ბათუმის შოთა რუსთაველის სახელმწიფო უნივერსიტეტის ქართველოლოგიის ცენტრის მკვლევართა ერთობლივი მონოგრაფია „ტაო“ გამოვიდა. წიგნი მკვლევართა მრავალწლიანი შრომის შედეგია და მომზადდა შოთა რუსთაველის საქართველოს ეროვნული სამეცნიერო ფონდის მიერ დაფინანსებული პროექტების ფარგლებში. მონოგრაფიაში ისტორიულ ტაოში კომპლექსური საველე ექსპედიციებით შეკრებილ მასალებზე, ქართულ და ოსმალურ საისტორიო წყაროებზე, ქართულ და უცხოურ სამეცნიერო ლიტერატურაზე დაყრდნობით შესწავლილია ჭოროხის ხეობაში მდებარე ისტორიული ტაოს ქვეყანა, - ტაოს ისტორია, მატერიალური კულტური ძეგლები, ლიტერატურული და სამწიგნობრო სკოლები, ტაოური სოფელი თანამედროვე თურქეთში, ტაოელთა ყოფა, ფოლკლორი, ტაოური დიალექტი, ტაოს ონომასტიკა.

ბათუმის შოთა რუსთაველის სახელმწიფო უნივერსიტეტში სამეცნიერო კონფერენცია გაიმართა თემაზე „აფხაზები აჭარაში“. მკვლევარებმა სესიაზე მოხსენებები წარმოადგინეს შოთა რუსთაველის ეროვნული სამეცნიერო ფონდის საგრანტო პროექტის „აფხაზები აჭარაში“ ფარგლებში წარმოებული კვლევის შედეგებზე. სამეცნიერო პროექტის მიზანია აჭარაში აფხაზთა თავდაპირველი გადმოსახლების, მიგრაციის, აჭარაში ცხოვრების ისტორიული, ეკონომიკური თუ სხვა ხასიათის თავისებურებების გაანალიზება. კვლევა ასევე ითვალისწინებს მოახალშენეთა და ადგილობრივთა თანაცხოვრების იმ კულტურულ–ეთნოგრაფიულ პლასტების შესწავლას, რომლებიც ხალხურ მეხსიერებაში არსებობს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის „ქართველოლოგიის ცენტრის“ მკვლევართა ჯგუფი სამეცნიერო პროექტების „ტაო“ (ხელმძღვანელი, პროფესორი მამია ფაღავა) და „მარადიდი“ (ხელმძღვანელი, პროფესორი მალხაზ ჩოხარაძე. ორივე პროექტი დაფინანსებულია შოთა რუსთაველის ეროვნული სამეცნიერო ფონდის მიერ) ფარგლებში სამეცნიერო მივლინებით იმყოფებოდა ისტორიულ სამხრეთ საქართველოში. მეცნიერები ხუთი დღის განმავლობაში მუშაობდნენ ზემო მარადიდში - ახლა მურათლი (ძველი კლარჯეთის სოფელი, თანამედროვე ართვინის ილი, ბორჩხის ილჩე. თურქეთის რესპუბლიკა), ოლთისსა და თორთუმში (ძვ. ტაოს ქვეყანა. ახლა არზრუმის ილი, ოლთისისა და თორთუმის ილჩეები. თურქეთის რესპუბლიკა).

ბათუმის შოთა რუსთაველის სახელმწიფო უნივერსიტეტის ქართველოლოგიის ცენტრში გრანტის პრეზენტაცია გაიმართა. ჰუმანიტარულ მეცნიერებათა ფაკულტეტის ასოცირებულმა პროფესორმა ზაზა შაშიკაძემ და ისტორიის აკადემიურმა დოქტორმა რუსლან ბარამიძემ სტუდენტებს და პროფესორ-მასწავლებლებს შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო გრანტის „ქართველ მუსლიმთა მატერიალური და სულიერი მემკვიდრეობა თურქეთში“ (საგრანტო ხელშეკრულება #57/06) ფარგლებში მიმდინარე წლის მაისში თურქეთის რესპუბლიკაში, კერძოდ, მარმარილოს ზღვის რეგიონში ჩატარებული საველე სამუშაოების შედეგები გააცნეს.

დღეს, დედა ენის დღესთან დაკავშირებით, ბათუმის შოთა რუსთაველის სახელმწიფო უნივერსიტეტში მონოგრაფია ‘’სარფის’’ წარდგინება გაიმართა. მონოგრაფია, რომელზეც ქართველოლოგიის ცენტრის მკვლევართა ჯგუფმა წელიწადნახევრის განმავლობაში იმუშავა, პირველი ცდაა სარფის, ორად გაყოფილი სოფლის კომპლექსური შესწავლისა. მონოგრაფია ‘’სარფი’’ სამეცნიერო მივლინებების დროს შეკრებილ ისტორიულ, ლიტერატურულ, ეთნოლოგიურ, ფოლკლორულ და ლინგვისტურ მასალებსა და ლაზურ ტექსტებს მოიცავს. წიგნში შეტანილია მდიდარი საილუსტრაციო მასალა, რაც კიდევ უფრო საინტერესოს ხდის გამოცემას ისტორიული საქართველოს შავიზღვისპირეთით დაინტერესებული მკითხველისათვის.