ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის, თარგმანმცოდნეობისა და კულტურათაშორისი კომუნიკაციის სამაგისტრო საგანმანათლებლო პროგრამის მაგისტრანტმა სალომე მიქაძემ გაიმარჯვა პროექტში - „ეროვნული ენის მთარგმნელობითი კურსი – ფრანგული ენა დისტანციურად“, რომელიც ცენტრალურ და აღმოსავლეთ ევროპის ფრანკოფონიის საუნივერსიტეტო სააგენტოსა(AUF) და RFI Romania-ს ეგიდით ჩატარდა. დისტანციური სტაჟირება განხორციელდება 4 თვის განმავლობაში. აღნიშნული პროგრამა არის ევროპა პლუსის რეგიონული პროექტის ნაწილი და მიზნად ისახავს რეგიონში ახალგაზრდა ფრანგულენოვანი ახალგაზრდების პროფესიულ ინტეგრაციას.

ბათუმის შოთა რუსთაველის სახელმწიფო უნივერსიტეტი 2023 წლიდან გაერთიანებულია ჟურნალისტიკის სწავლების ევროპულ ასოციაციაში (EJTA) და ყოველწლიურად მონაწილეობს ასოციაციის მიერ გამართულ ტრენინგებსა თუ ფორუმებში. 2025 წლის 27 თებერვლიდან 1-ლი მარტის ჩათვლით ზაგრებში (ხორვატია) ჩატარდა ჟურნალისტიკის და მედია წიგნიერების ევროპული ფესტივალი, რომელშიც მონაწილეობდნენ „ციფრული მედიისა და ინოვაციების“ სამაგისტრო პროგრამის სტუდენტები: მზია მართალიშვილი და თამარ შაშიკაძე. ფესტივალის ფარგლებში ჩატარდა ვორქშოფები, დებატები, სემინარები ისეთ საკითხებზე, როგორებიცაა: თავისუფალი მედია და დემოკრატია, დეზინფორმაციასთან ბრძოლა, ლოკალური მედია - გადაარჩინე ადგილობრივი ჟურნალისტიკა, მედია წიგნიერება და სამოქალაქო განათლება და სხვა. ფესტივალში მონაწილეობა მნიშვნელოვანი გახლდათ ახალი უნარების შეძენისა და პრაქტიკული გამოცდილების მისაღებად.

23-28 თებერვალს, „ერაზმუს+“-ის გაცვლითი პროგრამის ფარგლებში, ბსუ-ს ჰუმანიტარულ მეცნიერებათა ფაკულტეტის ასისტენტ პროფესორი შოთა როდინაძე აკადემიური მივლინებით ბუქარესტის უნივერსიტეტში (რუმინეთი) იმყოფებოდა. შოთა როდინაძე დაესწრო უნივერსიტეტის მიერ ორგანიზებულ სხვადასხვა ღონისძიებას, რომლის ფარგლებშიც სამუშაო შეხვედრები გაიმართა უნივერსიტეტის ადმინისტრაციასთან და სხვადასხვა ფაკულტეტის წარმომადგენლებთან. გაეცნო საგანმანათლებლო პროგრამებს, საუნივერსიტეტო ცხოვრებას, მიმდინარე სასწავლო პროცესსა და სიახლეებს, ასევე წაიკითხა საჯარო ლექცია “Noteworthy Aspects of Georgia: Historical Legacy and Contemporary Developments” (მნიშვნელოვანი საკითხები საქართველოს შესახებ: ისტორიული მემკვიდრეობა და თანამედროვე მოვლენები). დაიგეგმა სამომავლო თანამშრომლობის მიმართულებები.

ბსუ-ს ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის ორგანიზებით, დავით აღმაშენებლის დღისადმი მიძღვნილი ღონისძიება გაიმართა. პროფესორმა ჯემალ კარალიძემ საჯარო ლექცია წაიკითხა დავით აღმაშენებლის ცხოვრების, მოღვაწეობის და მისი როლის შესახებ საქართველოს მრავალსაუკუნოვანი ისტორიის განვითარების პროცესში და მისი შეფასების შესახებ ქართულ ისტორიოგრაფიაში. ღონისძიება გახსნა უნივერსიტეტის რექტორმა, დამსწრეებს მისასალმებელი სიტყვით მიმართა და დავით აღმაშენებლის ისტორიულ როლსა და მის მნიშვნელობას გაუსვა ხაზი.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის საერთაშორისო სამეცნიერო ელექტრონულ ჟურნალ „აღმოსავლეთმცოდნეობის მაცნეს“ (E-ISSN 2720-8168; ISSN 2587-490X) საერთაშორისო სამეცნიერო ინდე-ქსირების (ISI)/International Scientific Indexing ბაზაში მიენიჭა იმპაქტ ფაქტორის - 2.012 კოეფიციენტი (2024-2025). საერთაშორისო სამეცნიერო ჟურნალი აღმოსავლეთმცოდნეობის მაცნე დაარსდა 2018 წელს ბსუ-ს ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ბაზაზე.