განცხადება

სურათი

გარდაიცვალა ცნობილი მეცნიერი, ბათუმის შოთა რუსთაველის სახელმწიფო უნივერსიტეტის ემერიტუს-პროფესორი, საქართველოს მეცნიერებათა ეროვნული აკადემიის ივანე ჯავახიშვილის პრემიის ლაურეატი მერი ცინცაძე. ღვაწლმოსილ პროფესორს მნიშვნელოვანი წვლილი მიუძღვის ენათმეცნიერების განვითარებაში, გამოქვეყნებული აქვს ათეულობით სამეცნიერო ნაშრომი და მონოგრაფიები, ეწეოდა სარედაქციო საქმიანობას, მკვლევართა შორის პირველმა ისაუბრა კლარჯული კილოს შესახებ, სამეცნიერო მიმოქცევაში შემოეტანა ქართული ენათმეცნიერებისათვის უცხო დიალექტის მასალები.

ქალბატონი მერი ცინცაძე 60 წელზე მეტი ხნის განმავლობაში  მოღვაწეობდა ბათუმის შოთა რუსთაველის სახელმწიფო უნივერსიტეტში და ერთგულად ემსახურებოდა ახალგაზრდობის აღზრდას, შემოქმედებითი ძიების გრძელი და ძნელი გზა გაიარა, აღსანიშნავია მისი სამეცნიერო მოღვაწეობა, ნაყოფიერი საველე შემკრებლობითი მუშაობა.

50-იანი წლებიდან  ქალბატონი მერი თანამშრომლობს საქართველოს მეცნიერებათა აკადემიის ახლადგახსნილ ბათუმის სამეცნიერო-კვლევით ინსტიტუტთან, მონაწილეობს საველე ექსპედიციებში. მის მიერ ჩაწერილი დიალექტოლოგიური ტექსტები სანდო წყაროა აჭარული დიალექტის საკვლევად. პარალელურად მერი ცინცაძე მუშაობდა ბათუმის შოთა რუსთაველის სახელობის პედაგოგიურ ინსტიტუტში, გასული საუკუნის 90-იანი წლებიდან გახლდათ ,,ისტორიულ-ფილოლოგიური კვლევის ლაბორატორიის“ ერთ-ერთი აქტიური წევრი, 1995 წლიდან  არაერთ კომპლექსურ ექსპედიციაში მონაწილეობდა. მკვლევარმა კოლეგებთან ერთად შემოიარა შავშეთი და კლარჯეთი. მის სამეცნიერო ინტერესებში შედიოდა ქართული ენის სამხრული კილოები (აჭარული, შავშური, კლარჯული, ტაოური, მუჰაჯირთა შთამომავლების მეტყველება), ძველი ქართული ენა, სამწერლობო ქართულისა და სამხრული კილოების მიმართების საკითხი, ქართული სალიტერატურო ენის საჭირბოროტო საკითხებს. იგი არის თანაავტორი რამდენიმე მონოგრაფიისა: ,,სამხრული კილოები და ქართული სამწერლობო ენა“, ,,შავშეთი“, ,,კლარჯეთი“, ,,ქართულად ხსნილად უბნობდი!“.

ქალბატონი მერი სიცოცხლის ბოლომდე მუშაობდა იოანე სინელის ,,კლემაქსის“ (სათნოების კიბე) ქართულ თარგმანებზე; ფიქრობდა, ძეგლი გამოეცა ყველა რედაქციის მიხედვით,  გამოკვლევითა და ლექსიკონით, რაც განუხორციელებელი დარჩა. ღირსეულ მკვლევარს ბევრი რამ დარჩა სათქმელი, დასაწერი, საკვლევი, საძიებელი. ის გახლდათ საუკეთესო შემფასებელი და ცენზორიც. თანაავტორებთან ერთად ფიქრობდა ,,შავშური კილოს“, ,,კლარჯული კილოსა“ და,, ტაოური დიალექტის“ ცალკე წიგნებად გამოცემას. სამწუხაროდ, არ დასცალდა, მისი მოწაფეები განაგრძობენ ერთად დაწყებულ საქმეს.
 


უკან

საკონტაქტო ინფორმაცია

საქართველო, ბათუმი, 6010
რუსთაველის/ნინოშვილის ქ. 32/35
ტელ: +995(422) 27–17–80
ფაქსი: +995(422) 27–17–87
ელ. ფოსტა: info@bsu.edu.ge
     

სიახლის გამოწერა