21-25 ოქტომბერს, გრანადას უნივერსიტეტში სასწავლო ვიზიტით იმყოფებოდნენ „ერაზმუს+“-ის საგრანტო პროექტის „სოციალური უნარების განვითარება სომხეთისა და საქართველოს უმაღლეს საგანმანათლებლო დაწესებულებებში 21-ე საუკუნის შრომის ბაზრის მოთხოვნების შესაბამისად“ პერსონალი: პროფესორი ვლადიმერ ღლონტი, პროფესორი ასიე ცინცაძე და ასისტენტ-პროფესორი თამარ ღოღობერიძე. ვიზიტის ფარგლებში სასწავლო ტრენინგები ჩაატარეს და საკუთარი გამოცდილება გაუზიარეს გრანადის უნივერსიტეტის აკადემიურმა პერსონალმა.

ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა ივდით დიასამიძემ მონაწილეობა მიიღო Bologna Hub Peer Support II პროექტის შემაჯამებელ კონფერენციაში, რომელიც 7-8 ოქტომბერს გაიმართა ათენში, საბერძნეთი. კონფერენციის მთავარი მიზანი იყო პროექტის შედეგების წარმოდგენა და მომავალი თანამშრომლობის გაღრმავება მონაწილე უმაღლეს საგანმანათლებლო დაწესებულებებს შორის. ღონისძიებაში მონაწილეობდნენ პროექტში ჩართული უმაღლესი საგანმანათლებლო დაწესებულებები, ექსპერტები და დაინტერესებული პირები.

მოხარული ვართ გაცნობოთ, რომ ხარისხის განვითარების ეროვნული ცენტრის ავტორიზაციის საბჭომ ბათუმის შოთა რუსთაველის სახელმწიფო უნივერსიტეტს 6-წლიანი ავტორიზაცია მიანიჭა! ეს წარმატება ჩვენი მეცნიერების, პროფესორ-მასწავლებლების, თანამშრომლებისა და სტუდენტების შრომისა და ერთგულების შედეგია. მადლობას ვუხდით ყველას, ვინც წვლილი შეიტანა ამ მნიშვნელოვან პროცესში: ხარისხის განვითარების ეროვნულ ცენტრს, ავტორიზაციის საბჭოს, ექსპერტებს და უნივერსიტეტის ყველა გულშემატკივარს.

ბათუმის შოთა რუსთაველის სახელმწიფო უნივერსიტეტმა მონაწილეობა მიიღო „ერაზმუს+“-ის პროქეტში Bologna Hub Peer Support II. ბოლონიის პროცესის თანაბარი იმპლემენტაციის ხელშეწყობის მიზნით, Bologna Hub Peer Support II-ის პროექტის ფარგლებში, ბსუ-ში პირველი ვიზიტი განხორციელდა 2023 წლის 12-13 ოქტომბერს, ხოლო განმავითარებელი და შემაჯამებელი კოლეგიალური საკონსულტაციო ვიზიტები - 21 ივნისსა და 5 ივლისს, ონლაინ ფორმატში. უმაღლესი საგანმანათლებლო დაწესებულებების საჭიროებებიდან გამომდინარე დაგეგმილ კოლეგიალურ საკონსულტაციო მისიას უძღვებოდნენ ექსპერტები, დოქტორი ოლივერ ვეტორი (ეკონომიკისა და ბიზნესის ვენის უნივერსიტეტი) და დოქტორი სონია მიკესკა (Wandelwerk -მიუნსტერის უნივერსიტეტის გამოყენებითი მეცნიერებების ხარისხის უზრუნველყოფისა და განვითარების ცენტრი). ექსპერტებმა დახმარება გაუწიეს ბსუ-ს იდენტიფიცირებული პრობლემების გადაჭრაში, პრაქტიკული რეფორმების შემუშავებასა და განხორციელებაში.

6-7 ივნისს მილანში (იტალია) გაიმართა საერთაშორისო კონფერენცია ხარისხისა და თანასწორობის შესახებ უმაღლეს განათლებაში INTERNATIONAL CONFERENCE ON QUALITY AND EQUITY IN HIGHER EDUCATION - (ICQEHE-24), რომლის მიზანი იყო დაეკავშირებინა ერთმანათს სხვადასხვა დარგის წარმომადგენლები, გაეცნოთ უახლესი კვლევები და გამოწვევები. კონფერენციაში მონაწილეობა მიიღო ევროპისა და აზიის ქვეყნების უსდ-ს წარმომადგენლებმა, ბსუ-ს ჰუმანიტარულ მეცნიერებათა, საბუნებისმეტყველო და მედიცინის, იურიდიული და სოციალურ მეცნიერებათა ფაკულტეტების ხარისხის უზრუნველყოფის სამსახურების ხელმძღვანელებმა. მონაწილეებმა განიხილეს ხარისხსა და თანასწორობასთან დაკავშირებული გლობალური გამოწვევები, უმაღლესი საგანმანათლებლო დაწესებულებები და ხარისხის უზრუნველყოფის სტანდარტის ინდიკატორები და უმაღლესი განათლების სფეროში არსებული სხვა მნიშვნელოვანი საკითხები.