ბათუმის შოთა რუსთაველის სახელმწიფო უნივერსიტეტში ბსუ-ს საბუნებისმეტყველო მეცნიერებათა და ჯანდაცვის ფაკულტეტის 2024 წლის კურსდამთავრებულთა გამოშვების საზეიმო ცერემონია გაიმართა. ფაკულტეტი 2023-2024 წელს ერთსაფეხურიანი, საბაკალავრო და სამაგისტრო პროგრამების 235-მა სტუდენტმა დაასრულა, მათ შორის დიპლომირებული მედიკოსის ინგლისურენოვანი საგანმანათლებლო პროგრამის 112-მა სტუდენტმა. კურსდამთავრებულებს პროფესიული და კარიერული წარმატება უსურვეს უნივერსიტეტის რექტორმა ბატონმა მერაბ ხალვაშმა, ფაკულტეტის დეკანმა რუსუდან ხუხუნაიშვილმა, რექტორის მოადგილეებმა თამარ სირაძემ და ანზორ ბერიძემ.

ბსუ-ს საბუნებისმეტყველო მეცნიერებათა და ჯანდაცვის ფაკულტეტმა ისრაელის ალ-ქასემის აკადემიური კოლეჯის პრეზიდენტს, პროფესორ ანვარ რაიანს და დოქტორ აჰმედ ნასერს უმასპინძლეს. ფაკულტეტის დეკანმა რუსუდან ხუხუნაიშვილმა და ფაკულტეტის ბაზაზე არსებული ქრომატოგრაფიის ცენტრის ხელმძღვანელმა ალეკო კალანდიამ სტუმრებს დაათვალიერებინეს ფაკულტეტის სამეცნიერო-ტექნიკური ბაზა, ისაუბრეს ურთიერთთანამშრომლობის მემურანდუმის გაფორმების პერპექტივებსა და სამომავლო გეგმებზე.

2-9 ივლისს ბსუ-ს საბუნებისმეტყველო მეცნიერებათა და ჯანდაცვის ფაკულტეტის ეკოლოგიის სპეციალობის სტუდენტები კომპლექსურ სასწავლო-საველე პრაქტიკაზე იმყოფებოდნენ. ეკოლოგიის საბაკალავრო პროგრამის სტუდენტები ველზე უშუალო დაკვირვების გზით გაეცნენ საქართველოს ხმელეთისა და წყლის ბუნებრივ და ხელოვნურ ეკოსისტემებს; მინაწილეობა მიიღეს ბუნებრივი ეკოსისტემების იდენტიფიკაციაში, მათ აგებულებასა და სტრუქტურაზე მოქმედი ხელოვნური და ბუნებრივი ფაქტორების გავლენის შედეგების ანალიზში.

ბსუ-ს საბუნებისმეტყველო მეცნიერებათა და ჯანდაცვის ფაკულტეტმა „ერაზმუს+“-ის გაცვლითი პროგრამის ფარგლებში, 2023-2024 სასწავლო წლის გაზაფხულის სემესტრში, პოლონეთის, კროსნოს უნივერსიტეტის სტუდენტ მონიკა მილაკს უმასპინძლა. მონიკამ ერთი სემესტრის განმავლობაში გაიარა ბიოლოგიის საგანმანათლებლო პროგრამის სხვადასხვა სასწავლო კურსები: სამედიცინო გენეტიკა, ადამიანის ფიზიოლოგია, ბიომრავალფეროვნება და კონსერვაცია, ბოტანიკა და ლაბორატორიული მედიცინა. სტუდენტს ჰქონდა შესაძლებლობა, მონაწილეობა მიეღო საველე-სასწავლო პრაქტიკებში, რომელიც განხორციელდა ბათუმის ბოტანიკურ ბაღში.

საგანმანათლებლო პროექტის „უნივერსიტეტის დახმარება სკოლებს სტემ მეცნიერებების პოპულარიზაციაში“ ფარგლებში, საზაფხულო ბანაკის მონაწილეებთან ბსუ-ს ქიმიის დეპარტამენტში შეხვედრა გაიმართა. ქედის მუნიციპალიტეტის გეგელიძეებისა და ჯალაბაშვილების საშუალო სკოლების VII-XI კლასის მოსწავლეებს პროექტის ხელმძღვანელმა, ქიმიის სპეციალობის სტუდენტმა კახა კოტრიკაძემ გააცნო კვლევის მიზანი, ამოცანები, მეთოდები, მსვლელობა და კვლევების პირველი შედეგები აჭარული ყოჩივარდას ყვავილების ეთერზეთების შესახებ. პროექტის მონაწილე სტუდენტებმა მირანდა პაქსაძემ, სალომე გოგიტიძემ, გოჩა მგელაძემ ჩაატარეს მოსწავლეთა მონაწილეობით სახალისო ცდები.