დღეს, „ქართული ენის დღის“ კვირეულის ფარგლებში, ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტის ქართველოლოგიის ცენტრის მკვლევართა ჯგუფის მონოგრაფიების - „ტაო“ და „მარადიდი“ წარდგენა გაიმართა. პროფესორ-მასწავლებლებმა მონოგრაფიები შოთა რუსთაველის საქართველოს ეროვნული სამეცნიერო ფონდის საგრანტო პროექტების ფარგლებში მოამზადეს. ნაშრომები კარგ სამსახურს გაუწევს ისტორიკოსებს, ლიტერატურათმცოდნეებს, ეთნოლოგებს, ფოლკლორისტებს, ენათმეცნიერებს და საზოგადოდ, ჭოროხის აუზის წარსულით, ისტორიული სამხრეთ საქართველოთი და თანამედროვე ყოფით დაინტერესებულ მკითხველებს.

ბსუ-ს ქართველოლოგიის ცენტრის მკვლევარებმა შოთა რუსთაველის საქართველოს ეროვნული სამეცნიერო ფონდის საგრანტო პროექტის ფარგლებში მონოგრაფია „მარადიდი“ გამოსცეს. ნაშრომში ქართულ და უცხოურ წყაროებსა და სამეცნიერო ლიტერატურაზე, ასევე, კომპლექსურ ექსპედიციებსა და სამეცნიერო მივლინებებში თურქეთსა (ზედა მარადიდი და ჭოროხის აუზის სხვა დასახლებები, ასევე, მარადიდელ და, საზოგადოდ, ქართველ მუჰაჯირთა შთამომავლების სოფლები) და საქართველოში (ქვედა მარადიდი და მახლობელი სოფლები) შეკრებილ მასალებზე დაყრდნობით შესწავლილია სახელმწიფო საზღვრით საუკუნის წინ ორად გაყოფილი სოფელი მარადიდი, ასევე, მარადიდელ მუჰაჯირთა შთამომავლების დასახლებები თურქეთის შიდა პროვინციებში.

ბათუმის შოთა რუსთაველის სახელმწიფო უნივერსიტეტის ქართველოლოგიის ცენტრის მკვლევართა ერთობლივი მონოგრაფია „ტაო“ გამოვიდა. წიგნი მკვლევართა მრავალწლიანი შრომის შედეგია და მომზადდა შოთა რუსთაველის საქართველოს ეროვნული სამეცნიერო ფონდის მიერ დაფინანსებული პროექტების ფარგლებში. მონოგრაფიაში ისტორიულ ტაოში კომპლექსური საველე ექსპედიციებით შეკრებილ მასალებზე, ქართულ და ოსმალურ საისტორიო წყაროებზე, ქართულ და უცხოურ სამეცნიერო ლიტერატურაზე დაყრდნობით შესწავლილია ჭოროხის ხეობაში მდებარე ისტორიული ტაოს ქვეყანა, - ტაოს ისტორია, მატერიალური კულტური ძეგლები, ლიტერატურული და სამწიგნობრო სკოლები, ტაოური სოფელი თანამედროვე თურქეთში, ტაოელთა ყოფა, ფოლკლორი, ტაოური დიალექტი, ტაოს ონომასტიკა.

ბათუმის შოთა რუსთაველის სახელმწიფო უნივერსიტეტში სამეცნიერო კონფერენცია გაიმართა თემაზე „აფხაზები აჭარაში“. მკვლევარებმა სესიაზე მოხსენებები წარმოადგინეს შოთა რუსთაველის ეროვნული სამეცნიერო ფონდის საგრანტო პროექტის „აფხაზები აჭარაში“ ფარგლებში წარმოებული კვლევის შედეგებზე. სამეცნიერო პროექტის მიზანია აჭარაში აფხაზთა თავდაპირველი გადმოსახლების, მიგრაციის, აჭარაში ცხოვრების ისტორიული, ეკონომიკური თუ სხვა ხასიათის თავისებურებების გაანალიზება. კვლევა ასევე ითვალისწინებს მოახალშენეთა და ადგილობრივთა თანაცხოვრების იმ კულტურულ–ეთნოგრაფიულ პლასტების შესწავლას, რომლებიც ხალხურ მეხსიერებაში არსებობს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის „ქართველოლოგიის ცენტრის“ მკვლევართა ჯგუფი სამეცნიერო პროექტების „ტაო“ (ხელმძღვანელი, პროფესორი მამია ფაღავა) და „მარადიდი“ (ხელმძღვანელი, პროფესორი მალხაზ ჩოხარაძე. ორივე პროექტი დაფინანსებულია შოთა რუსთაველის ეროვნული სამეცნიერო ფონდის მიერ) ფარგლებში სამეცნიერო მივლინებით იმყოფებოდა ისტორიულ სამხრეთ საქართველოში. მეცნიერები ხუთი დღის განმავლობაში მუშაობდნენ ზემო მარადიდში - ახლა მურათლი (ძველი კლარჯეთის სოფელი, თანამედროვე ართვინის ილი, ბორჩხის ილჩე. თურქეთის რესპუბლიკა), ოლთისსა და თორთუმში (ძვ. ტაოს ქვეყანა. ახლა არზრუმის ილი, ოლთისისა და თორთუმის ილჩეები. თურქეთის რესპუბლიკა).