ტემპუსის საგრანტო პროექტის „უნივერსიტეტის მართვის ინტეგრირებული სისტემის შექმნა ევროკავშირის გამოცდილების მიხედვით“ ფარგლებში უნივერსიტეტს პარტნიორი დაწესებულებების წარმომადგენლები ეწვივნენ გერმანიიდან, პოლონეთიდან, ჰოლანდიიდან, უკრაინიდან, მოლდოვადან და ბელორუსიიდან. ორი დღის განმავლობაში პროექტის მონაწილეები შესრულებული სამუშაოს შედეგებს გაეცნობიან, ცალკეული დაწესებულების მართვის თავისებურების გათვალისწინებით წამოჭრილ პრობლემებს განიხილავენ და მათ გადასაჭრელად საჭირო რეკომენდაციებს შეიმუშავებენ. ტემპუსის საგრანტო პროექტის მიზანია უნივერსიტეტის მართვის ინტეგრირებული სისტემის შექმნა და დანერგვა უკრაინაში, ბელორუსიაში, მოლდოვასა და საქართველოში ევროპული გამოცდილების საფუძველზე. პროგრამა ითვალისწინებს უნივერსიტეტის ეფექტური მენეჯმენტისთვის აუცილებელი ინფორმაციული ნაკადის აღრიცხვას, მართვას, შენახვასა და დაცვას კომპიუტერული ტექნოლოგიების გამოყენებით.
აღნიშნული პროგრამის შემუშავება გაამარტივებს კომუნიკაციას სტუდენტსა და უნივერსიტეტს, სტუდენტსა და პროფესორს, ასევე უნივერსიტეტსა და თანამშრომლებს შორის. პროგრამა ითვალისწინებს ინტერნეტ ტექნოლოგიების გამოყენებით სტუდენტების აკადემიურ რეგისტრაციას, საგანმანათლებლო პროგრამების, სასწავლო მასალების, თავიანთი აკადემიური მიღწევების მოძიებას.
| უკან |
