ახალი ამბები

ულტრასონოგრაფიის, ქირურგიული ტექნიკის, სასწრაფო და გადაუდებელი თერაპიის ტაქტიკის საკითხებს მიეძღვნა ორდღიანი საერთაშორისო ვორქშოფი სახელწოდებით: „ქირურგიული მენეჯმენტი და ტექნიკა“. ევროპის წამყვანმა ქირურგებმა და მიუნხენის ლუდვიგ მაქსიმილიანის უნივერსიტეტის პროფესორებმა ულტრასონოგრაფიის, ქირურგიის სპეციალობის, ურგენტული დახმარების ექიმებსა და სტუდენტებს ტრენინგები ჩაუტარეს და ბოლო წლებში წარმოებული კვლევის შედეგები გააცნეს. ასევე განიხილეს ქირურგიული მენეჯმენტისა და დიაგნოსტიკის მიმართულების სიახლეები. ვორქშოფი მიუნხენის ლუდვიგ მაქსიმილიანისა და შოთა რუსთაველის სახელმწიფო უნივერსიტეტებს შორის გაფორმებული მემორანდუმის ფარგლებში ჩატარდა.

შოთა რუსთაველის სახელმწიფო უნივერსიტეტში სასწავლო კრებულის "როგორ ვიცხოვრეთ ერთად XX საუკუნეში საქართველოში" პრეზენტაცია გაიმართა. ნაშრომი 2008-2011 წლებში ისტორიის მასწავლებელთა ევროპული ასოციაციისა (EUROCLIO) და ისტორიის მასწავლებელთა საქართველოს ასოციაციის ერთობლივი პროექტის ,,ტოლერანტობის მშენებლობა საქართველოში ისტორიის სწავლების გზით“ ფარგლებში გამოიცა. კრებულის წარდგინებასთან ერთად ტრენინგი "როგორ გამოვიყენოთ კრებულის მასალები სასწავლო პროცესში" ჩატარდა. სემინარში მონაწილეობდნენ რსუ-ს პროფესორ-მასწავლებლები, განათლებისა და მეცნიერებათა ფაკულტეტის მასწავლებლის მომზადების საგანმანათლებლო პროგრამის სტუდენტები, საჯარო და კერძო სკოლების ისტორიის პედაგოგები. შოთა რუსთაველის სახელმწიფო უნივერსიტეტის ისტორიის სწავლების მეთოდოლოგიის კაბინეტს ასოციაციის სახელით პერსონალური კომპიუტერი გადაეცა.

შოთა რუსთაველის სახელმწიფო უნივერსიტეტს ტალინის უნივერსიტეტის დელეგაცია რექტორის, პროფესორ ტიიტ ლანდის ხელმძღვანელობით ეწვია. ვიზიტი უმაღლეს სასწავლებლებს შორის გაფორმებული მემორანდუმის ფარგლებში შედგა და მიზნად ისახავდა თანამშრომლობის გაღრმავებასა და სასწავლო-სამეცნიერო პროექტების შემუშავებას. რსუ-ს რექტორთან, პროფესორ ალიოშა ბაკურიძესთან გამართულ შეხვედრაზე დაიგეგმა ერთობლივი სადოქტორო, სამაგისტრო პროგრამების განხორციელება და სამეცნიერო კონფერენციების, სიმპოზიუმების, სემინარების ჩატარება. ტალინის უნივერსიტეტის პროექტის „თბილისისა და ბათუმის უნივერსიტეტებში სოციალურ ფაკულტეტებზე სწავლების ხარისხის გაუმჯობესების მხარდაჭერა, ლექტორთა კვალიფიკაციის ამაღლება და ეფექტური ელექტრონული სწავლის სისტემის დანერგვა“ ეგიდით, ელექტრონულ სწავლების საკითხებზე ესტონელი პროფესორ–მასწავლებლები ორი დღის განმავლობაში სემინარებს, საჯარო ლექციებსა და ტრენინგებს ჩაატარებენ.

აჭარის ავტონომიური რესპუბლიკის განათლების, კულტურისა და სპორტის მინისტრის მოადგილემ ლამზირა ბოლქვაძემ და განათლებისა და სტრატეგიული დაგეგმვის დეპარტამენტის ხელმძღვანელმა ნაზიბროლა ბერიძემ რსუ-ს ინგლისური ენისა და ლიტერატურის სპეციალობის მაგისტრანტებსა და პროფესორ-მასწავლებლებს მიზნობრივი პროგრამა ,,ვასწავლოთ მომავალი წარმატებისათვის" წარუდგინეს. პროგრამა ხელს შეუწყობს მაღალმთიანი აჭარის საჯარო სკოლებში არსებული ინგლისური ენის მასწავლებლის ვაკანსიის შევსებასა და ხარისხიანი სწავლების ხელშეწყობას. მიზნობრივ პროგრამაში მონაწილეობის მსურველები ორეტაპიანი კონკურსის საფუძველზე შეირჩევიან. საბუთები 2011 წლის 26 ოქტომბრიდან აჭარის განათლების, კულტურისა და სპორტის სამინისტროსა და რესურსცენტრებში მიიღება.

TEMPUS-ის ეროვნული ოფისის ხელმძღვანელმა ლიკა ღლონტმა შოთა რუსთაველის სახელმწიფო უნივერსიტეტის პროფესორ-მასწავლებლებს TEMPUS-ის პროგრამის ახალი საგრანტო კონკურსის პრიორიტეტები და ჩატარების პირობები გააცნო. პროგრამის მიზანია უმაღლესი განათლების რეფორმის ხელშეწყობა და თანამშრომლობის განვითარება ევროკავშირის პარტნიორ ქვეყნებში. პროექტი ითვალისწინებს უმაღლეს სასწავლებლებში ევროპული სტანდარტებისა და ახალი ინფორმაციული ტექნოლოგიების დანერგვას, თანამედროვე სასწავლო პროგრამების შემუშავებას, კვალიფიკაციის ამაღლებას, სტუდენტებისა და აკადემიური პერსონალის მობილობას, უნივერსიტეტების მენეჯმენტის გაუმჯობესებას და უახლესი სასწავლო ლიტერატურის მიწოდებას.