ახალი ამბები

შოთა რუსთაველის დარბაზში პროფესორ ვაჟა ჩანტლაძის წიგნის ,,ადამიანის თავისა და კისრის ნორმალური ანატომიის ატლასის“ წარდგინება გაიმართა. ავტორის რიგით მეოთხე ნაშრომი 8 თავისა და 269 ილუსტრაციისაგან შედგება. იგი ამომწურავად შეიცავს თავისა და კისრის მიდამოს ყველა ორგანოს, ელემენტსა თუ წარმონაქმნს, რომელიც მოცემულია თითქმის ყველა რაკურსში სივრცობრივი წარმოდგენის გასაადვილებლად. შოთა რუსთაველის სახელმწიფო უნივერსიტეტის აკადემიური საბჭოს დადგენილებით ატლასი აღიარებულია სახელმძღვანელოდ მედიცინისა და სტომატოლოგიის სპეციალობის სტუდენტებისათვის.

შოთა რუსთაველის სახელმწიფო უნივერსიტეტის 75 წლის იუბილეს მიეძღვნა საერთაშორისო სამეცნიერო კონფერენცია ,,თანამედროვე ალგებრა და მისი გამოყენებანი“. ექვსდღიანი კონფერენცია საქართველოს ეროვნული სამეცნიერო ფონდის მიერ დაფინანსებული სამეცნიერო გრანტების (GNSF/STO8/3-383 და GNSF/STO8/3-396) ფარგლებში ჩატარდა და მასში 9 ქვეყნის 45 მათემატიკოსი მონაწილეობდა. ფორუმი მიზნად ისახავდა დარგის სამეცნიერო მიღწევების გაცნობას, ერთობლივი სამეცნიერო კვლევების წარმოებასა და სამეცნიერო კონტაქტების გაღრმავებას.

,,მშვიდობა უდრის მომავალს" - ამ დევიზით შოთა რუსთაველის სახელმწიფო უნივერსიტეტში მშვიდობის საერთაშორისო დღისადმი მიძღვნილი ,,მშვიდობის კვირეული“ დაიწყო. პროექტი უნივერსიტეტის სტუდენტური თვითმმართველობის, არასამთავრობო ორგანიზაციის ,,ჩვენი თაობისა“ და სამოქალაქო საზოგადოების განვითარების კავშირის ,,ბორჯღალოს“ ორგანიზებით ხორციელდება. ,,მშვიდობის კვირეულის“ ფარგლებში სხვადასხვა სახის კულტურული, საგანმანათლებლო და სპორტული ღონისძიებები ჩატარდება, რომელთა მიზანია კონფლიქტთა მშვიდობიანი გზით მოგვარება და საზოგადოებაში ტოლერანტობისა და მშვიდობის იდეალების პროპაგანდა

საქართველოს მეცნიერებათა აკადემიის წევრ-კორესპონდენტს, ისტორიის მეცნიერებათა დოქტორს, შოთა რუსთაველის სახელმწიფო უნივერსიტეტის სრულ პროფესორს, წარმომადგენლობითი საბჭოს სპიკერს, ნიკო ბერძენიშვილის სამეცნიერო-კვლევითი ინსტიტუტის სამეცნიერო საბჭოს თავმჯდომარეს, მსოფლიოში აღიარებულ ეთნოლოგს, პროფესორ ვახტანგ შამილაძეს დაბადებიდან 75 წელი შეუსრულდა. შოთა რუსთაველის სახელმწიფო უნივერსიტეტში გამართულ საიუბილეო სხდომაზე პროფესორ-მასწავლებლებმა და საზოგადოების წარმომადგენლებმა აკადემიკოსის სასწავლო-სამეცნიერო მიღწევებსა და საზოგადოებრივ-პოლიტიკურ საქმიანობაზე ისაუბრეს, იუბილე მიულოცეს და სამახსოვრო საჩუქრები გადასცეს

ახალი 2010-2011 სასწავლო წელი უნივერსიტეტის ეზოში საზეიმო ღონისძიებით დაიწყო. სტუდენტებსა და პროფესორ-მასწავლებლებს სწავლის დაწყება რექტორმა, პროფესორმა ალიოშა ბაკურიძემ მიულოცა და უნივერსიტეტში მიმდინარე სიახლეები და პრიორიტეტები გააცნო. უნივერსიტეტელებს წარმატებები უსურვეს აჭარის უმაღლესი საბჭოს თავმჯდომარემ მიხეილ მახარაძემ, განათლების, კულტურისა და სპორტის მინისტრმა გია აბულაძემ, საქართველოს მეცნიერებათა აკადემიის წევრ-კორესპონდენტმა ვახტანგ შამილაძემ და სტუდენტური თვითმმართველობის თავმჯდომარემ ამირან გოგიავამ