ახალი ამბები

ახალი 2010-2011 სასწავლო წელი უნივერსიტეტის ეზოში საზეიმო ღონისძიებით დაიწყო. სტუდენტებსა და პროფესორ-მასწავლებლებს სწავლის დაწყება რექტორმა, პროფესორმა ალიოშა ბაკურიძემ მიულოცა და უნივერსიტეტში მიმდინარე სიახლეები და პრიორიტეტები გააცნო. უნივერსიტეტელებს წარმატებები უსურვეს აჭარის უმაღლესი საბჭოს თავმჯდომარემ მიხეილ მახარაძემ, განათლების, კულტურისა და სპორტის მინისტრმა გია აბულაძემ, საქართველოს მეცნიერებათა აკადემიის წევრ-კორესპონდენტმა ვახტანგ შამილაძემ და სტუდენტური თვითმმართველობის თავმჯდომარემ ამირან გოგიავამ

შოთა რუსთაველის სახელმწიფო უნივერსიტეტმა პროექტ ერაზმუს მუნდუსის (ლოტი 6) ფარგლებში პარტნიორი უნივერსიტეტების კონსორციუმის წევრთა შეხვედრას უმასპინძლა. ერაზმუს მუნდუსის კოორდინატორმა, პროფესორმა ტანია კაპიკმა პროექტის ახალი პროგრამა ERASMUS MUNDUS Action 2 Partnership for Georgia, Armenia and Azerbaijan (Lot 6) წარადგინა და საუკეთესო ქართველი ერაზმუსელი სტუდენტი ხათუნა გოგიშვილი დააჯილდოვა. კონფერენციაში მონაწილეობდნენ 19 პარტნიორი უნივერსიტეტის პროექტის მენეჯერები და პროგრამის მონაწილეები

გაიხსნა საქართველოს მათემატიკოსთა კავშირის პირველი საერთაშორისო სამეცნიერო კონფერენცია. შოთა რუსთაველის სახელმწიფო უნივერსიტეტისა და საქართველოს მათემატიკოსთა კავშირის მიერ ორგანიზებულ ხუთდღიან კონფერენციაში 80-მდე ქართველი, ამერიკელი, პოლონელი, ავსტრიელი, რუსი და სომეხი მეცნიერი მიიღებს მონაწილეობას. ფორუმზე მსოფლიოს წამყვანი მათემატიკოსები სამეცნიერო კვლევების შედეგებსა და მიღწევებს წარმოადგნენ, მათემატიკის სწავლებასა და დარგის განვითარებასთან დაკავშირებულ აქტუალურ პრობლემებს კი მრგვალ მაგიდასთან განიხილავენ

რსუ-ს საინჟინრო-ტექნოლოგიური ფაკულტეტის ორგანიზებით ჩატარდა საზაფხულო სკოლა თემაზე: ,,თანამედროვე საინჟინრო მიმართულებები“. პროექტი უმაღლეს სასწავლებელსა და ზოგადსაგანმანათლებლო სკოლებთან გაფორმებული ხელშეკრულების ფარგლებში განხორციელდა და მასში აბაშის საჯარო სკოლების მეთორმეტე კლასის წარჩინებული მოსწავლეები მონაწილეობდნენ. უმაღლესი სასწავლებლის პროფესორ-მასწავლებლებმა მომავალ სტუდენტებს ბათუმის სახელმწიფო უნივერსიტეტში სწავლების პირობები და საინჟინრო-ტექნოლოგიურ და სხვა ფაკულტეტებზე არსებული სპეციალობები გააცნეს. წაუკითხეს ღია ლექციები გონიო-აფსაროსის მუზეუმ-ნაკრძალში, ძმები ნობელებისა და ბათუმის არქეოლოგიურ მუზეუმში.

ახალგაზრდობის საერთაშორისო დღეს - 12 აგვისტოს, შოთა რუსთაველის სახელმწიფო უნივერსიტეტის სტუდენტებმა 2008 წლის აგვისტოს რუსეთ-საქართველოს ომში დაღუპული გმირები გაიხსენეს და დიალოგი გამართეს თემაზე: ,,2008 წლის აგვისტოს ომი და რუსეთის საოკუპაციო რეჟიმი საქართველოს ტერიტორიაზე“. სხვადასხვა უმაღლესი სასწავლებლის სტუდენტებმა და ახალგაზრდული ორგანიზაციის წარმომადგენლებმა რუსეთ-საქართველოს ომის შედეგები განიხილეს და სახალხო დიალოგში სტუდენტობის ჩართვის მნიშვნელობაზე ისაუბრეს. ბათუმელმა ახალგაზრდებმა დიალოგი აფხაზი და ოსი ეროვნების თანატოლებისადმი მიღებული მიმართვით დაასრულეს.