ახალი ამბები

“პანდემიას ასრულებ შენ!“ – ამ დევიზით ვაქცინაციის წამახალისებელ ექვსთვიან საინფორმაციო კამპანიაში ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის მედიცინის მიმართულების სტუდენტები ერთვებიან. კამპანია გაეროს ბავშვთა ფონდისა და იმუნიზაციისა და ვაქცინოლოგიის ასოციაციის (AIVA) მიერ USAID-ის მხარდაჭერით მიმდინარეობს და Covid 19-ის შესახებ საზოგადოების ინფორმირებას ისახავს მიზნად.
საინფორმაციო კამპანიის ფარგლებში, ბათუმის შოთა რუსთაველის სახელმწიფო უნივერსიტეტში თანამშრომლობის მემორანდუმი გაფორმდა, რომელსაც ხელი ბსუ-ს რექტორმა მერაბ ხალვაშმა, გაეროს ბავშვთა ფონდის წარმომადგენელმა საქართველოში (UNICEF) ღასან ხალილიმ და იმუნიზაციისა და ვაქცინოლოგიის ასოციაციის (AIVA) წარმომადგენელმა მარიამ ჯაშმა მოაწერეს.

ბულგარეთის საელჩოში გაფორმდა ხელშეკრულება ბულგარეთის განვითარების ფონდსა და ბათუმის შოთა რუსთაველის სახელმწიფო უნივერსიტეტს შორის, პროექტის „ბულგარეთის გამოცდილების გაზიარება ბათუმის შოთა რუსთაველის სახელმწიფო უნივერსიტეტის ინსტიტუციური განვითარებისათვის“ სახელწოდებით. პროექტს ხელი მოაწერეს საქართველოში ბულგარეთის რესპუბლიკის ელჩის მოვალეობის შემსრულებელმა, ილია ნაჩევმა და ბათუმის შოთა რუსთაველის სახელმწიფო უნივერსიტეტის რექტორის მოადგილემ, თამარ სირაძემ.

ბათუმის შოთა რუსთაველის სახელმწიფო უნივერსიტეტმა საარჩევნო სისტემათა საერთაშორისო ფონდთან (IFES) და სამოქალაქო განათლების ლექტორთა ასოციაციასთან (CELA) თანამშრომლობის მემორანდუმი გააფორმა.დოკუმენტი მიზნად ისახავს ბსუ-ს საბაკალავრო და პროფესიული საგანმანათლებლო პროგრამების სტუდენტების სამოქალაქო განათლების სწავლების ხელშეწყობას და სტუდენტების ჩართულობას ქვეყნის დემოკრატიულ განვითარებაში. მემორანდუმის ფარგლებში თანამშრომლობა ასევე განხორციელდება სამოქალაქო განათლების სასწავლო პროგრამის დანერგვის, მონიტორინგისა და შეფასების, სამოქალაქო განათლების ლექტორთა პროფესიული განვითარებისა და სხვადასხვა სამოქალაქო აქტივობების მიმართულებით.

ბათუმის შოთა რუსთაველის სახელმწიფო უნივერსიტეტმა აშშ-ს საელჩოს მედია განათლების პროგრამის ფარგლებში, რომლის განმახორციელებელი ამერიკული მხარეა ორგანიზაცია WorldChikago, ამერიკელ მედიაექსპერტებსა და საქართველოში აშშ-ს საელჩოს წარმომადგენლებს უმასპინძლა. საპასუხო ვიზიტი ქართული მხარის ამერიკაში სასწავლო კურსის გავლის შემდეგ განხორციელდა და ქართული მედიასკოლების წარმომადგენლებისათვის ამერიკული გამოცდილების გაზიარებას ითვალისწინებდა. მედიაგანათლების პროგრამის ფარგლებში, ბათუმის შოთა რუსთაველის სახელმწიფო უნივერსიტეტისა და თბილისის ივ. ჯავახიშვილის სახელობის უნივერსიტეტების თანამშრომლობით მომზადდა ახალი ერთობლივი სამაგისტრო საგანმანათლებლო პროგრამა „ციფრული მედია და ინოვაციები“, რომელიც აკრედიტაციის პროცესშია.

ბსუ-ში ჰუმანიტარულ მეცნიერებათა ფაკულტეტის ორგანიზებით გაიმართა დიდი ქართველი მწერლის, XX საუკუნის ქართული ლიტერატურის კლასიკოსის, ჭაბუა ამირეჯიბის, 100 წლისადმი მიძღვნილი ღონისძიება.
ღონისძიებას ესწრებოდნენ ბსუ-ს პროფესორ-მასწავლებლები, სტუდენტები და მოწვეული სტუმრები თბილისიდან, ქუთაისიდან, აჭარის მწერალთა სახლიდან. შეხვედრას უძღვებოდნენ უნივერსიტეტის რექტორი, პროფ. მერაბ ხალვაში და ფაკულტეტის დეკანი, პროფ. მარინე გიორგაძე.