასაწყისში, შაჰ-აბასის ლაშქრობები აღმოსავლეთ საქართველოში, დედოფალი კახეთისა - ქეთევანი, მარტყოფის აჯანყება, მარაბდის ბრძოლა, გიორგი სააკაძე - გმირი თუ მოღალატე, ბაზალეთის ბრძოლა, გზა ევროპისაკენ - ქართველი დიპლომატ ნიკოლოზ ჩოლოყაშვილი. კონფერენცია ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის, არქეოლოგიის და ეთნოლოგიის დეპარტამენტისა და სტუდენტთა სამეცნიერო ცენტრის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა ბათუმის გათავისუფლებისთვის ბრძოლაში დაღუპული გმირები გაიხსენეს. უმაღლესი საგანმანათლებლო დაწესებულების ეზოდან მსვლელობა მოაწყვეს, მემორიალური ქვა ყვავილებით შეამკეს და სანთლები დაანთეს. ღონისძიება სტუდენტთა მხარდაჭერისა და მომსახურების სამსახურისა და სტუდენტთა სამეცნიერო ცენტრის ორგანიზებით გაიმართა. 1921 წლის 23 მარტს იუნკერები საქართველოს ერთიანობისთვის წარმოებულ უთანასწორო ბრძოლაში ჩაებნენ. საბრძოლო მოქმედებების დროს 50 ქართველი მეომარი დაიღუპა.

ბათუმის შოთა რუსთაველის სახელმწიფო უნივერსიტეტში საბჭოთა ოკუპაციის დღესთან დაკავშირებით საქართველოს სახელმწიფო დროშა დაუშვეს. ცერემონიაზე უმაღლესი საგანმანათლებლო დაწესებულების რექტორის მოვალეობის შემსრულებელმა ირაკლი ბარამიძემ, ადმინისტრაციის ხელმძღვანელმა ედიშერ ჩავლეიშვილმა, პროფესორ-მასწავლებლებმა და სტუდენტებმა საქართველოს დამოუკიდებლობისათვის დაღუპული გმირები გაიხსენეს და წუთიერი დუმილით მათ ხსოვნას პატივი მიაგეს. ღონისძიების ფარგლებში სტუდენტთა სამეცნიერო ცენტრისა და სტუდენტთა მხარდაჭერისა და მომსახურების სამსახურის ორგანიზებით სესია გაიმართა თემაზე: „25 თებერვალი - საქართველოს ოკუპაციის დღე“. კონფერენციის დასასრულს გაიმართა 25 თებერვლის ამსახველი ისტორიული კადრების ჩვენება და დისკუსია.